Read BIBILLYA Mareiyo Meele a Iruva MATAYO 15 Bible Online

MATAYO 15 - BIBILLYA Mareiyo Meele a Iruva bible

MATAYO 15

¹Nalyo Yesu kasheywa ni Vafarisayo na velosha va mavavaso vauka kulya Yerusalemu. Vakaamba,

²A nkikyi elyi vakiloshyony kyafo vava veimmbwa ngyufundo ta vakuu? Mashika vara valasangya maako elyi valya shoonga.

³Nawe kaallwa kavavia, “Nkyiki elyi yeni mwava veimmbwa ivavaso lya Iruva kimaruma kya ngyufundo yeto tany?

⁴Shamashika Iruva mmbo avavasye kaamba, ‘Indya ndoo na mau. Na yeto aruma ndeye ao maye iwaawa nawaawa.’

⁵Na yeni mukaamba-le, ‘Kwakooya nndu amina ndeye ao maye, Kavavia efyo mweewarya kwakwa fyeemulela, akakafyo shammefivika five waavi lwa mmba ya Iruva! Naasa, nndu yeto nalakiindye-se nta ndeye nta maye-fo.’

⁶Na yeni mukaniinga ivavaso elyo lya Iruva lyikarewa mutewa ni ngyufundo yeto tany.

⁷Mmbo mukee vakunang'ari, Isaya kamuronga ninsha elyi aleawuya kisuku kilya kaamba,

⁸‘Vandu yeva ni firomu fyawo vashiinndya nafyo, indi ngoo tawo tikakaa kwaasha neeny.

⁹Mmbo vashiinndya kikee kya ruu deny, mashika miloshye yaawo valosha ni mavavaso a kivandu.’”

¹⁰Naasa kavaanga mamwiingyi ulya wa vandu naambo vashekuummbya yoo akai. Kavavia, “Aranyiny mwiitumuso!

¹¹Kindo kireveesa nndu nshi yekyo kishangaa na kaniny-fo, ni yekyo kishuukaa kaniny, nkyo kindo kireveesa nndu.”

¹²Naasa valya vakiloshyony vakasha na yoo akai, vakaamba, “A ndesa kwamanya Vafarisayo vamiita kirero ekyo vakauta-u nsindara?”

¹³Nawe kavavia, “Wo kindo kivaakye kiiyo kulaore kyammbaaywa ni Nde-yaakwa wa efo iruveeu mmbo kishiiluwaa.

¹⁴Vakureeyeny-te! Mmbo vasongoye vafu miso shia vavekee vafu miso wo veni. Na kwakooya mfu miso asongoya mfu miso uroye shia, mmbo vashoolokaa irininy vee vavii.”

¹⁵Naasa Petro kaallwa kammbia, “Lukapye nsuka wa kyaaso ekyo, mbee!”

¹⁶Nawe kaamba, “Na yeni-da fika ulaalu nta mulandeipuye kindo?

¹⁷A mmbo mulandeitumuso sheelyi wo kindo kishangaa na efo kaniny, mmbo kishoolokaa na ndewuny kikauka-fo kikaenda irininy?

¹⁸Indi efyo fishuukaa efo kaniny mmbo fisomukaa fyuuka efo nriminy. Nafyo mfyo fireveesaa nndu.

¹⁹Shamashika efo ngoony mfo kundo kushuukaa makusaro meesi, na fya uwai, na fya utuusi, na wiivi, na fya urui, na fya ukureekyi lwa wongo, na fyaararo.

²⁰Mfyo efyo fireveesaa nndu. Indi nndu kalya shoonga na maako alakee masangye nshikyo kireveesaa nndu-fo.”

²¹Naasa Yesu kakwiipoo warya kooka-u, kafika kulya myuungony ya Tiro na Sidoni.

²²Nalyo akau nndu nka wa Kikanaani ansha nau, auka urukeny lwa kufii-fii. Kaonisa unyanga, kaamba, “Woi Nndumi kukee mwana wa Davidi, shisarya ukiva lwakwa! Mmbo shitiri mwana wa kyeny atirwa mmumuyo nkasha ukamwaaruva kyuumu.”

²³Nawe nalanndouwe nta kirero. Naasa, vakiloshyony kyakwe vakanserikya, vakantereva, vakaamba, “Ntauwe mbee, mmbo afua nnu yoo numa yeeru.”

²⁴Nawe kaallwa kaamba, “Nshilerumwa kundo-fo, kulaore ni kwa vandu va Israeli varekye sha moonri.”

²⁵Nawe kasha nau kamoolokya si, kaamba, “Woi Nndumi sheekya kima kyakwa-te!”

²⁶Nawe kaallwa kaamba, “Nshi kisha nndu nasoke fivana shoonga yaawo neerye fite-fo.”

²⁷Nawe kaamba, “Ee-da Nndumi. Indi naakwa ni fite fikulyiiyaa fipereshu fishaangaraa fyuuka efo meseny a vanndumi va vayo.”

²⁸Nalyo Yesu kaallwa, “Ee nka, kwankusirya-u kiniini-dwa. Kivekuviiyany indo shaasa kwakukunndya!” Nalyo mwana ulya wakwe kashia kyeeri kilya kyeni.

²⁹Naasa Yesu kakwiipoo-fo kandefika kulya waambeu lwa yeeve ilya ya Galilaya. Kasaama na kulya ifumbuny kakaa-fo rembo.

³⁰Naasa vandu vakamweengya matorito meengyi varie yewo vakee miketekete, na vafu miso, na mbimbi, na fitongororo, na va ngata ingyi veengyi, vakaveera yoo marendeny akwe. Nawe kavakira.

³¹Vandu valya vakuummbye-u vakasongololo elyi valollya valya fitongororo veshiaa, na valya vakee miketekete vesheendaa, na valya vafu miso velolaa. Nawo vakauta-u ing'anisa Iruva wa Israeli.

³²Naasa Yesu kavaanga valya vakiloshyony kyakwe vakuummbye yoo akai, kaamba, “Mmbo shavavyo mmuu kya nsemu yeu wa vandu. Mashika kwammiira-u mikonu iraru sele vesisirye yaa kwakwa, nta valatiri kindo kyeelya. Nta nshikunndye ivasama indo valakomba kindo-fo, mmbo valemmywaa efo shia.”

³³Valya vakiloshyony vakammbia, “A yaa kasa lukai, nkwi lushuutaa mikate miingyi indo yeewuutisa vandu yeva vamiingifwa indo?”

³⁴Na Yesu kavavia, “Mikate mutiri ni iinga?” Vakammbia, “Ni mfungare, na fikunga fiifo fyaangu.”

³⁵Naasa kavavasya vandu valya vakuummbye-fo mamwiingyi vakee rembo.

³⁶Naasa kawarya mikate ilya mfungare na makunga alya. Kaarafuma Iruva kafisha-fisha fyenga, kaniingya vakiloshyony. Valya vakiloshyony vakandeavya mamwiingyi ulya.

³⁷Vakalya woose vakawuura vakaveipoo na fipereshu filya fyasaa, mikusha ikaishwa mfungare.

³⁸Na vandu valelya vafye womi fiku fiina kwauta-fo vaka na vana.

³⁹Naasa kasama mamwiingyi ulya wa vandu. Kandesaama na efo ngalaveny. Kandefika kulya myuungony ya kulya Magadani.