Read BIBILLYA Mareiyo Meele a Iruva MARKO 3 Bible Online

MARKO 3 - BIBILLYA Mareiyo Meele a Iruva bible

MARKO 3

¹Nalyo kaanga lyingyi efo mmba yeeterevya. Nafo kwiifo nndu atiri woko lufirikye.

²Nawo vakava vallaayany, valole kwakooya ankiraa elyi lya Sabato, naambo vakooye kyeenkumba nakyo.

³Nawe kavia nndu ulya atiri woko lufirikye, “Kwiipoo, kushesalala yoo nnang'ani.”

⁴Nalyo kavavia, “A ndesa kwiifo mumu weetana mesha nkonu yeu wa Sabato ao ni itana makasha, ikira muu wa nndu ao ni yuureta?” Nawo vakamalallya sau.

⁵Naasa kavaringitya miso ivalola arooywaa nngoo na isokywa ni fyoova deny kimaruma kya ngoo tilya tawo tammba indo shuumu. Kavia nndu ulya, “Orwa woko yelo lwafo!” Kaorwa, woko lulya lwakwe lukawuya iva usha.

⁶Nalyo yeni Vafarisayo vakasomuka-fo, vakandesasanga na Herode. Vakaruvya shila kyikee kya insua, vaoni shia yeenreta.

⁷Nalyo Yesu kakwiipoo-fo waarya aryani na vakiloshyony vakwe. Kaenda kulya mbaambaa ya yeeve ilya. Vandu vakansora mamwiingyi nniini vakauka kulya Galilaya na kulya Yudaya,

⁸na kulya Yerusalemu na Idumaya na kulya kwa kulya ya Yordan na kulya myuungony ya Tiro na Sidoni, ni mamwiingyi nniini deny wa vandu, nawo vaitye filya aletana fyoose, vakafika kulya akai.

⁹Nawe kavia valya va kiloshyony vakwe vairikise ngalava ilya shidu immbere kimaruma kya mamwiingyi ulya wa vandu, naambo valashe insisira.

¹⁰Mashika elyi alekira veengyi na valya vatiri fivalyilyisaa vakeeuwa vandu naambo vakooye ifika alya akai, vampaani.

¹¹Na mimuyo ilya ya utefusu elyi ilellollya, ikamwoolokya si, ikafua ishaambaa, “Yewe mmbwe Mwana wa Iruva!”

¹²Nawe kaveema deny valeshemwaamba.

¹³Nalyo kasaama alya ifumbu-u. Kavaanga valya ambakunda muni. Vakasha na yoo akai.

¹⁴Kavika vandu ikumi na vavii, vave vekaa nawe, navevaruma vandekapa weele.

¹⁵Vavetira na ushilyi lwa yaanta mimuyo mikasha.

¹⁶Kavika valya ikumi na vavii. Kafishya Simon irina lyakwe ni Petro.

¹⁷Na Yakobo ulya wa Sebedayo na Yohane we mwanamaye wa Yakobo, we kavafishya irina ni Boanerge, nakyo ni kyimwi na vana va maruruma.

¹⁸Na valya vengyi ni Andrea, na Filipo, na Bartolomayo, na Matayo, na Toma, na Yakobo ulya wa Alfayo, na Tadayo na Simon akee wa yewo vakaari iringa ngata ya Kiyuda.

¹⁹Na Yuda Iskariote mmbwe yeto alenndiingya.

²⁰Nalyo kaenda kaanga efo mmba, vandu vakasha ikuummbya-u lyingyi-se mwamwiingyi. Nta valaidimi iwonisa mwaanya weelya shoonga.

²¹Na valya va kulya kwakwe, elyi vamiita mbony takwe teenda indo, vakawara shia vandentira. Vakaamba, “Ansukwa.”

²²Na veelosha mavavaso valya valesoka wooka kulya Yerusalemu, wo vakaamba, “Mmbo atirwa ni Belsebuli, na elyi aanta mimuyo mikasha mmbo aekywa ni yeto nniini wa mimuyo mikasha.”

²³Nawe kavavaanga na yoo akai, karera nawo aveera fyaaso kaamba, “A ni inda Satana ashiidimaa yaanta Satana uroye?

²⁴Na kwakooya umangyi lusheraukanaa lukakukapa weni, umangyi yelo nta llushiidimaa ikaa-u-fo.

²⁵Na kwakooya mmba ya nndu isheraukanaa ikakukapa sheni, mmba yeyo nta nnyishiidimaa ikaa-u-fo.

²⁶Na kwakooya Satana akwiipoo kakukapa muni mmbo araukana, nta nnashiidimaa ikaa-u-fo, mmbo ashekombika kombi.

²⁷Indi nta nkwiifo nndu ashiidimaa yaanga kwa nndu mwaafinya nandekamara fiiya filya fyakwe nafimaa-fo, kwankooya kulaore ampooka ifinga mwaafinya yeto llyo-ny ashekamaraa fya efo mmba kwakwe nafimaa.”

²⁸Ni kya dede shamuvia, “Vana va vandu mmbo vashewonaa ifwaaywa kya findo fya ulyamari fyoose, na fyaararo fyoose vamaarara shaasa fifye.

²⁹Indi kwakooya nndu amaarara kya imina Mumuyo Mweele, we nnaonaa ifwaaywa-fo, mmbo akaa na uvingo lwa llung'anu lwa ulyamari lwakwe.”

³⁰Mashika llya valeamba, “Mmbo atirwa mmumuyo wa utefusu.”

³¹Nalyo maye vakasha nang'u na vanavamaye, vakasha iirisha yoo poo. Vakanrummya nrumi yeembaanga.

³²Naasa na mamwiingyi ulya wa vandu ukee rembo unndingitye riti, vandu vakammbia, “Akakawo mau na vanavamau na vamfwamau vakee yoo poo vakuruuyaa.”

³³Nawe karouwa kaamba, “A ma na vanavama ni vakyi?”

³⁴Naasa kalola valya vakee rembo vansengetye kavaringitya miso. Kaamba, “Akakava ma na vanavama vakwa.

³⁵Wo nndu aiyo moose atana efyo fisennyi Iruva mmbwe ava mwanama wakwa na mfwama wakwa na ma wakwa.”