Read BIBILLYA Mareiyo Meele a Iruva NKUMBUYE WA UVAVASO 11 Bible Online

NKUMBUYE WA UVAVASO 11 - BIBILLYA Mareiyo Meele a Iruva bible

NKUMBUYE WA UVAVASO 11

¹Kimmba niindo, kunda Nndumi Iruva Nndumi wafo neesora ufundo lwakwe wo nkonu, na mavavaso akwe na usumanu lwakwe, neefyo akuvavasyaa.

²Yeni inu manyiny, mashika nshi nkeerera na vana vany valaishi-fo, nta kulaore valellollya ngapo ya Nndumi Iruva-fo, na uniini lwakwe na woko lwakwe lwa finya, lurundaa mashora,

³na ngyende takwe na filya aletannya mangyi ya Misri we Farao, na uruka lwakwe,

⁴na shaasa aletannya itorito lya va Misri na farasi tawo, na mitika awo, na shaasa alevaalaluya kulya yeeveny ya Shamu llya vekeemuvinngya na shaasa alevarumatya-fo, neeni mukumbuye fika inu;

⁵na filya alemutannya yeni alya mbai ya nruva, kutani mwashefika yaa mukai,

⁶kummbweny na shaasa aletannya vana valya va Eliabu wo Datani na Abiram va ufyari lwa Ruben shaasa mulelollya sumbai ivamira, amwi na vakyeny kwawo na meema awo, na wo kindo kyawo kyekee na muu,

⁷Nang'u miso any mmbo alelollya mashora maniini Nndumi Iruva aleatana.

⁸Nkyo mukalatya efi fyoose nkeemukumbura inu, muwoni finya neevangiswa yaanga urukeny elo efo mukeenda.

⁹Llyo na suku tany tishevaa shiingyi efo urukeny yelo Nndumi Iruva aleniinga vande vany na ufyari lwawo lwa numa, llo uruka lwiishwe malela na wuki.

¹⁰Mashika uruka yelo efo mukeenda nshi uruka luvakye Misri kulya muleuka-fo, kulya mmbo mweevaaya neenisa mfongo sheelyi munisaa kyaawu kya nyany.

¹¹Lyo uruka yelo efo mukeyenda mmbo lukee lwa mamungo na fidooro nalo mmbo luniswaa ni mmbwa ya iruveu tupu.

¹²Uruka yelo mmbo lulelwaa ni Nndumi Iruva muni, nawe nng'u avikye miso akwe kyeeri kyoose kya mwaaka.

¹³Na elyi mushearannya mavavasyo akwe na nrima yoo nkeemuvia ulaalu mukunde Nndumi Iruva waany, neendunndya na mirima yaany myoose na ngoo shoose,

¹⁴llyo neeny nshemoolotyaa mmbwa ya uruka lwany na kyeeri kya vayo, mmbwa ya kisie na ya mateeri, kwiilule shoonga tafo, na misabibu yafo na mafura.

¹⁵Neeny shikuniinge mare a findo fyafo fyeevikya, neewe kuwoni shoonga yakumaa.

¹⁶Kwiiseny mulasheelembika musore maruva engyi nta yaafiirya ndi.

¹⁷Kyikava indo llyo Nndumi Iruva ashemwiimaa mmbwa na uruka lwany luture fimu fya vayo, neeni murumake na yuuka ulaniny efo urukeny Nndumi Iruva alemuniinga.

¹⁸Kyasia aranyiny marero akwa nisha, mwaafingye yoo wokony avekaa yoo mbee ya miso any kyeeri kyoose.

¹⁹Muvelosha vana vany efo kyeny, elyi mukee efo shia, na kyeeri kukeelala na elyi kwakwiipoo.

²⁰Na lyingyi marero yaa areiye yoo mwaangony wa mmba,

²¹naambo mwaakummbwe na suku tany na ta vana vany tikooye iva shiingyi urukeny elo Nndumi Iruva waany amuniinga, kyeeri kyoose.

²²Kwakooya mwalatya mavavaso yaa moose nkeemuniinga, mukunde Nndumi Iruva weeru neelatya shia takwe neenkunda,

²³llyo Nndumi Iruva asheumbutaa vakiduva vany efo mbee yaany neeni mmbo mushevailannyaa neevashillya.

²⁴Na wo ando mushevaryaa mmbo kuvaa kwany, pookya kasa eko na Lebanoni, pookya mura wa Frati fika yeeve lya taari ya nkwaany, kuve nnyanu wany.

²⁵Nkwifo vandu vashiindimaa imusiika-fo, Nndumi Iruva waany mmbo asherumata efo koose mushiiraa, shaasa llya alemuvia.

²⁶Lolente yoo mbee yaany mmbo shavika-u mbora na kidengo;

²⁷muwonise mbora elyi mwasora mavavasyo a Nndumi Iruva, Iruva weeru, ya nkeemuninngya inu,

²⁸ao kidengo kimukooye elyi mwara mavavasyo a Nndumi Iruva, Iruva weeru neesora shia ingyi, yeyo ya maruva engyi mulaeeshi nta.

²⁹Naasa elyi Nndumi Iruva, Iruva wafo ashekufitaa efo urukeny elo, saama ifumbuny lya Gersimu kusenndye-u mbora na kidengo yoo uwe ya ifumbu lya Ebali.

³⁰A yefo nshikwakulya ya Yordan? Taari ya nkwaany, urukeny lwa vakanaani efo Araba kuwandami na Giligali, mbai ya nsito wa More?

³¹Mashika mmbo muruukaa Yordan mwange urukeny elo Nndumi Iruva alemuniinga mwaange-fo mulutire luve lwany,

³²Neeny loleny mulatye mavavaso akwe shaasa nkeemoora inu.