Read BIBILLYA Mareiyo Meele a Iruva NKUMBUYE WA UVAVASO 16 Bible Online

NKUMBUYE WA UVAVASO 16 - BIBILLYA Mareiyo Meele a Iruva bible

NKUMBUYE WA UVAVASO 16

¹Kukummbwe mwiiri wa Abibu, kwiinndye Pasaka ya Nndumi Iruva, Iruva wafo mashika ni mwiiri wa Abibu, Nndumi Iruva, Iruva wafo alekuuta kulya Misri kio.

²Enda ando a yaiinndya irina lyakwe, kuute ishonri au ng'umbe ive kiraso kya Pasaka kwa Nndumi Iruva, Iruva wafo. Llyo kushishyaa Nndumi Iruva, wafo Pasaka kuuta efo marondeny afo a ng'umbe na moonri kweende yoo mmba ya Nndumi Iruva.

³Nta kulasheelya ando amwi na mikate itiri n-dooko-fo, ando a mikonu mfungare mmbo kulyaa ando amwi na mikate, ilatiri n-dooko nnyo mikate ya makiva, mashika kuleutwa urukeny lwa Misri uviny-dwa, naambo kukummbwe nkonu kuleuka ukiveny lwa Misri, mikonu myoose ya muu wafo.

⁴Nta efo mmba kwafo kulakaefo kindo kya ntarang'u-fo, kutani kweera-u mikonu mfungare kupookya elyi kushishaa ngurana ya pasaka nkonu wa mbee nkwaany, kilalale kindo kufike elyi lya ndesi-fo.

⁵Kulashishye pasaka efo mmba kwafo-fo,

⁶ni yoo kweni Nndumi Iruva ashekooraa nng'u kushishyen pasaka elyi nkwaany mwi wiishoolokaa sha kyeeri kilya kuleuka Misri.

⁷Mmbo kusheikaraa na muro kulyiiye yoo Nndumi Iruva ashekooraa, na ngama nlyo kukupoo kuwuye na kyeny kwafo.

⁸Mmbo kulyaa mikate ilatiri ntarang'o ando a mikonu irindaru. Nkonu wa mfungare llyo muvikaa mwinndye myeele kimaruma kya Nndumi Iruva, nta mularunde ishora-fo.

⁹Ekyena mifungare mfungare, pookya elyi kwapooka yulula.

¹⁰Kuvikye Nndumi Iruva sukukuu ya fimu kwiishuutaa findo fya pya, kiinani na shaasa Nndumi Iruva akuvikye mbora;

¹¹neewe mmbo kufuraa na Nndumi Iruva wafo kwiikee na mwana wafo wa kyuumi na wa kyika, na ishinga na kishinga kyaafo, na Llevi wafo, na muny wafo, na mwana wa ngwera, na nka wa ding'u woose yewo kukee nawo, kufure nawo yoo ando Nndumi Iruva, Iruva wafo ashekooraa kusendyeu irina lyakwe.

¹²Kukummbwe shaasa kweekee ishinga kulya Misri, naasa kusoreny mavavaso yaa.

¹³Vika suku kuu ya matangilo ando a mikonu mfungare elyi kwammaa isang'irya fimu fyafo na mfinyo wafo.

¹⁴Kufure na suku kuu yafo yewe na mwana wafo wa kyuuni na wa kika na ishinga lyafo na kishinga kyafo na Llevi wafo, na muny wafo na mwana wa ngwera na nka wa ding'u yewo vakee kwafo.

¹⁵Mmbo kuvikyaa Nndumi Iruva sukukuu ando a mikonu mfungare yoo ashekooraa llyo Nndumi Iruva wafo ashekuvikyaa mbora findony fyafo fyoose, na mashoreny moose a maako afo, neewe kuwoni ikyesa deny.

¹⁶Ando a mwaaka umwi womi woose vasomukye kararu mbee ya Nndumi Iruva wafo, yoo ashemooraa, muvike sukukuu ya mikate ilatiri ntarang'u na sikukuu ya mfungare, na sukukuu ya matangilo nta valashe mbee ya Nndumi Iruva na maako aruu-fo.

¹⁷Wo nndu naniinngye shaasa wiidimi lwakwe lufye kiinani na mbora yeyo Nndumi Iruva, Iruva wafo akuniingye.

¹⁸Vika verumbwa myaandu na veesalallya va ngata toose, wo ando Nndumi Iruva wafo ashekuvikaa, wo ufyariny lwa vandu vafo, nawo varumbuye vandu kya usumanu.

¹⁹Kulaevete usumanu lwa nndu-fo, nta kulakundye nndu-fo, nta kulawarye kisurukumu, mashika kisurukumu mmbo kisurukumu miso a urango na ireveta usumanu lwa nndu.

²⁰Efyo fikee fya usumanu deny mfyo kushesoraa, naambo kukeeny kyaasha neewona ding'u urukeny yelo Nndumi Iruva wafo akuniingaa.

²¹Kulavaaye kiri kya mafwanu a Ashera[1] kyeeri kusongosyaa ando erasya Nndumi Iruva wafo-fo,

²²nta kulasaleese ngo ya ngata yeyo Nndumi Iruva wafo aisuuye-fo.