Read BIBILLYA Mareiyo Meele a Iruva NKUMBUYE WA UVAVASO 17 Bible Online

NKUMBUYE WA UVAVASO 17 - BIBILLYA Mareiyo Meele a Iruva bible

NKUMBUYE WA UVAVASO 17

¹Kulashishye Nndumi Iruva, Iruva wafo ng'umbe ao suva yitiri mfere-fo, mashike ekyo nkindo kitefusu kwa Nndumi Iruva, Iruva wafo.

²Na kwakooya efo kwany urukeny kulevikwa ni Nndumi Iruva, Iruva wafo kushelollyoo-fo nndu wa kyuumi ao wa kika, atanaa meesi mbee ya Nndumi Iruva, Iruva wafo.

³Kava mwiinndya maruva a wongo, ao nkyeere na mwiiri, a findo fya efo ngini-u,

⁴neewe kwavio, llyo kushekutakuraa iruuya kwakooya ni kindo kya dede, uravi lwa ngata yeyo lwatanwa kunu Israeli,

⁵llyo kushesomutaa nndu yeto efo poo ya muri, kava nndumi ao nka, nakapwa na mawe kutani afwa.

⁶Yeto mwiiwaawa nawaawa kyuukana na vakureekyi vavii ao vararu, nalawaawa kya ukureeki lwa nndu umwi-fo.

⁷Maako a vakureekyi yewo akae uwe yakwe, numa ave maako a vandu woose. Indo llyo uravi lusheutwaa kwany.

⁸Kwakooya kwaonisa mbony shiroo ikakwiilanya, ikwaani na nndu na mwanamaye na yaavana masaa, ao nndu aafinya ungyi, vakawaanyana, naasa yewe kwiipoo kweende mbee ya Nndumi Iruva wafo,

⁹kurereny na makohani na Valevi na mwiileta myaandu, kuvavese, nawo mmbo vashekooraa ando usumanu Lukai.

¹⁰Neewe llyo kutaniny shaasa vakoora, neewe kuve kutanaa indo.

¹¹Shaasa vakooraa uramba lweerummbwa myaandu na usumanu lwa vayo nta kulashaalashaa.

¹²Na nndu ara nalasora shaasa oorwa ni nkohani yeto mwiirunndya Nndumi Iruva, Iruva wafo, ao mwiirummbwa myaandu, nndu yeto ifwa nafwe, naambo uravi lumande kunu Israeli.

¹³Nkyo na vandu woose vashiita vaereye vare valaimmbwa indo.

¹⁴Elyi kusheangaa efo urukeny elo Nndumi Iruva, Iruva wafo akuniingaa, kukaefo, naasa kwambeny, Shikunndye ivika mangyi, sha vandu wa masanga engyi yoo aluringitye,

¹⁵lola kulare kulavika yeto Nndumi Iruva, Iruva wafo akooraa nawe mangyi, nawe nave umwi wa vandu vafo, nta nalave nndu muny-fo.

¹⁶Nta nalafumbute frasi takwe-fo, nta nalaviire vandu na Misri-fo, mashika Nndumi Iruva, Iruva mmbo aleamba, “Pookya ulaalu mulawuye na numa-fo.”

¹⁷Nta muloore vaka veengyi-fo mashika mmbo vashemufulutaa mirima yaany, nta mulatire waafu lwa fesa tany nta saabu.

¹⁸Na kyeeri mangyi ashevikwaa nkuti natire kyitabu kya mbony yeti, shaasa kitirwa m Vakohani na Valevi,

¹⁹nave mwiikuloshafo kyeeri kyoose akee na muu, nakuloshefo yiinndya Nndumi Iruva wakwe, eesoraa marero moose a mavavaso yaa.

²⁰Nalasheona ikurosa mbee ya vandu vengyi neemina mavavaso, llyo asheonaa suku shiingyi efo umangyiny lwakwe we na vana vakwe kunu Israeli.