Read BIBILLYA Mareiyo Meele a Iruva NKUMBUYE WA UVAVASO 20 Bible Online

NKUMBUYE WA UVAVASO 20 - BIBILLYA Mareiyo Meele a Iruva bible

NKUMBUYE WA UVAVASO 20

¹Kyeeri kwakupoo yeenda fireny, neewe kwalollya frasi na mitika na vandu veengyi ngota yeni, lola kulavaereye-fo, kimmba elyi Nndumi Iruva, Iruva wafo akee neewe, yeto alekusaamisa akuuta kulya Misri,

²neelyi mwiifo muserikyaa ikapana na vakiduva vany nkohani nasongwe yoo mbee narere na vandu

³nevavia, Yeni Vaisraeli mukeepooka ulaalu ikapana na vakiduva veru, aranyiny, loleny mulaawukwa nta yiiryaa nta irerema kimaruma kyawo-fo,

⁴mashika ni Nndumi Iruva waany, ariani neeni nandemukapannya na vakiduva vany, naambo namwaauwe.

⁵Na vashilyi vany varere na vandu, vavavie, A ni vi yeto atannyi mmba shiiya nare nalaiterevya Iruva nayaangeeny? Nawuye na numa naambo nalandefiiya firen, na mmba yakwe iipowa ni nndu ungyi.

⁶“Ao ni vi atiri nnda wa misabibu are nalalya nndunda ta vayo? Nawuye na kyeny nalandefiiya fireny, na ndunda yeto tilyiwa ni nndu ungyi.”

⁷Ao ndesa ni vi afinngye nka nalandemwaalyike narefo fira naambo nalandeefiya-fo na nka yeto naipowa ni nndu ungyi?

⁸Vashilyi varere na vandu vavavese kwakooya kwiiyo nndu atirwa mbweerei na irovyo nriminy, nakuwuiye na kyeny naambo nalasheerese vandu vengyi vave sha we muni.

⁹Neelyi vashilyi vamaa irera na vandu llyo vavikeny veetetera vaskari.

¹⁰Naasa kyeeri kufikaa kufii na muri indekapana nato, onisa unyanga lwa ufoo.

¹¹Na kyeeri vakurouwaa na ufoo neekuruya ngiri ya muri, llyo vandu woose va efo muriny vashekurunndyaa mashora a ushinga.

¹²Lyo valankunda ufoo, vakasauwa ikapana llyo kuwoyeny muri yeto.

¹³Na kyeeri Nndumi Iruva wafo ashe uvikaa maakony afo, vyaa wo nndu Nndumi eefo noosu,

¹⁴lyo wo vaka na vana nafindo fyeevikya na findo efo muriny koose na masaa engyi, fiipoo five mifungwa ao uraa, nafyo five mfyo shoonga yafo Nndumi Iruva akuniinga.

¹⁵Na miri ingyi myoose niindo da kusheitannyaa, yeyo ilakee ya kishomu kya yeva.

¹⁶Lyo miri ya vandu yeva Nndumi Iruva wafo akuniinga vave ding'u yafo, kulavefo nta kindo kimwi kikee na muu-fo.

¹⁷Mmbo kurumataa Valuti, na Vaamori, na Vakanaani na Vaperizi, Vahifi na Vayebusi indo shaasa Nndumi Iruva wafo alekuvavasya,

¹⁸naambo valasheelosha vandu vafo uravi shaasa vakeendya maruva a wongo, nalyo neerenngya Nndumi Iruva weeru.

¹⁹Na kyeeri kusheringitya muri kuukape fira ando a mikonu miingyi, lola kulamanye-fo miri na fyaara mashika ndunda ta vayo nteelya, mashika nri nshi nkiduva-fo.

²⁰Lyo miri yeyo ilatiri mbasho yo imanye, kuute-fo firi fyeeringitya muri noovare.