Read BIBILLYA Mareiyo Meele a Iruva NKUMBUYE WA UVAVASO 23 Bible Online

NKUMBUYE WA UVAVASO 23 - BIBILLYA Mareiyo Meele a Iruva bible

NKUMBUYE WA UVAVASO 23

¹Nndu akee nkape ndafu ao arumbukye kimaama nalasasange na isasanga lya vandu va Nndumi Iruva-fo.

²Mwana nalatiri ndeye nawe nta nalasange na vandu va Nndumi Iruva-fo, kufike irika lya ikumi nalasange na vandu va Nndumi Iruva-fo.

³Mwamoni na Mmoabi valasange na vandu va Nndumi Iruva-fo na kukafika irika lya ikumi, na fika llung'anu,

⁴mashika kyeeri muleuka Misri mmbalemuwarya vamuniinge shoonga ao mura-fo mmbo valevika Balaamu mwana wa Beori wa Bethori ya Mesopotamia naambo nashemulyisya mboo.

⁵Llyo Nndumi Iruva wafo alelema yaarannya Balaamu, nawe Kaalasha mboo ikava mbora kwafo, kimmba Nndumi Iruva wafo akukunndye.

⁶Kularuuye ufoo nawo, nta kulakunde iveekya-fo, na kukafika indii.

⁷Mwedomu we kulansue-fo, mashika mmwanamau, nta Mmisri kulansue-fo, kimmba kweekee muny urukeny lwakwe.

⁸Vana vawo fika irika lya kararu vasange na vandu va Nndumi Iruva.

⁹Kyeeri kushekupoo indekapana na vakiduva vafo, kwiise nnu na mbony shikasha,

¹⁰kwakooya nndu aorya yoorya lya vana vakoo nalaange neefo ulaleny-fo;

¹¹lyo nkwaany nakusangye na mwi ukammooloka naangeny neefo ulaleny,

¹²Efo ulaleny kukee na ando nndu asomukaa nang'u swany.

¹³Nkuti mutire ikumbi idu lyeesumya mando si;

¹⁴mashika Nndumi Iruva wafo nng'u akai neewe nakukire maakony a vakiduva vafo, nkyo yoo mukai ave ando esha, naambo Nndumi Iruva nalasheelollya kindo kilakwaani, nakure.

¹⁵Kwakooya ishinga lyarisha kwa nndumi wakwe lyikakusheya kulalyiviirefo-fo;

¹⁶nre nakae neewe kyeny kwafo yoo ashesauwaa yoo yeemeny lyafo kulallemye-fo.

¹⁷Kunu Israeli kulakee-fo nka isonga-fo, nta kulakaefo nndu nndumi nkape ndafu-fo.

¹⁸Nta findo fyooka uraviny yelo fileendwa kiraso kya kyaasa mmba ya Nndumi Iruva wafo-fo, mashika Nndumi Iruva wafo mmbo asuuye efi fyoose.

¹⁹Kulaakuye mwanamau kindo naambo nakuviirye na mbusha-fo, kyikava nfesa, ao shoonga ao ya kindo kingyi kyoose ekyo kivaa yaakuya.

²⁰Lyo muny kushiidimaa imwaakuya nakutae na mbusha ya vayo, na Nndumi Iruva wafo naidimi ikuvikya mbora findony fyafo efo nreminy wafo.

²¹Elyi kushevikyaa Nndumi Iruva wafo kyaasa, kulare kulakiinutya, mashika Nndumi Iruva wafo mmbo avereye kuiinutye, lyo kwanra kulainutya ni ulyamari kwafo.

²²Kyaindi kwanra kulevika kyaasa nkushetiraa ulyamari-fo.

²³Tira nnu ekyo kurerye kukyiinutye. Mashika elyi kulevika kyaasa ekyo ni kiraso kwa Nndumi Iruva wafo kwavika elyi kwarera.

²⁴Kweera ireminy lya mwanamau kulyiye-fo ndunda ta nsabibu kuwuure lyo kulakurike-fo.

²⁵Neelyi kukeeyiira efo nreminy ya nndu kutiri muumu weesisa fyaa kulye.