Read BIBILLYA Mareiyo Meele a Iruva NKUMBUYE WA UVAVASO 28 Bible Online

NKUMBUYE WA UVAVASO 28 - BIBILLYA Mareiyo Meele a Iruva bible

NKUMBUYE WA UVAVASO 28

¹Kwakooya kwaarannya unyanga lwa Nndumi Iruva, Iruva wafo na nrima umwi nsi, neesora mavavaso akwe yaa nkeekuvavasya inu, llyo Nndumi Iruva wafo ashekung'anisaa ngota masanga engyi moose a ulaniny;

²na mbora eti toose mmbo tikusoraa elyi kwaarannya unyanga lwa Nndumi Iruva, Iruva wafo.

³Mmbo kushevikyoo mbora efo muriny kwafo neefo mareminy afo.

⁴Ngyeeri tafo mmbo vashevikyoo mbora, na fimu fya uruka lwafo, na findo fyafo fyeevikya, ng'umbe na moonri afo.

⁵Na kikapu kyafo na kiiya kyafo kyeevika nswa.

⁶Mmbo kuvikyoo mbora kwiishangaa na kwiisomukaa.

⁷Nawe Nndumi Iruva, Iruva mmbo ashekyaa naambo vakiduva vafo vakapwa kwiilollye; mmbo vakusheyaa na shia imwi lyo varishe na shia mfungare.

⁸Na Nndumi Iruva, mmbo ashallwaa mbeshe tafo, titire shoonga kyeeri kyoose, na mashoreny afo moose na uruka elo Nndumi Iruva, Iruva wafo akuningaa.

⁹Neeni Nndumi Iruva ashekwaallwa isanga yeele shaasa alekulyiyya mboo, elyi kusheringaa mavavaso a Nndumi Iruva, Iruva wafo neelatya shia takwe.

¹⁰Na masanga moose mmbo vashekwereyaa kimaruma kya irina lya Nndumi Iruva.

¹¹Nndumi Iruva, mmbo ashekuniingaa ngoma yewe na vana vafo na findo fyafo fyeevikya, na findo fya uruka lwafo, efo urukeny yelo Nndumi Iruva, alevikya vande vafo kyaasa.

¹²Nndumi Iruva mmbo ashekuboromuyaa masaa efo iruveeu, kuwone mmbwa kyeeri kya vayo, navikye mbora mashora moose a maako afo, neewe kwiidimi yaakuya vengyi findo, lyo yewe kulashakua.

¹³Nndumi Iruva, ashekuvikaa nsongoru nta nshi wa numa-fo, neewe mmbo kusheroswaa uwe nta kulashoolokaa, kwakooya kwaarannya mavavasyo a Nndumi Iruva, Iruva wafo yaa nkeekuvia ulaalu, naambo kwaaringe,

¹⁴Mukanra mulamina marero yaa nkeemuvia inu nta yeevekya kunu ao kulya, ilatya maruva engyi.

¹⁵Lyo kwankooya kulore kwaarannya unyanga lwa Nndumi Iruva, Iruva wafo neetana shaasa mavavaso akwe akoora, llyo fidengo efi fyoose fishekusheyaa.

¹⁶Mmbo kushevaa ndenge efo muriny wafo kiwo neefo mareminy afo.

¹⁷Na kyikapu kyafo na kiiya kyafo kyevika nswa mmbo fishedengwaa.

¹⁸Na ngyeeri yafo kiwo, na uruka lwafo, ng'umbe tafo na moonri afo mmbo fishedengwaa.

¹⁹Kuveva nndenge kwishaangaa na kwiisomukaa.

²⁰Nndumi Iruva, mmbo akwengyee kidengo na nyinyira na isakirwa mashoreny a maako afo, llyo kurumakaa neereka uviny kyeendwa ni uravi lwafo.

²¹Na Nndumi Iruva mmbo ashekureeyaa ndwari shuumu kutani akuuta deny efo urukeny yelo alekuniinga.

²²Nawe Nndumi Iruva, mmbo ashekweenngye ndwari tishaambukyaa mabubu, homa, iwa mmbwa. Uraato wiingyi fishelyamaraa fimu fyafo. Ngapo eti mmbo tikaa neewe kutani kwafwa.

²³Ngina mmbo ishevaa sha minya kiwo na kunu si.

²⁴Nndumi Iruva ashealwaa mmbwa ya uruka ivake kiluulyi na nsanga ikurumate.

²⁵Kweenda fireny Nndumi Iruva, mmbo ashekwaallwa kukapwa m-mbakiduva vafo, kuvasore na shia imwi, lyo kurishe kwishiiraa shia mfungare, kunyanyake efo ngyumangyiny toose ta masangeny engyi ulaniny.

²⁶Na minying'a yaany mmbo ishelyiwaa nndeye na mafisi engyi-da, kulashekaa-fo nndu mwioombuta.

²⁷Nawe Nndumi Iruva mmbo ashekukapaa na moore alya a Misri, na woye kukusuve kuleefo yiimuya.

²⁸Nndumi Iruva nakweenngye ukwale, kuvefwa miso, na mirima yaany ive itondo

²⁹kweende kwiwara-waraa nsanyiny kuvake nndu mfu miso ireeminy, nta nkuvesyoo findony fyafo-fo, neewe kukapwa wo nkonu neekamarwa mifungwa nta kulaona nndu mwikweekya.

³⁰Kwafinga tindi mmbo kushesokwaa ni nndumi ungyi, kwatana mmba nkushekaafo-fo, kwavaaya misabibu nkushelyaa ndunda ta vayo-fo.

³¹Ng'umbe tafo mmbo tishishwaa mbengyi kwiilollye indi, kure kulalyany nyama, mmbo nndu ashaa nakusoke nshungu wafo nalakikuviiryaa-se, na moonri afo aniingyo vakiduva vafo, nta mwiikweekya nalaonikaa.

³²Vana vafo va kyuuni na va kika vaniingyo vandu va masanga engyi, nalyo miso afo arumike kwiilangaa ivalollyo, l'yo kulatiri kyeetana.

³³Ando amwi na ivina lyafo ndunda ta uruka lwafo mmbo tishelyiwaa mmbeny, mmbo vashekusisyaa neekufota.

³⁴Neefyo fyoose kushelollya mmbo fishekulyamaraa nrwe.

³⁵Nndumi Iruva mmbo ashekweenngyee moore, uka uvayo fika urony nang'u alavaa nta ivavara.

³⁶Nndumi Iruva mmbo ashekusamiraa yewe na mangyi yafo mweende urukeny weny, neefo murunndye maruva a wongo a firi na mawe.

³⁷Neewe mmbo kushevaa kindo kyeeseta, na wa uraawe na wa yiing'shwa mbee ya vandu va masanga efo Nndumi Iruva ashekuumbutyaa.

³⁸Mmbo kuvaayaa mbeu nkuka lyo kwiilule fyaangu kimmba fishelyiwaa ni nrye.

³⁹Mmbo kushevaayaa misabibu na yiiremmya nisha, lyo nkushelyaa ndunda ta vayo-fo, nta iyaya-fo, mmbo tilyiwaa mmakuru.

⁴⁰Kushekooyaa kutiri mikuu ya ndunda lyo kuture mafura a vayo, mashika mmbo ushaangaraa.

⁴¹Mmbo kusheiraa vana va kyuuni na va kyika lyo nkushevalollyaa vave vafo-fo kimmba vashekamarwaa ushengeny.

⁴²Miri myoose na fimu fyafo mmbo fishekaywa ni nrye.

⁴³Muny akee kwafo mmbo ashesaamaa uwe yafo, neewe kweengere yaanngwa.

⁴⁴We mmbo ashekwaakuya lyo yewe kulatiri kyeemwaakuya, we nave ni nrwe neewe kuve nkya.

⁴⁵Na fidengo efyo fyoose mmbo fishekusheyaa fikukaye, neekurumata, elyi kwara kulaarannya unyanga lwa Nndumi Iruva we Iruva wafo, neesora mavavaso akwe yaa.

⁴⁶Nang'u mmbo avaa sha wende kwafo na vana vafo llung'anu;

⁴⁷mashika elyi kushevaa kularunndya Nndumi Iruva wafo kwiitiri ifura na kyaanu kya findo efyo fyoose akulyimyi;

⁴⁸Kuve mwiirundya vakiduva vafo yewo Nndumi Iruva ashekurikyaa, kuwoni shaa, na nyura na yaanguyo mfyeeraa, kwaanguyo mfindo fyoose, kuve sheelyi kurye iryo lya minya efo singony kutani kwamamika.

⁴⁹Nawe Nndumi Iruva ashekurikya vandu wooka kwaasha vashe sha uviri nta kulamanyaa kishomu kyawo;

⁵⁰Nawo yewo mmbo vaeresye efo kisangu valasaryaa nta nndu ukuu nta ukoo.

⁵¹Nawo mmbo vashemaa ng'umbe tafo na findo fyafo fyeevikya fya uruka lwafo, nakumaa deny nalakureeyaa nta mbeu ta uruka lwafo, nta mfinyo nta mafura, nta ngashe ta ng'umbe nta moonri, nakumaa piny.

⁵²Nawe mmbo ashekuringityaa taari toose lla shaasa masimamba yafo irooye uwe ikaringityo kwaivika nsia, nayo isheolotwa-si taari toose uruka loose Nndumi Iruva wafo alekuniinga.

⁵³Neewe elyi kusheringitywa mmbakiduva vafo nayaatarwa mmbo kushelyaa vana vafo kumuni yewo Nndumi Iruva, wafo akuniingye.

⁵⁴Neeto akee nndu nsha efo kwany mmbo ashevaa uravi kwa vengyi, na kwa nka wakwe muni, na kwa vana vakwe yewo vasaayeny.

⁵⁵Nta nnyashekundaa vawone nyama yeyo ya vengyi akeelya-fo, mashika kishennyiyaa, kimaruma kya ishingillyo nnu mbakiduva.

⁵⁶Naakwa ni nka yeto asennyi deny kava mmamiri, nawe mmbo ashesuaa mmi wakwe muni na vana vakwe va kyuumi na va kyika.

⁵⁷Navesua na vayan kyeku vakwe na vana vakwe, navevalya kimaruma kya shaa shiroo na yaanguyo elyi asheshingilywa mmbakiduva.

⁵⁸Kwakooya kwara iringa mavavasyo yaa akeemareiye kyitabuny ekyi, kwiinndye ivina elyi lya itumbe lyeeresye lya Nndumi Iruva wafo.

⁵⁹Llyo Nndumi Iruva ashekufumbutyaa ngapo teerese, na kwa vana vafo, na ndwari shiroo tilashuukaa,

⁶⁰Nawe nashekuviirya ndwari tilya ta Misri kuteereiye, tikukaye.

⁶¹Na wo ndwari na wo ngapo filakeefireiye kunu Nndumi Iruva mmbo ashevekweengyee kutani kwasia deny,

⁶²Neeni mweevakye nyinyiri ta nginii-u mushesaan vaangu nnu elyi mwara mulaita unyanga lwa Nndumi Iruva wafo.

⁶³Na shaasa Nndumi Iruva eetirwa ni nsia kya wiingyi lwany neemutannya mesha niindo ashefuraa mwiisarummyaa, muutwan yoo urukeny yelo

⁶⁴Nndumi Iruva mmbo ashekunyanyataa masangeny, uka mbai yei fika mbai ilya, kuverunndya-fo maruva engyi kulaeeshi yewe nta vande vafo, mawe na firi.

⁶⁵Ntankushewonaa-fo ifura-fo nta nkushewonaa kiimuyo-fo, nafo Nndumi Iruva nashekuniinga irerema na yuuta pa.

⁶⁶Na muu wafo kyeeri kyoose uve wa usau na weerei kio na nsanyiny, nta nkushekaa-fo ivika nsia-fo.

⁶⁷Ngama mmbo kushaamba, “A nkyeema ulaalu ni nkwaany,” na nkwaany kwaambe, A nkyeema ulaalu ni ngama.

⁶⁸Nawe Nndumi Iruva mmbo ashekuviira-se na Misri na ngalava kwiishiraa shia ilya kulandeilollye. Neefo mmbo mushekukumbaa kwa vakiduva vany muve mashinga awo na fishinga fyawo, nta mmushelollyaa mwiimuwarya-fo.