Read BIBILLYA Mareiyo Meele a Iruva NKUMBUYE WA UVAVASO 30 Bible Online

NKUMBUYE WA UVAVASO 30 - BIBILLYA Mareiyo Meele a Iruva bible

NKUMBUYE WA UVAVASO 30

¹Naasa, kyeeri findo efi fishekusheyaa, shaasa inu shavika mbee yafo mbora na kidengo, neewe kushekummbwa efi fyoose efo Nndumi Iruva, Iruva wafo ashekukamaraa,

²neewe kushevuiya Nndumi Iruva, wafo shaasa nkeekuvia inu, yewe na vana vafo woose na iindya unyanga lwakwe kwa nrima wafo moose na ngoo yafo shoose,

³llyo Nndumi Iruva, Iruva wafo asherevetaa ushinga lwafo, nakulyillye, nakuumbe-se kuuke efo alekuumbutya masangeny engyi.

⁴Vandu wafo yewo vanyanyakye koose ulaniny, Nndumi Iruva, Iruva wafo mmbo ashevaviiraa navaummbye-se,

⁵namuviire neemwaata urukeny lulya lwa vande vafo, kushillye-fo, nawe nakutanyi mesha, nooke-fo nakufumbute ngota vande vafo elyo mbee.

⁶Nndumi Iruva, Iruva wafo mmbo ashealashaa nrima wafo na wa vana vafo mumwiindye, na ikunda Nndumi Iruva, Iruva wafo na nrima wafo moose na ngoo yafo shoose naambo kukee na muu.

⁷Na fidengo efi fyoose Nndumi Iruva, Iruva wafo mmbo ashefyeekennyaa vakiduva vafo yewo vakusuuye vakakusaveesa.

⁸Neewe mmbo kushaalashika kulatye unyanga lwa Nndumi Iruva, na mavavaso akwe moose shaasa nkeekuvavasya inu.

⁹Nawe Nndumi Iruva, Iruva wafo mmbo ashekulyimmyaa mbora shiingyi efo mashoren a maako afo na vaniny vafo, na efo ng'umbeny, na urukeny lwafo, mashika Nndumi Iruva mmbo ashefuraa neewe shaasa alesennyo ni vande vafo;

¹⁰lyo kwakooya kwaarannya unyanga lwa Nndumi Iruva wafo, elyi kwalatya mavavaso akwe shaasa akee kyitabuny ekyi, kulatye Nndumi Iruva, Iruva wafo na nrima wafo moose na ngoo yafo shoose.

¹¹Mashika mavavasyo yaa nkekuniinga inu nshi moomu-dwa kwafo, nta nshi sha kindo kya kwaasha-fo.

¹²Nshi a iruveeu, kwaambe, mmbi ashesaama iruveeu nandelweenngye-fo, nasheluvia lwiite neetana?

¹³Nta nnyakee kwakulya ya yeeve, kutani kwamba, A nivi asheruukaa yeeve, nalweenngye, nasheluvia, lwiite neetana?

¹⁴Lyo irero elyi mmbo lyikee yoo kukai deny, yoo kaniny kyafo na nriminy wafo, naambo kulatye.

¹⁵Lola-te, inu mmbo shavika makasha na mesha mbee yafo, shavevikau ufu na maravi.

¹⁶Nkyo shakuvavasya inu kukunde Nndumi Iruva, Iruva wafo kwiilatyaa shia takwe na mavavaso akwe, na usumanu lwakwe, naambo kukyie muu neefummbuka, naambo Nndumi Iruva, Iruva wafo nakurinkye mbora efo urukeny yelo kukeenda.

¹⁷Lyo kwakooya nrima wafo walyang'aa, kulakunde yaarannya, kweeveke mbai na yiinndya maruva engyi, na yaarunndya,

¹⁸mmbo nkeemuvia inu-se lyo mwanra muleeta mmbo musherumakaa, nta mmusheonaa muu mwaasha efo urukeny yelo lwa Yordan Nndumi Iruva, Iruva wafo ashekuniinga nakuvikye-fo mbora-fo.

¹⁹Swa iruveeu na ulana mmbo shamuvia inu, mmbo shavika mbee yaany muu na ufu, mbora na kidengo, naambo kusauweny muu kukae na muu yewe na vana vafo;

²⁰kukunde Nndumi Iruva, Iruva wafo, kwiinndye unyanga lwakwe, neewarana nawe, neeto nto muu wafo, na muu mwaasha, kukae kyaasha urukeny yelo kuleniingwa ni Nndumi Iruva, Iruva wafo shaasa alevikya vande vafo kyaasa, wo Abrahamu na Isaki na Yakobo sheelyi ashevaniingaa.