Read BIBILLYA Mareiyo Meele a Iruva NKUMBUYE WA UVAVASO 32 Bible Online

NKUMBUYE WA UVAVASO 32 - BIBILLYA Mareiyo Meele a Iruva bible

NKUMBUYE WA UVAVASO 32

¹Yeni va efo iruveeu shaarannyiny shiireraa. Neeni va kunu ulaniny aranyiny marero akwa.

²Marero akwa aoloke sha mmbwa, Nang'u ashoshoke sha laura sha uraranya efo mareny sha marony a mmbwa efo moorony

³Mashika mmbo nshevambisaa Irina lya Nndumi Iruva; Shaambe uniini kwa Iruva weeru!

⁴Nndumi Iruva ni mbanga, mashora akwe ni mesha nnu, Shia takwe toose ni ta usumanu Ni Iruva nsaari nalatiri ulembi, We ni usumanu na woorotu.

⁵Mmbo valetana findo fya utefusu Mmbavaa vandu-fo, llo uravi lwawo Wo irika yeesi, lyeevekye deny

⁶A ekyo nkyo mutaa nakyo Nndumi Iruva Yeni varung'ani na matondo? A ndesa yeto nshi nde wafo alekuura Mmbwe alekuumba neekuvangisa

⁷Nkyekummbwa Kusare kya marika yoo na myaaka Nkyevesa ndoo, nawe ashekuviaa Vesa vamiku vafo nawo vakurouwaa,

⁸Yeto akee uwe ya fyoose llya aleniinga vandu ding'u Kaava vandu va masanga Kavavikya minyanu yaawo, Shaasa ngyufyari ta vana va Israeli tikai

⁹Mashika vandu mmbo waavi lwa Nndumi Iruva Yakobo mmbo alesauwa va ufyari lwakwe.

¹⁰Mmbo alenkooya urukeny wuumu Neefo kasa koomu keerese Mmbo alellyingillya kammbavara Kanringa sheelyi aringaa iriso

¹¹Kavaka ngoru iloshaa fitoro fya-vayo irumbuka, kafiipoo na usaari yefo maruny a vayo, ni indo Nndumi aringa vana va Israeli valawe.

¹²Ni Nndumi Iruva muni alentetera Nta nkweiyo iruva lyingi ando amwi nawe-fo.

¹³Mmbo alensaamisa ando a uwe Nawe kalya fimu fya mareminy Kavaniinga ukyi wa mbangeny Na mafura aleuka efo iweny yuumu

¹⁴Mafura a ivee na malela a moonri Ando amwi na mafura a suva Na ndafu ta Bashani na mburu Na uredi lwa ngano isennyi Kwana mfinyo nsha uvakye usao.

¹⁵Lyo vandu va Nndumi Iruva veekyiinina vakammina Llya valesennya neewuura nisha Vakaraany Iruva yeto alevavika-u Vakamina mbanga ya ukiro Lwawo.

¹⁶Vakamweengye unyafi kyeenndwa mmaruva engyi Uravi lwawo lukamweengye unyafi

¹⁷Firaso fyawo vakaniingya uraato, valafiniingye Iruva, Kwa maruva engyi ilesha mikonu yei-da Nta vande vany mmbeeyeereiye-fo

¹⁸Mmukikumbuye Nndumi Iruva mbanga alemukira-fo Mmbo kulerekyo Iruva mwiikwiira.

¹⁹Elyi Nndumi Iruva alelola kasukyo niwo Mashika elyi vana vakwe valemweenngye unyafi

²⁰Lyo aleamba, Mmbo shivasurumaa kisangu kyakwa Shilole efo vashefurummyaa nafo, Mashika elyi ni irika yeesi Ni vana valatiri yiirikyo

²¹Mmbo valesheenngye unyafi na maruva a wongo shatirwa nkififi kya maruva yoo Neeny mmbo nsheveenngyee kififi na findo filakee vandu Vaonise unyafi veengyo ni vandu matondo

²²Mashika unyafi lwakwa lwammaata muro Nato ukeaka fika kwa vafu Ulye ulana na fimu fya vayo Ukore mafumbu fika efo si uvasheny lwa vayo

²³Mmbo nshevafumbutyaa fivavisaa Shivaase na mife yakwa myoose

²⁴Vaniiye kyeendwa nshaa, muro uvaakye valyamarwa deny shivevarikya mafisi manyaasi avalye Ando amwi na makuru makasha avamaare

²⁵Efo poo mfira neefo mmba kweerese filyamare vana va kyuumi na va kyika Fivana fidu na vandu vakuu

²⁶Neeny mmbo shileamba mmbo nshevanyanyatyaa kwaasha shivaute deny yaa ulaniny

²⁷Lyo nshilekunda ireeya vakiduva vakusare fya wongo-fo Valasheekusara mmbo valetana indo vaambe vai nshi Nndumi Iruva alevakapa

²⁸Mashika yeva ni vandu valavaa irerya Nta mmbatiri urango usha-fo

²⁹Kyeevaa kyeni kwe veetiri urango, vamanyi mmbony yeti, Na kundo vashefurummyaa ifika.

³⁰Niinda nndu ashindimaa yuumbuta vandu kyiku Na vandu vavii vaumbute fiku ikumi Nndumi Iruva waawo mmbo alemmbaka we Nndumi Iruva mmbo alemmbaraa?

³¹Mashika iruva waawo nshi sha Nndumi Iruva weeru-fo, Naakwa ni vakiduva veru veeshi ekyo,

³²Na misabibu yaawo mmbo ivakye Sodoma na Gomora Ndunda ta vayo mmbo tivavaa

³³Na mfinyo wa vayo mmbo uvakye uroo ukasha lwa shoka

³⁴A yefi nshi shilesurummyo yeny shilollye shapu?

³⁵Kiduva nkyakwa yeny, ni yeny shitaa Kyeeri yeny nsherendeyaa Mashika kiiyo kyawo kikee kufii, Neefyo fikaa fivawoye firye shia uviny

³⁶Mashika Nndumi Iruva asheetaa vandu vakwe Nalyillye mashinga akwe Kyeeri ekyo alollya finya tawo tammeeleleka Neelyi valollyaa nkwasaau nndu nalakeemfinge

³⁷Llyo we naambe, A maruva awo akee kwi? Mwiikira ulya veemmbikye nsia?

³⁸Ulya alewarya firaso fyawo fya mafura na mfinyo kana? Nakwiipony namweekye, vave llo umangyi lwany.

³⁹Manyiny-te ulaalu, yeny mmbwe, yee, yeny Nta kulaifo Iruva kuuta yeny; Yeny shitiri finya yeewaa na yeeruta Mmbo shavika fyaasha, shooka-fo shashiisa. Nta nkwiifo edima itafura kindo wokony lwakwa-fo.

⁴⁰Mmbo shaipoo woko lwakwa shikee iruveeu Shaamba, Dede yeny ni wa Llung'anu.

⁴¹Kyeeri shannwa usu lwakwa lwa muro Shalutira na woko mmbo shataiya vakiduva yewo vashisuuye

⁴²Na mife yakwa iwuure samu, na usu lwakwa lulye nyama. Ando amwi na samu ya yewo valewaawa fireny neekamarwa mifungwa veeriwa ni vakiduva.

⁴³Fureny yeni vandu va masanga, Mashika mmbo ashetaiyaa kiduva kya samu ya mashinga akwe Eetaiyaa vakiduva Vave kiraso kya uruka na vandu vakwe.

⁴⁴Mose kasha neerera marero yoo moose a kyiimbo ekyi vandu woose vakeeta, na Yosua mwana wa Nuni.

⁴⁵Kyeeri Mose alemarisya irera marero yaa moose kwa Israeli,

⁴⁶kavavia, Vikeny marero yaa nkemuvia efo miriminy yaany muvavasye vana vany vaaringe moose.

⁴⁷Mashika uvavaso elu nshikindo kyeelema-fo, nkyo kishemweengeryaa myaaka efo urukeny yelo mukeenda kwakulya ya Yordan.

⁴⁸Naasa Nndumi Iruva karera na Mose nkonu yeto mweni kammbia,

⁴⁹Osho saama ifumbuny yelyi lya Abarimu alya urorony lwa Nebo, yoo urukeny lwa Moabu kufii na Yeriko kulole uruka lwa Kanaani nkeniinga vana va Israeli luve lwawo,

⁵⁰yewe kufiiye efo ifumbuu, kusange na vakuu vafo vafiiye, na shaasa Aron alefiyya kulya Hori, nawe kavesanga na vandu vakwe,

⁵¹Mmashika elyi muleshilyamarya na vana va Israeli alya mureny wa Meriba kulya Kadeshi urukeny kasa-ka Sini, ni elyi kulore muleshiinndya mbee ya Israeli.

⁵²Mmbo kukabaa miso urukeny yelo nsheningaa vana va Israeli lyo yewe nkushaangaa urukeny yelo-fo.