Read BIBILLYA Mareiyo Meele a Iruva NKUMBUYE WA UVAVASO 34 Bible Online

NKUMBUYE WA UVAVASO 34 - BIBILLYA Mareiyo Meele a Iruva bible

NKUMBUYE WA UVAVASO 34

¹Naasa Mose kasaama ooka imungony lya Moabu karooya ifumbuny lya Nebo, kasaama urorony lwa Pisga taari ya Yeriko. Nndumi Iruva kamoora uruka loose lwa Gileadi kufika Dani,

²na lwa Naftali loose, na uruka lwa Naftali na Manase, na uruka lwa Yuda, kundefika yeeveny taari ya nkwaany;

³na Negebu na imungo lya Yeriko, mmuri wa myaangashi, fika Soari.

⁴Naasa Nndumi Iruva kavia Mose, Lola, yelu llo uruka llwa shileniinga Abrahamu na Isaki na Yakobo, llya shilemmbia, Uruka yelu mmbo nsheningaa ufyari lwafo. Kyasia ulaalu mmbo shakoora kululole na miso, lyo nkushefikaa-fo-fo.

⁵Naasa Mose nndundi wa Nndumi Iruva kafiiya-fo, mfo urukeny lwa Moabu, shaasa Nndumi Iruva alemmbia.

⁶Nawe Nndumi Iruva kandika, efo Moabu, kasaama na Bet-peori, lyo nkwiifo nndu eeshi kifu kyakwe-fo

⁷Nawe Mose mmbo etiri myaaka iyana na makumi avii kyeeri alefwa, lyo miso akwe nnyalefwa-fo, nta mwiili wakwe uve mfwafwa-fo.

⁸Vana va Israeli vakakapa kiiyo ando a mikonu makumi araru alya imungony lya Moabu, vakakupoo rembo.

⁹Nawe Yosua wa Nuni katira nrima wa urango mashika Mose mmbo alemweekerya maako akwe, nawo vana va Israeli vakamwirikya neetana shaasa Nndumi Iruva, alevavasya Mose.

¹⁰Nta kunu Israeli koose nkulekupoo-fo nkisuku avakye Mose-fo, mashika we Nndumi Iruva mmbo alerera nawe eellollye kisangu.

¹¹Findo fyoose na ngyende toose yeto Nndumi Iruva, alemoora natani kulya Misri kwa mangyi Farao na vandu vakwe, na uruka lwakwe loose.

¹²Koora woko lwakwe lwa finya, na wiidimi uniini aleidimisya Mose itana na vana va Israeli woose vakalollya.