Read BIBILLYA Mareiyo Meele a Iruva NKUMBUYE WA UVAVASO 4 Bible Online

NKUMBUYE WA UVAVASO 4 - BIBILLYA Mareiyo Meele a Iruva bible

NKUMBUYE WA UVAVASO 4

¹Naasa Mose kavia vana va Israeli, Naasan Israeli, arannya nisha mavavaso yaa nkeemulosha ulaalu, naambo muringe, mukeeu kutani mwaanga urukeny yelo Nndumi Iruva akeemuniinga.

²Mulengere nta mulaute-u irero elyi nkeemuvia-fo, tireny mavavaso a Nndumi Iruva, Iruva waany.

³Mulelollya kindo Nndumi Iruva aletannya Baal-peori, mashika valya woose veekusirye iruva elyo Nndumi Iruva, Iruva waany mmbo alevamamita.

⁴Lyo yeni mulekusirya Nndumi Iruva, waany mukakaa-u fika inu.

⁵Mulollye shaasa shilemulosha mavavaso na wiikimbi shaasa Nndumi Iruva, wakwa aleshoora, naambo mushekaa indo efo urukeny yelo mukeevingya.

⁶Kyasia ringeny mavavaso yoo, mashika yelu llo urango usha, naambo naakwa ni elyi vandu va masanga engyi vashiitaa vaambe, “Ni dede yeva ni vandu varaiye urango.”

⁷A ndesa mmbo kwiifo isanga-lya vandu veengyi, lyitiri iruva akee kufii nawo, shaasa Nndumi Iruva, Iruva weeru akee neese wo kyeeri lukemmbaanga?

⁸Ao mmbo kwiifo isanga-ki lya vandu lyitiri mavavaso a usumanu sha yaa eru nkemoora inu?

⁹Lyo lola kukwiise nnu, kuringe nrima wafo kulasheerekyo filya kulelollya na miso afo kumuni, nta filasheuka muuny wafo, mmbo kusheongoyaa neelosha vana vafo na vana vawo:

¹⁰Kuuka nkonu ulya kulesalala mbee ya Nndumi Iruva alya ifumbuny lya Horebu, llya Nndumi Iruva aleshivia. Umbyeny vandu yeva naambo shivavie marero akwa, naambo vakuloshe ishiindya yeny kyeeri kyoose kya muu wawo yaa ulaniny nawo valoshe vana vawo indo.

¹¹Mukaserikya na alya ifumbuny lyilya, ifumbu lyilya lyikaaka muro nniini kufii ufike iruveeu na nsu wa vayo ukang'ana ukavika ireema iniini.

¹²Nndumi Iruva karera neeni mukeeta unyanga weni lwiishuukaa kulya murony lyo mulalollye nndu.

¹³Mose kavaongoya yekyo kya kyaasa kilya aleva-vavasya vakiringe, ng'u mavavaso alya ikumi alereiyo maboony alya avii a mawe.

¹⁴Nndumi Iruva kashivavasya shimuloshe mavavaso yoo naambo munderinga elyi mushaangaa efo urukeeny yelo mukendetira.

¹⁵Lyo mukwiise nnu, mashika mmulelollya nta nndu nkonu yeto Nndumi Iruva akeerera neeni kuuka kulya muron-fo.

¹⁶Nakyo mmbo kileva indo naambo mulasheelyamarika musongosye ifwanu lya vayo, lya kyuumi ao lya kyika,

¹⁷ao ifwanu lya kindo kyoose kya yaa ulaniny ao lya ndeye irumbukaa nginin,

¹⁸ao nta ifwanu lya kindo kyoose kifurukaa si ao lya ikunga lya mureny.

¹⁹Na lyingise nta kulasheelola nkyeere ao mwiiri ao nyinyiri ng'u matorito a efo iruveeu kufilange neefiindya ao ifirunndya, nafyo ni Nndumi Iruva, we Iruva wafo aleniinga vandu va masanga moose yaa ulaniny.

²⁰Kimmba yeni Nndumi Iruva mmbo alemwiipoo kamuuta nunguny ya minya, kulya Misri, musheva vandu vakwe shaasa mukai inu.

²¹Na Nndumi Iruva kasua neeny kimaruma kyany, kalya mboo shilasheekyilya Yordan nta yaanga urukeny yelo usha Nndumi Iruva weeru alemuniinga luve lwany.

²²Neeny mmbo nkefiiya kunu kimmba shilatiri mumu weeruuka Yordan, lyo yeni ndee muruukaa needetira uruka yelo usha.

²³Kyasia kwiiseny muveni mulasheefisha kyaasa ekyo kya Nndumi Iruva, Iruva waany, alevika neeni. Mulavike ifwanu lyeebasha, lyivakye kindo kyoose Nndumi Iruva, Iruva waany alemuvavasa,

²⁴Mashika Nndumi Iruva, Iruva waany, mmbo avakye muro ukoraa, nalasisiryaa uravi.

²⁵Kyeeri mushekaa urukeny yelo kyaasha, mutirye-fo vana na vashuku, mulyamarike neepasha mafwanu a kindo kyoose nang'u nalasenyi Nndumi Iruva, Iruva waany, munrosye unyafi;

²⁶mmbo shamulyiiya mboo ya iruveeu na ulana inu, mmbo mushemanyaa llyo efo urukeny yelo kwakulya ya Yordan, myaaka yaany mmbo ishefiiswaa murumatwa deny.

²⁷Nawe Nndumi Iruva mmbo ashemunyanyatyaa efo masangeny engyi musaany vandu vaangu, muvekaa kwaasha na Nndumi Iruva.

²⁸Neefo mfo mushevaa veerunndya maruva engyi akee mmashora a maako a vandu, mmiri na mawe, fikee findo filatiri muu, nta filalollye nta yiita, nta mfilyeefo nta itana kindo-fo.

²⁹Lyo yefo kwakooya mwarannya Nndumi Iruva, Iruva waany, mmbo mushellolyaa kunduuye na nrima wafo moose na ngoo yafo shoose.

³⁰Na kwakooya kwatirwa nnyinyira kyeendwa mfindo five, wuiya Nndumi Iruva, Iruva wafo, kwaarannye ekyo akuviaa;

³¹Kimmba Nndumi Iruva, Iruva wafo akee muni isarya, nnarengaafo, nta nnyakukapaa-fo, ni elyi nalarekyoo kyaasa kilya alevikya vakuu vany evalyiyaa mboo.

³²Ulaalu nkyeruuya na ivesa, uka elyo Iruva aleumba vandu na ulana yelu loose, Kwakooya kilembutika-fo kindo king'ani sha ekyi.

³³A-kulenkaafo vandu valemmiita unyanga lwa Iruva lwiishukaa murony shaasa yeni muleita vakakyia?

³⁴Ao ni indii lyingyi Iruva alemeenda yuuta vandu urukeny lwa vandu vengyi eveesaa neewoora ngyende shiingyi na fira, kutani awoora findo fisheresee na woko lwa finya lweeresye nnu shaasa Nndumi Iruva, Iruva weeru alemutana yeni kulya Misri mwiilollye indi?

³⁵Yewe mmbo kuleorwa efi fyoose naambo kukooye imanya sheelyi Nndumi Iruva mmbwe Iruva kulaifo ungyi kuuta we muni-nsi.

³⁶Unyanga lwakwe mmbo lulekufikya luuka iruveeu, naambo nakuloshe, na yaa urukeny kakoora muro wakwe na marero akwe auka efo murony.

³⁷Na kimmba alekunda vande valya vany kakunda isauwa vana vawo va numa, kamuuta kulya Misri kakaa neeni na finya na wiidimi uniini;

³⁸naambo nakweekye yuumbuta vandu vengyi veengyi mbee yafo, nawo veetiri finya ngota yewe, nashekweende urukeny usha luve ding'u yafo, shaasa kikai inu.

³⁹Nkyo inu kummbwa neevika nriminy deny, sheelyi Nndumi Iruva mmbwe Iruva kulya iruveeu na kunu urukeny si, nta nkwiifo ungyi-fo.

⁴⁰Naasan kutire neelatya mavavaso akwe, shaasa nkeekuvia inu, naambo kuwoni mbora, yewe na vana vafo, neewe llyo kushewonaa suku shiingyi urukeny lulya Nndumi Iruva, Iruva wafo akuniinga luve lwafo llung'anu.

⁴¹Naasa llyo Mose kasauwa miri iraru taari ya ngama ya Yordan

⁴²ive kundo kweerishya kyeeri nndu awaa ungyi kikee kya nrenga nalansuuye, nandekusuruma fo.

⁴³Miri yeyo ni Beseri kwa ufyari lwa Varuben, nato wekee imungony, na Rano wa Gileadi kwa ufyari lwa Vagadi, na Golani ya Bashani kwa Vamanase.

⁴⁴Na mavavasyo Mose aleniingya vana va Israeli nng'u yaa,

⁴⁵yelu llo ukureekyi, na uvavaso, na usumanu, shaasa Mose alevia vana va Israeli llya valeuka Misri,

⁴⁶vekee alya mbai ya Yordan alya kyaandeeny kya Bet-peori kikee urukeny lwa mangyi Sihon wa Vaamori mmbwe ekee Heshboni kakapwa Mmose na vana va Israeli kyeeri vemmbuka Misri.

⁴⁷Vakatira uruka lwakwe lukava Lwawo, na uruka lwa mangyi Ogu wa Bashani, yewo mmbo vamangyi vavii va Vaamori vekee kwakulya ya Yordan taari ya ngama;

⁴⁸Uruka yelu mmbo lwepookye Aroeri yoo imungo lya Arnoni lyimandi kundekooya nnyanu wa ifumbu lya Sioni (llyo Hermoni.)

⁴⁹Na Araba shoose ukee taari ya ngama ya Yordan kundefika yeeve lya Araba kulesoka na ifumbu lya Pisga.