Read BIBILLYA Mareiyo Meele a Iruva NKUMBUYE WA UVAVASO 5 Bible Online

NKUMBUYE WA UVAVASO 5 - BIBILLYA Mareiyo Meele a Iruva bible

NKUMBUYE WA UVAVASO 5

¹Naasa Mose kavaanga Vaisraeli woose kavavia, Nyira Vaisraeli, aranyiny mavavasyo moose na ufundo elu nkemuningya inu na ambo mukuloshe neelatya.

²Nndumi Iruva weeru mmbo alevika kyaasa neese alya ifumbuny lya Horebu.

³Nndumi Iruva nnyalevika kyaasa ekyi na vande veru-fo, mmbo alevika neese luveni, yese luiyoo na muu ulaalu.

⁴Nndumi Iruva mmbo alerera kisangu kwa kisangu alya ifumbuny,

⁵ekee yoo mnang'ani kavii, Nndumi Iruva kunu neeni kunu naambo mulollye irero lya Nndumi Iruva, kimmba muleereswa mmuro ulya, nta mmulerwa na ifumbuu-fo, llyo Nndumi Iruva aleamba,

⁶Yeny mmbo shikee Nndumi Iruva, Iruva wafo, shilekwaauwa kulya Misri mmba ya ushinga.

⁷Kulainndye maruva engyi kuuta yeny-fo.

⁸Kulavike ifwanu lyeepasha lya kindo kyoose kikee iruveeu ao kunu ulaniny, ao kya efo si mureny.

⁹Kulafiinndye nta ifirunndya-fo, mashika niyeny Nndumi Iruva, Iruva wafo, nnyen Iruva shilasisiryaa elyi mwatira iruva ungyi, neeny mmbo nshetaiyaa vana ulyamari lwa vande vawo shitani shafika irika lya kararu na lya kaana lya valya vashisuuye,

¹⁰neeny mmbo shalyillya fiku ka fiku fya yewo vashikunndye vakavallya na mavavaso akwe.

¹¹Kulasende kikee kya mwaalu, irina lya Nndumi Iruva, wafo mashika Nndumi Iruva mmbo ashekapaa yeto asendaa irina lyakwe kyikee kya mwaalu.

¹²Inndya nkonu wa Iruva kuuvike mweele, shaasa Nndumi Iruva, Iruva wafo akuvavasya.

¹³Runda mashora ando a mikonu irindaru kwiinutye findo fyafo fyoose;

¹⁴lyo nkonu wa mfungare ni nkonu wa Nndumi Iruva, Iruva wafo, nkonu yeu kularunde nta ishora lyimwi-fo, yewe nta mwana wafo-fo, nta ishinga lyofo, nta kishinga, nta ng'umbe yafo, nta nshungu wafo, nta kindo kingyi, nta muny akee efo kyeny kwafo, naambo ishinga lyafo na kishinga kyafo veemuye kimwi sha yewe.

¹⁵Nawe nkuti kukummbwe sheelyi mmbo kwekee ushingen kulya Misri, nawe Nndumi Iruva wafo kashekwaauwa-fo na woko lwa finya, llo woko lurundaa ishora, naasany nkyo Nndumi Iruva, Iruva wafo kakuvavasya kwiinndye nkonu wa Nndumi Iruva.

¹⁶Inndya ndoo na mau wafo, shaasa Nndumi Iruva, Iruva wafo akuvavasya naambo myaaka yafo ifumbuke, neewe kukooye ivesyo yaa urukeny kukeembike ni Nndumi Iruva, Iruva wafo.

²⁰Kulavikye uroo ukureekyi lwa wongo

²¹Kulalange nka wa nndu ungyi, nta kulalange mmba yakwe, nta irema lyakwe, nta ishinga lyakwe, nta kishinga kyakwe, nta ng'umbe yakwe, nta nshungu wakwe, nta kindo kingyi kyoose atiri na kikava-kyi.

²²Yaa nng'u marero Nndumi Iruva alevia ironda lyany lyoose naunyanga uniini alya ifumbuny kuuka efo murony na ifishiny na ireeminy, naasa kamanda. Kareiya marero yoo maboony avii a mawe kashiniingya.

²³Neeni kyeeri muleeta unyanga lwakwe luuka kulya ituuny lyilya, nalyo llyo ifumbu elyo lyekeeyaaka muro, naasa mukashisheya, yeny, vandu vany va nrwe woose na vamiku vany,

²⁴mukaamba, Lola-te akakau Nndumi Iruva, Iruva weeru alloora itumbe lyakwe, na uniini lwakwe, neese lukaita unyanga lwakwe lwiishuukaa neefo murony, neenu Lukamanya dede sheelyi Iruva areraa na nndu, nawe kakaa na muu.

²⁵A lwafiiya-kyi? Mashika muro yeu ung'ani indi mmbo ushiidimaa ilumamita deny, kwakooya lweeta lyingyi unyanga lwa Nndumi Iruva weeru mmbo lusiaa.

²⁶Mashika nnang'ani ya woose vatiri muu ni vi alemmiita unyanga lwa Iruva aiyo na muu “ni vi alemmiita unyanga lwa Iruva aiyo na muu” eerera efo murony shaasa yese luleita kara nalafwa?

²⁷Serikya yewe yoo kufii, kwaarannye fyoose efyo Nndumi Iruva, Iruva weeru akeeyaamba, kusheluvia yese yefyo fyoose Nndumi Iruva, Iruva weeru, aamba neese mmbo lushiitaa neetana.

²⁸Nawe Nndumi Iruva keeta fyoose shaasa mwekeeshivia, Nndumi Iruva kashivia, Mmmbo shammiita marero moose yoo vandu yeva vakuvia, nawo mmbo varera nisha.

²⁹Ankyema veshidimaa itira nrima wa ngata yeyo kyeeri kyoose, vashiinndye, neelumba mavavaso akwa kyeeri kyoose, nawo mmbo veevikyoo mbora wo na vana vawo llung'anu!

³⁰Enda kwavavia vakuwuiye na kulya meemeny awo.

³¹Kyeendi yewe salala yaa kufii neeny, neeny shirere neewe findo fyoose, na mavavasyo na usumanu, yefyo kushevaloshaa veedimi itana indo efo urukeny yelo nshevaniinga luve lwawo.

³²Kyasiany, loleny mutani shaasa Nndumi Iruva, Iruva waany alemuvavasya, muleende mbai nta kinnywa-fo.

³³Soreny shia yeyo sheni Nndumi Iruva, Iruva waany alemuvavasya, naambo mukie muu, neevikyo mbora, na suku tany tifumbuke kulya urukeny yelo musheluwaryaa luve lwany.