Read BIBILLYA Mareiyo Meele a Iruva NKUMBUYE WA UVAVASO 6 Bible Online

NKUMBUYE WA UVAVASO 6 - BIBILLYA Mareiyo Meele a Iruva bible

NKUMBUYE WA UVAVASO 6

¹Yaa nng'u mavavasyo na usumanu loose shaasa Nndumi Iruva, Iruva waany aleshivavasya shimuniinge naambo mukooye ilatya indo kulya urukeny elo mukeenda,

²naambo mwiinndye Nndumi Iruva, Iruva waany, neelatya mavavaso akwe moose, yoo nkeemuvia, yewe na mwana wafo na vashuku vafo, fyeeri fyoose fya muu wafo, naambo kufumbutyo mikonu yafo.

³Naasa arannyany yewe Israeli naambo kutani indo, naambo kuwoni iviiri, neefumbuka shaasa Nndumi Iruva, Iruva wa vande vafo alekuvikya kyaasa, elyi kukee efo urukeny yelo lwa malela na wuki.

⁴Arannya, Ewe Israeli, Nndumi Iruva, Iruva weeru ni Nndumi Iruva umwi nsi.

⁵Naasany kunda Nndumi Iruva, wafo na ngoo yafo shoose, na nrima wafo moose na finya tafo shoose.

⁶Na marero yaa shaasa nkekuvia inu, atire efo nriminy wafo,

⁷kuvealosha na vana vafo nisha, na yaarera efo kyeny, neefo shia, na kyeeri kwafika ilala na elyi kwiifo kukwiipoo.

⁸Areiye kwuafinngye efo maakony neefo fisanguny.

⁹Kuveareiya efo mbee ya mwaango wa mmba yafo.

¹⁰Na kyeeri Nndumi Iruva, Iruva wafo ammaa ikufita efo urukeny yelo alevikya vakuu vafo kyaasa, wo Abrahamu na Isaki na Yakobo sheelyi ashevaniingaa, lutiri miri miniini misha kulaitannyi yewe,

¹¹na mmba tiishwe findo kulasummyi yewe, na firori fya mura kulasunyi yewe, na marema a misabibu na a miri ya mafura kulavaaye yewe, kukooyeny ikulyiiya neewuura,

¹²llyo kukwiise nnu, kulasheerekyo Nndumi Iruva yeu alekuuta kulya Misri kwekee ushingeny.

¹³Inndya Nndumi Iruva we Iruva wafo, nawe mmbwe kundundya neesenda irina lyakwe.

¹⁴Mulalatye maruva engyi-fo,

¹⁵mashika Nndumi Iruva, Iruva wafo ni Iruva nalasisiryaa maruva engyi, lola unyafi lwakwe lulasheerwa nakumamite kuuke yaa ulaniny.

¹⁶Mulaese Nndumi Iruva, Iruva waany-fo, shaasa muletana alya Masa.

¹⁷Tireny mavavaso a Nndumi Iruva, Iruva waany, na ukureekyi lwa vayo, na mavavasyo a vayo.

¹⁸Kutani mesha na fya usumanu mbee ya Nndumi Iruva naambo kuwoni iviiri na yaanga urukeny yelo usha Nndumi Iruva aleniinga vande vafo,

¹⁹na yuumbuta vakiduva vafo shaasa llya alekuvia.

²⁰Neelyi numa elyi vana vafo vashekuvesaa, “A llyo ukureekyi na mavavasyo Nndumi Iruva, Iruva weeru alemuvavasya?”

²¹Naasa llyo kuviaa vana vafo, Mwiishi, mmbo lwekee mashinga kulya Misri, Nndumi Iruva kalwaauwa-fo na woko lwa finya;

²²Nndumi Iruva kaora-fo ngyende na wiidimi uniini, na findo firoo efo Misri na kwa Farao na urukeny lwakwe loose, neese lukalollya paa;

²³kaluuta-fo naambo nalweende kunu, naambo naluniinge uruka yelo alevikya vande veru kyaasa.

²⁴Nndumi Iruva kaluvavasya iindya mavavaso akwe, lumwiinndye, naambo luwone iviiri kyeeri kyoose, luvewona na muu mwaasha.

²⁵Nakyo mmbo kiluviiyaa ngoma kwakooya lwalatya mavavaso yaa a Nndumi Iruva, Iruva weeru, shaasa aleluvavasya.