Read BIBILLYA Mareiyo Meele a Iruva NKUMBUYE WA UVAVASO 8 Bible Online

NKUMBUYE WA UVAVASO 8 - BIBILLYA Mareiyo Meele a Iruva bible

NKUMBUYE WA UVAVASO 8

¹Ivavaso elyi nkemuniinga inu mmbo mulyilatyaa, naambo mukie muu neefumbuka, mundeanga kulya urukeny yelo Nndumi Iruva alevikya vande vany kyaasa.

²Neewe kummbwa marero a Nndumi Iruva moose, shaasa alekusongoya ando a myaaka yei myoose makumi aana kunu kasa neewe kwakaa kyeesyony nalole kwakooya kwawaranaa na mavavasyo akwe.

³Fyeeri fingyi kakureya shaa, numa kakulela na mana kulayiishi yewe nta vande vafo, nkyo kakoora sheelyi nndu nshi akaa na muu kyeendwa nshoonga tupu-fo, kyeendi nkimaruma kya ekyo kyoose kishukaa kaniny kya Nndumi Iruva.

⁴Masara afo nta nnyalenkwa-fo, nta nkulefumba marende ando a myaaka yei makumi aana-fo.

⁵Neewe manyaany sheelyi nndu avavasa mwana wakwe kyeellosha niindo na Nndumi Iruva, Iruva wafo ashekutannyaa.

⁶Warana na mavavaso a Nndumi Iruva wafo, kullatye neemwiinndya.

⁷Mashika Nndumi Iruva mmbo akeekwaata urukeny usha lutiri ngyusoka ta mura na firori fisheetyaa mura efo mamungony,

⁸nalo ni uruka lwa nganu na misabibu na mikuu, na mikomamanga, ikavetira miri ya ndunda tikamwaa mafura, kuveifo na ukyi.

⁹Mmbo kushelyaa shoonga yafo kulaifo usau nta kulashaanguyoo nkindo, na mawe a vayo mminya, na mafumbu a vayo akatira minya ya arera.

¹⁰Urukeny yelo mmbo kushelyaa neewuura, kuveana Nndumi Iruva, Iruva wafo kya uruka yelo usha indo alekuniinga.

¹¹Kukwiise nnu deny naambo kulasherekywa Nndumi Iruva, Iruva wafo na mavavaso akwe yaa nkeekuvia inu.

¹²Kyeeri kulyaa neewuura neetana mmba shisha,

¹³na maronda afo a ng'umbe na maonri afumbuke, na fesa yafo na sahabu, na fyoose efyo kutiri fifumbuke,

¹⁴naasany kulasheekurosa efo nriminy wafo kurekywa Nndumi Iruva, Iruva wafo yeu alekuuta kulya Misri ushingeny;

¹⁵yeu alekusongoya kulya kasa koomu keeresye, kundo kwiifo shoka na nguluva, nafo nta nkweifo mura-fo, kakuwonisya mura wuuka efo iweny.

¹⁶Niwe alekulela na mana ilya vande vafo valayiishi kakweesa naambo nashefurummya ikuwonisya mesha.

¹⁷Yoo kulasheamba, Finya yakwa na wiidimi lwakwa mfyo fyashiwonisya usimba yelu.

¹⁸Mmbo kushekummbwa Nndumi Iruva wafo kimmba mmbwe yeto akuniinga finya yewona usimba yelo, naambo neengere ivangisa kyaasa kilya alevikya vande vafo fika inu.

¹⁹Lyo kwakooya kwarenkyo neesora maruva engyiy na yaarunndya neeyiinndya, mmbo shamuvia kya dede nkuti murumake.

²⁰Mmbo mushevaa sha vandu yewo Nndumi Iruva akeevamamita mwiilollye, neeni mushetannyo indo mashika elyi mwalema yaarannya unyanga lwa Nndumi Iruva, Iruva waany.