Read BIBILLYA Mareiyo Meele a Iruva NKUMBUYE WA UVAVASO 9 Bible Online

NKUMBUYE WA UVAVASO 9 - BIBILLYA Mareiyo Meele a Iruva bible

NKUMBUYE WA UVAVASO 9

¹Kyasia aranyany yewe Israeli kimmba kulangye iruuka Yordan kundeshilya ngyumangyi titiri finya ngota yewe kumuni, na miri miikare nnu,

²kundekwaanannya na vandu vaasha vatiri finya mmbo vana va Vaanaki, yewo kulemmiita mbony tawo. Ndesa mmbi yeto ashiidimaa ikapana nawo?

³Kyasia manyaany inu sheelyi Nndumi Iruva mmbwe akeekusongoya eevakye muro ukoraa, navamamite neewoombuta yoo mbee yafo, vasye piny shaasa Nndumi Iruva alekuvia.

⁴Naasany kyeeri Nndumi Iruva, Iruva wafo amaa ikweekya indo kulasheekushopa kwaambe, “Ni usumanu lwakwa iwonisa uruka yelu, mashika elyi vandu yewo vengyi vekee varavi Nndumi Iruva kawoombuta.”

⁵Nshi kimaruma kya usumanu lwafo-fo, nta kya usha lwafo kutani Nndumi Iruva oombutafo vandu yewo kwaangefo, navevangisa na kyaasa kilya alevia Abrahamu na Isaki na Yakobo-fo, kimmba yeni mukee vandu va ngoo shuumu.

⁶Kwekyo sheelyi Nndumi Iruva, Iruva waany nyakeeimuniinga uruka yelu luve lwany kyimaruma kya usongovisi lwaany-fo; mashika mmbo mukee vandu variiti.

⁷Kummbwa shaasa kuleengye Nndumi Iruva unyafi kulya kasa uka shaasa kuleuka kulya Misri fika yaa mukai, mukava valyang'a kwa Nndumi Iruva

⁸Mukafuluta Nndumi Iruva alya Horebu, Nndumi Iruva kasua neekunda imumamityau

⁹Na llya shilesaama na ifumbuu shandeniingyo mapoo alya a mavavaso alya akee kyaasa Nndumi Iruva alevika neeni, fo shakaa ando a mikonu makumi aana kio na nsanyiny kulore shalya nta ina.

¹⁰Nndumi Iruva kashiniingya mapoo alya avii areiye na woko lwakwe muni, filya alemuvia alya ifumbuny nnang'ani ya muro.

¹¹Ando a mikonu makumi aana kyio na msanyiny, llya Nndumi Iruva aleshirambikya mapoo alya avii a kyaasa.

¹²Naasa Nndumi Iruva kashivia, “Oloka uviny kweende, mashika vandu valya kulevauta kulya Misri vankureveesa, vakaimmbwa shia ilya shilewoora elyi valekuvikya veni ifwanu lya ngashe vakalyiindya.”

¹³Naasa Nndumi Iruva keengera ishivia, “Yeva ni vandu vatiri ngoo shuumu,

¹⁴Shira shivarumate ulaalu indi na irina lyawo lyireke kulu, shikufumbute yewe kuve vandu veengyi ngota wo.”

¹⁵Naasa shooloka shiirye mapoo alya avii wokony, ifumbu lyiishaakaa muro.

¹⁶Llya shilesha shakooya shaasa mwallyamarya Nndumi Iruva, Iruva waany, llya mulesongosya ifwanu lya ngashe, mukalyamarya Nndumi Iruva uviny indo.

¹⁷Naasa llyo shileipoo mapoo alya avii shaatuula yoo si akafika-fika mwiilollye.

¹⁸Neeny shawa yoo si shiifikye kisangu si, shalalan ando a mikonu makumi aana shilakomba nta kindo, kyeendwa ni uravi lwany, elyi mulelyamarya Nndumi Iruva nemfuluta na unyafi.

¹⁹Neeny mmbo shileereya nnu kimaruma kya unyafi lwa Nndumi Iruva elyi mulemfuluta indo, nawe kakunda imurumata. Lyo Nndumi Iruva kawuya ishaarannya lyingyi.

²⁰Unyafi lwa Nndumi Iruva lukarwa kimaruma kya Aron kakunda ivarumata, kyeendi shaterevya Aron nawe nkonu yeto.

²¹Naasa sheepoou ulyamari lwany, nnyo ngashe yeyo, shaimamita na muro, shaisa ikava sha laami na nsongoso neeny shaufwallya efo mfongony weesoka wuuka efo ifumbuu.

²²Na alya Tabera na Masa na Kibrot-hataava mmbo mulefuluta Nndumi Iruva na unyafi.

²³Na alya Kadesh-barnea llya Nndumi Iruva alemuvia musaami mundetira uruka elo alemuniinga, mmbo mulerenga mukara shaasa alemuvavasya, mmulemwiinndya nta yaarannya unyanga lwakwe-fo.

²⁴Uka elyo shaasa shimwiishi mmbo mukee filemi kwa Nndumi Iruva.

²⁵Naasa llyo shilewa si yoo mbee ya Nndumi Iruva mikonu ilya makumi aana, mashika elyi Nndumi Iruva eekunndye ivamamita

²⁶Shafuuya Nndumi Iruva shammbia, “Woi Nndumi Iruva wakwa, kulasheemamita vandu vafo-fo, mashika ni vaya ding'u vafo kulevawouwa na woko lwa finya kwawoota kulya Misri.

²⁷Nkyekummbwa mashinga afo wo Abrahamu na Isaki na Yakobo kure kulalola uravi lwa vandu yeva na ulyamari lwawo,

²⁸naambo kulya Misri valasheita nawo vaambe, ‘Ni elyi Nndumi Iruva waawo alelemwa ivafita urukeny yelo alevaarya kyaasa, nawe kavasua, kawoota-fo naambo nandevarumatya efo kasa.

²⁹Lyo wo ni vandu vafo kulevasauwa kumuni, kulevawouwa na woko lwafo lwa finya kwavauta kulya Misri.’”