Read BIBILLYA Mareiyo Meele a Iruva YOHANE 1 Bible Online

YOHANE 1 - BIBILLYA Mareiyo Meele a Iruva bible

YOHANE 1

¹Elyo mapookyony llyo Irero eefo. Nawe Irero ekee na Iruva. Nawe Irero ekee Iruva.

²Mmbwe ekee na Iruva elyo mapookyony.

³Findo fyoose fiifo mmbo filetanwa mmbwe. Nawe kulaore aiyo nkuletanwa kindo nta kimwi kya efyo fikee fitani-fo.

⁴Nawe efo nnang'ani yakwe mfo muu weekai. Nato muu yeto ukava ni sa yeevaiya vandu.

⁵Nayo sa yeyo iifo ivaa efo ireeminy. Na ireema nta lyilaiwarye.

⁶Kweefo nndu alerumwa ni Iruva, na irina lyakwe ni Yohane.

⁷Mmbwe alesha kikee kya ukureeki, navikye sa yeyo ukureeki, naambo vandu woose vakooye ikusirya-u kyeendwa mmbwe.

⁸We muni nshiwe sa-fo, mmbo alesha navikye sa yeyo ukureeki.

⁹Sa yeyo ya dede yeyo imikyaa wo nndu, yo yeefo yeeshaa na kunu ulaniny.

¹⁰Mmbo alekaa kunu ulaniny, na ulana yelu mmbo luletanwa kyeendwa mmbwe, na ulana yelo nta lulammanyi.

¹¹Mmbo alesha na efo kukee kwakwe muni, na yewo va efo kwakwe nta valammbwarye.

¹²Indi yewo vammeembwarya woose kavaniingya ulyimbi lwa yaaluka vana va Iruva, mmbo yewo vakusirye na irina lyakwe.

¹³Mmbo yewo valeirwa kilauka na samu nta kikundyony kya mwiili wa nndu, nta kikundyony kya nndu-fo, mmbo vairwa kyuuka na Iruva.

¹⁴Nawe Irero kaaluka nndu kakaa kunu kweru, araiye ikiiya vandu na iva wa dede. Neese lukalollya itumbe lyakwe. Nalyo lyikava ni itumbe lya Mwana wa Ngitany auka kwa Nde arye isarya iingyi na dede.

¹⁵Mmbwe Yohane alemmbikya ukureeki kakapa weele kaamba, “Yeto mmbwe ulya shilemwaamba indi: Ni nndu ashaa yoo numa yakwa nawe ekee mbee yakwa kimmba ni nndu eshisongoye.

¹⁶Na elyi atiri fiingyi fikaingiki yese lukava velyimmywa, simbo ikasorywa ni simbo.

¹⁷Mashika mavavaso nng'u vandu valeniinngywa aendwa ni Mose. Indi ikiiywa ni Iruva na immanya mmbwa dede efyo fikasha fyeendwa ni Yesu Kristo.

¹⁸Nkwiifo nndu alellollya Iruva-fo. Ni Mwana yeto wa Ngitany, yeto akee ng'undeny ta Nde, mmbwe yeto aleloora Nde.”

¹⁹Na elu llo ukureeki lwa Yohane, llya meendi Vayuda valeruma vandu vakohani na Valevi vauka kulya Yerusalemu vandemmbesa, “A yewe ni yewe vi?”

²⁰Nawe kaamba paa, nta nalakani, kaamba paa, Yeny nshi we Kristo-fo.

²¹Vakammbesa, “Kwakooya kulaore ni indo, a ndesa ni yewe Elia?” Nawe kaamba, “Yeny nshi we-fo.” “A yewe ni ulya mwaauya fisuku?” Nawe kaalwa, “Ode.”

²²Naasa vakammbia, “A yewe ni yewe viiny? Mmbo lukunndye luwoni kyeenda yaallwa valya valeluruma. A yewe kumuni mmbo kwaambaye inda kyafo?”

²³Nawe kaamba, “Yeny ni unyanga lwa nndu shakapa weele kundo kwa kasa shaamba, ‘Oroteny shia ya Nndumi, shaasa mwaauya fisuku ulya Isaya aambaye.’”

²⁴Na valya vakee varumi mmba efo kwa Vafarisayo.

²⁵Vakammbesa, “A nkikyi elyi kwava mwiibatisa vandu kwakooya kulaore kukee Kristo; nta Elia, nta umwi wa Veawuya fisuku?”

²⁶Yohane kaallwa kaamba, “Yeny ni mura shabatisa nato. Indi kwiifo mulamwiishi nawe ni efo nnang'ani yaany akai.

²⁷We mmbwe asheshaa yoo numa yakwa, na yeny nshimaa shiporomwe nta ngova ta fyaaru fyakwe-fo.”

²⁸Na kundo mbony eti tileutikya ni kulya Betania kwakulya ya Yordan kundo Yohane eebatisyaa.

²⁹Na elyi lya ndesi kalollya Yesu eensheyaa kaamba, “Akakai Ngurana ya Iruva ishiipoo ulyamari lwa ulana.

³⁰Yeu mmbwe yeto shilerera kyakwe shaamba, Yoo numa yakwa kwiifo kwiishaa nndu nawe ankooya ishiirya mbee kimmba ni nndu eeshisongoye.

³¹Neeny nnshemwiishi-fo. Indi we naambo namanyike paa efo kwa vandu va Israeli, nkyo kindo shilesheya shibatise na mura.”

³²Na Yohane kavika ukureeki kaamba, “Mmbo shilollye Mumuyo wa Iruva eeshemoolokyaa akee sha mbeta auka efo iruveeu kasha inkaya.

³³Neeny nshemwiishi nta-fo. Indi yeto aleshiruma shishebatisa na mura mmbwe aleshivia, ‘Yeto kwallollya Mumuyo wa Iruva ashemoolokyaa nashe inkaya mmbwe yeto mwiibatisa na Mumuyo Mweele.’

³⁴Neeny shammellollya, shavikany ukureeki lwakwa shaamba, yeu mmbwe Mwana wa Iruva.”

³⁵Naasa elyi lya ndesi Yohane asalalyi-fo lyingyi aryani na vakiloshyony vakwe vavii.

³⁶Kavikya Yesu miso elyi eefo ashiraa-u kaamba, “Akakayo Ngurana ya Iruva.”

³⁷Naasa valya vakiloshyony valya vavii vamiita eeshaambaa indo vakandelatya Yesu.

³⁸Yesu kainduka kavalola elyi vallatya kavavia, “Ekyo mwasia nkyoki?” Nawo vakammbia, “Rabi! Nakyo kwaallwa ni kimwi na llosha. A nkwi kukaa?”

³⁹Kavavia, “Kusheyeny, mulole.” Naasa vakeenda vakalolya ando yoo akaa. Vakasinda nawe nkonu ulya piti. Nalyo kyeeri kya saa ikumi kyemfika.

⁴⁰Andrea we mwanamaye wa Simon Petro ni umwi wa valya vavii valeita kilya kyaambawa ni Yohane vakallatya.

⁴¹Nawe kapooka ilollya mwanamaye muni, we Simon, kammbia, “Lwallollya Mesiya” nakyo kwaallwa ni kimwi na Kristo.

⁴²Kanrwaa kwa Yesu. Yesu kallola kaamba, “Yewe ni Simon kukee mwana wa Yohane. Mmbo kushevaangwaa ni Kefa.” (Nakyo kwaallwa, ni iwe.)

⁴³Naasa elyi lya ndesi akunndye ikwiipoo nandefika kulya Galilaya, nalyo kalollya Filipo. Yesu kammbia, “Shilatya.”

⁴⁴Na Filipo ni nndu wa kulya Betisaida, kulya muriny ulya wa Andrea na Petro.

⁴⁵Filipo kalollya Natanaeli kammbia, “Yeto Mose amwaambaye kanndeiya efo uvavasony na vakisuku vakavemwaamba na inndeiya, akakato lwammeellollya, mmbwe Yesu wa kulya Nasareti, we mwana wa Yosefu.”

⁴⁶Natanaeli kammbia, “A kulya Nasareti kushiidimaa yuuka-fo kindo kisha?” Filipo kammbia, “Oshony kulole!”

⁴⁷Naasa Yesu kalollya Natanaeli eefo ansheyaa, karera kyakwe kaamba, “Akakato nndu akee Mwiisraeli dede, nalalasye nta ntambo efo nriminy.”

⁴⁸Natanaeli kammbia, “A kwakooya inda ishimanya?” Yesu karouwa kammbia, “Kyeeri Filipo nalandekuvaanga kukee rembo alya sindeny ya nkuu ulya llyo shakulollya-te.”

⁴⁹Natanaeli kamwaallwa, “Rabi yewe mmbwe Mwana wa Iruva, yewe mmbwe mangyi ya Israeli.”

⁵⁰Yesu kaallwa kammbia, “Elyi shakuvia mmbo shakulollya kukee rembo sindeny ya nkuu ulya nkyo kimaruma kwakusirya-u indo ndesa? Mmbo kukaa kulollye findo finiini ngeta efyo.”

⁵¹Nalyo kammbia, “N dede kya dede shamuvia, mmbo mushelollyaa efo iruveeu kurauka na Vasu va Iruva vasherwaa na yooloka vashekaya Mwana yeto wa nndu.”