Read BIBILLYA Mareiyo Meele a Iruva YOHANE 10 Bible Online

YOHANE 10 - BIBILLYA Mareiyo Meele a Iruva bible

YOHANE 10

¹Ni dede kya dede shamuvia, “Nndu nalashaangaa mfiriny wa maanri aira yoo ngiriny, kasaama na ando engyi, yeto ni mwiivi na nsoki.

²Indi yeto aanga nafo aira yoo ngiriny, we mmbwe mwiisi wa maanri.

³Na yeto mwiiringa yoo ngiriny mmbo annduyaa. Na maanri alya akaarannya unyanga lwakwe. Na maanri alya akee akwe muni kaavaanga marina a vayo kaauwa na poo.

⁴Na alya akee akwe moose elyi aasomuta na poo kaira mbee asongoye. Na maanri alya akallatya kimmba eeshi unyanga lwakwe.

⁵Indi nndu muny nnyashellatyaa-fo. Mmbo arishaa kimmba alaishi unyanga yelo lwa nndu yeto munny.”

⁶Naasa nkyo kyaaso Yesu aleveera. Nawo nta valamanyi ekyo akunndye ivavia nakyo nkyo ki.

⁷Naasa Yesu kawuya ivavia lingi, “Ni dede kya dede shamuvia, Ngiri yeanga kundo mburu tikai nnyo yeny.

⁸Yewo vasheye nafo vashisongoye mmbo vekee veevi na vasoki woose, indi maanri alavaaranyi.

⁹Ngiri yeyo nnyo yeny. Kwakooya nndu aanga nafo ashyaaluye ngiri mmbwe akooya ikirwa, na yaanga nafo na isomuka nafo, navekooya na ura.

¹⁰Indi yeto akee mwiivi nnashaa nafo, kulaore ni isha iiva na ishisha na ireta-fo. Yeny mmbo shilesha nafo moonri akooye itira muu na iuwona shapu.”

¹¹“Mwiisi nsha mmbwe yeny. Mwiisi nsha mmbo arekyaa moonri akwe muu.

¹²Indi nndu mwiisia weesi nalakee mwiisi, nta nalakee muni maanri alya karisha. Naasa nyamandu ikasha ikatitafura neetinyanyata.

¹³Mashika elyi we akee nndu weesia weesi nalasarye kya moonri.

¹⁴Mwiisi nsha mmbwe yeny. Mmbo shiveishi yoo akwa, nang'u aveshiishi yeny.

¹⁵Shaasa nde wakwa ashiishi yeny, na yeny shiveishi Nde wakwa. Na muu wakwa shaveureka kimaruma kya maanri akwa.

¹⁶Shitiri na maanri engyi-se, alakee a mfiri yeu. Nang'u nkuti shiende nau. Nang'u ashiitaa unyanga lwakwa. Na ironda lyive lyimwi na mwiisi nave umwi.

¹⁷Nkyo kyaniinga Nde kashikunda elyi shareka-u muu wakwa.

¹⁸Nta nkwiifoo nndu ashiusokaa-fo. Mmbo shaulekeya shikunda shimuni. Mmbo shivetiri na finya ya yuulekeya. Shivetiri na finya ya yuuvira lyingi. Llyo ivavaso shilewarya lyuuka kwa Nde-akwa.”

¹⁹Naasa Vayuda vakawuya ikumanya kavii lyingyi kimaruma kya elyi arera indo.

²⁰Naasa veengyi vakaamba, “Mmbo atirwa mmumuyo nkasha kasukwa. A naambo-ki-se elyi mwiifo mumwaarannyaa?”

²¹Vengyi vakaamba, “Marero yoo arera nshi akee sha a nndu atirwa mmumuyo nkasha-fo. A mmbo kwiifo mumuyo nkasha ushiidimaa itarammbwa miso a vafu-miso?”

²²Naasa kukafika nkonu nniini kulya Yerusalemu weekummbwa mmba ya Iruva ilesammywa. Na kyeeri kilya kiifo kikee kya mbeo.

²³Na Yesu eefo arua-ruaa efo mmba ya Iruva, efo itengony lya uraa lya Solomon.

²⁴Nalyo Vayuda vakasha inndingitya vakaamba, “A mmbo kufikaa indii kwiisavesaa mirima yeeru? Kwakooya yewe ni Kristo ambaany paa-te!”

²⁵Yesu kaallwa, “Mmbo shilemuvia-da, neeni mulakusirye-u! Ni mashora yoo yeny shatana kikee kya irina lya Nde-akwa, nng'u ashivikye ukureeki.

²⁶Neeni nta mulakusirye-u mashika elyi mulakee ukambeny lwa maanri akwa.

²⁷Na maanri yoo akwa mmbo aishiitaa unyanga lwakwa. Neeny shivetiishi nato tikashilatya.

²⁸Neeny shaaniinga muu wa llung'anu. Nang'u nta nnakaa nareke na akafika llung'anu-fo. Nta nkwiifo nndu asheatafuraa kunu wokony lwakwa-fo.

²⁹Nde yeto wakwa ashiniinngye mmbo ang'annyi woose. Nta nkwiifo nndu ashiidimaa aatafura efo wokony lwa Nde-fo.

³⁰Neeny na Nde mmbo lukee vamwi.”

³¹Nalyo Vayuda vakeepoo nawe lyingyi vankape ngang'u.

³²Yesu kavaallwa, “Mmbo shilemoora mashora mesha meengyi auka kwa Nde. A ni kimaruma kya ishora lyingalyi mukunndye ishikapa na mawe?”

³³Nalyo Vayuda vakamwaallwa, “Nshi kimaruma kya ishora isha lukunndye ikukapa na mawe-fo. Ni kimaruma kya kirumu kyafo kyeeruma Iruva, na elyi yewe kukee nndu-da kwatana kwakwaalwa Iruva kumuni.”

³⁴Yesu kavaallwa, “Efo uvavaso lwany a mmbo nalakee areiye kyeamba, ‘Yeny shileamba, mmbo mukee maruva?’

³⁵Naasa valya valefitywa irero lya Iruva, kwankooya mmbo alevavaanga ni maruva na ekyo kikee kireiye nta kilave ifullwa.

³⁶Afikaany, yeny shilevikwa Mweele ni Nde kashiruma na kunu ulaniny ni inda mwashivia mmbo sharuma Iruva, elyi shaamba, ‘Shikee Mwana wa Iruva?’

³⁷Kwakooya kulaore shatana mashora a Nde-yaakwa, reny mulakusirye neeny-fo!

³⁸Indi kwakooya mmbo shaatana, na kyikava mulakusirye neeny shimuni, kusiryeny na mashora yoo-te, naambo mweende mwiimanyaa na iipuye Nde mmbo asasangyi neeny, neeny nsasangi na Nde.”

³⁹Naasa vakasia mwaanya weentira, lyo we katurushuka efo maakony awo keenda.

⁴⁰Nalyo kawara shia kafika lyingyi kulya kwakulya ya Yordan, kulya Yohane eebatisyaa kakaa-fo.

⁴¹Vandu vakansheya veengyi vakaamba lyo dede we Yohane nta nnyaletana kindo kyeeora wende-fo, kya indi kilya Yohane alerera kya nndu yeu mmbo kikee kya dede kyoose.

⁴²Nalyo vandu va kulya veengyi vakakusirya nawe.