Read BIBILLYA Mareiyo Meele a Iruva YOHANE 11 Bible Online

YOHANE 11 - BIBILLYA Mareiyo Meele a Iruva bible

YOHANE 11

¹Naasa kweefo nndu eelwee evaangwaa Lasaro wa kulya Betania, wa kimuri kilya kya Maria na Marta we mfwamaye.

²Na Maria mmbwe ulya aleamba Nndumi mafura afwaamaa nisha. Na marende alya kaangata na fii ta nrweny wakwe. Na mwanamaye we Lasaro, mmbwe ulya elwee.

³Naasa vamfwamaye valya vakwe vakanrummya nrumi, vakaamba; “Nndumi ulya kunkundye alwee.”

⁴Naasa Yesu aita indo kaamba, “Ndwari yei nshi yeewaa-fo, ni ya yeengye Iruva usuri, naambo Mwana yeto wa Iruva naute-u ing'aniswa.”

⁵Naasa, na Yesu akundani na Marta, na mfwamaye na Lasaro.

⁶Naasa elyi amiita alwee, nalyo kulya akai kaengera isinda-fo ando a mikonu ivii.

⁷Amiirisha-fo indo elyi numa kavia valya vakiloshyon kyakwe, “Ndifony-te luwuye na kulya Yudaya.”

⁸Valya vakiloshyony vakammbia, “Llosha, ni kyeeri yeki kyenyi Vayuda valya verie ikukapa na mawe-te. Neewe mmbo kwiifo kuwuyaa nafo lyingi?”

⁹Yesu kaallwa, “Saa ta nsanyiny nshi ikumi na ivii? Na kwakooya nndu arua-rua nsanyiny nnyakapaa urende-fo, kimmba alollye sa ya ulana yelu.

¹⁰Indi kwakooya nndu arua-rua kio mmbo akapaa urende kimmba nalakee na sa efo nnang'ani yakwe.”

¹¹Ekyaamba indo kawuya kalungya-u kingyi kavavia, “Mbuya ilya yeeru Lasaro ammeelala, lyo nsheendaa shindemwaanta.”

¹²Naasa valya va kiloshyony vakammbia, “Nndumi kwakooya mmbo ammeelala, asheshiaa.”

¹³Na Yesu arera indo neelyi emmeefwa. Nawo vakakusara kulakooye mmbo aamba alele rony.

¹⁴Kikee indo nalyo Yesu kavavia paa, “Lasaro amfwa.

¹⁵Neeny shavefura kimaruma kyany elyi shakooya shilai-yo, naambo mukooye ikusirya-u. Indi kendifony lundefika kwakwe.”

¹⁶Naasa Toma ulya avaangwa Wamaasa, kavia wooroye valya vakiloshyony, “Ndifony-da na yese lundefwa lusange nawe.”

¹⁷Nalyo Yesu afika-fo kakooya ammaa mikonu iina kifuny.

¹⁸Na kwauka kulya Betania kufike Yerusalemu ni ando a kilometa isaanu.

¹⁹Na Vayuda veengyi vasheye na kulya kwa Marta na Maria vavaangate misoru kya mwanamaye ulya waawo.

²⁰Naasa Marta kasheengywa mbony sheelyi Yesu aifo ashaa. Kaenda imwaammbya. Na Maria karewa akee kulya kyenyy.

²¹Naasa Marta kashevia Yesu, “Nndumi kwee ni kunu kweekai mwanama yeu wakwa nnyeefwaa-fo!

²²Lyo naakwaa ni ulaalu mmbo shiveishi-da efyo kusheterevaa Iruva, Iruva mmbo akuniingaa.”

²³Yesu kammbia, “Mwanamau asherukaa!”

²⁴Marta kammbia, “Shiishi-da, mmbo arukaa elyi kwamfika yoo marukyony a vafu nkonu yeto weefurumya.”

²⁵Yesu kammbia, “Yeny mmbwe nnduti na muya-muu. Na nndu akusirye neeny naakwa afwa mmbo ashetiraa muu.

²⁶Na wo nndu aifo na muu kakusirya neeny, nnyakikooya-se ifwa-fo, na kafika llung'anu. A yewe kwakusirya-u indo?”

²⁷Nawe kammbia, “Ee-da Nndumi. Yeny mmbo shikusirye neewe mmbo kukee Kristo Mwana wa Iruva, yeto akee mwaambe nashe na kunu ulaniny.”

²⁸Amaamba indo nalyo kakwiipoo-fo kandevaanga mfwamaye we Maria kikee kya kirika. Kaambia, “Llosha ansha eefo akuvaangaa.”

²⁹Nawe ekiita indo kakwiipoo shu uviny kafika alya Yesu akai.

³⁰Na Yesu nalandefika efo kimuriny-fo. Mmbo akee alya akwaanannya na Marta.

³¹Naasa Vayuda valya veeiyo na Maria kulya kyeny valya vakunndye imwaangata misoru vakalollya Maria akwipoo shu uviny kasomuka. Nawo vakallatya vaishi mmbo asheendaa na efo mbangeny indekapya-fo kiiyo.

³²Naasa elyi Maria afika yoo Yesu akai kallollya kawa si yoo marendeny akwe, kammbia, “Nndumi kwe kweekee kunu mwanama yeu wakwa nnyeefwaa-fo.”

³³Naasa Yesu alollya ashiiyaa indo na Vayuda valya vasha varyani nawe vakaveiiya, nawe karovyo efo nriminy kasavaa.

³⁴Kaamba, “A kundo mulemwaara nkwi?” Vakammbia, “Osho kushelola.”

³⁵Yesu koolota misoru.

³⁶Naasa Vayuda valya vakaamba, Llen-te ndesa enkunndye.

³⁷Na vengyi vakaamba, “A nshi-we aletarammbwa miso a nndu ulya mfu miso? A mmbo alelemwa itana kindo kyeeima na nndu yeu nalafwe?”

³⁸Nalyo Yesu kawuya irovyo efo nriminy. Kafika yoo mbangeny. Nayo ni mbanga ikee shidoshe iweny na iwe lyikee yaamire-u.

³⁹Nalyo Yesu kaamba, “Ipoony-mbu iwe yelyo.” Marta ulya mfwamaye wa Lasaro kammbia, “Nndumi, ampooka iraa-te. Mmbo ammaa-fo mikonu iina.”

⁴⁰Yesu kammbia, “A mmbo shilandekuvia kwakooya kwakusirya-u mmbo kushelollyaa itumbe lya Iruva?”

⁴¹Nalyo vakaipoo-fo iwe Ilya. Na Yesu kainuya miso na uuwe, kaamba, “Woi Nde shakwaana elyi kwanshyaarannya.

⁴²Neeny shiveeshi-da, mmbo kwava mwiishyaarannya kyeeri kyoose. Indi kyashiniinga shakyaamba-u ni nkuka yeu wa vandu varingitye-u naambo vakooye ikusirya-u vamanyi ni yewe kuleshiruma.”

⁴³Na elyi ammaa yaamba indo, koonisa unyanga kavaanga, “Lasaro somuka na kunu poo.”

⁴⁴Nndu ulya mfu kasha na poo, na kisangu kilya kyakwe kikee kyoososye kirami. Yesu kavavia, “Moorommwiny munre neende.”

⁴⁵Naasa Vayuda valya vasheye na kulya kwa Maria vekilolya kindo kilya atana, veengyi va efo nnang'ani yaawo vakapooka ikusirya nawe.

⁴⁶Na valya maata vakaenda kulya kwa Vafarisayo vakavavia kilya atana.

⁴⁷Naasa vakohani valya vaniini vakasanga na Vafarisayo vakavaanga shila shiniini ya ngyama tawo vakaamba, “A lutaniny inda elyi nndu yeu ava mwiitana fyeeora ngyende shiingyi indo?

⁴⁸Kwakooya lwankureeya-u indo, vandu mmbo vasiiyaa kwakwe ikusirya nawe. Nalyo Varome vasheshaa vashelusokaa na uruka na vandu.”

⁴⁹Naasa nndu umwi wa efo nnang'ani yaawo umwi ni Kayafa ekee nkohani nniini wa mwaka ulya. Nawe kavavia, “Mmutiri nta nrwe-fo,

⁵⁰nta mulakusarye mmbo kyemuviiyaa kisha nndu umwi nafwe ando a vandu va uruka elu loose kyallya vandu va uruka loose varekaa?”

⁵¹Na elyi arera indo nshi kya shila yakwe muni-fo. Ni elyi ekee nkohani nniini wa mwaaka ulya karera indo kikee ni kisuku auya kyeamba Yesu asheendaa ifiiya vandu va uruka.

⁵²Nshi kya vandu va uruka elu tupu-fo, ni kimaruma kya vana va Iruva yewo vanyanyakye naambo nakooye ivaummbya ando amwi.

⁵³Naasa kipookya nkonu ulya vakavika shila naambo vakooye immbwaa.

⁵⁴Naasa Yesu nalakive-se, mwiirua-rua paa efo kwa Vayuda. Indi kakwiipoo-fo kaenda uruka lwiiduvani na kulya kasa. Kafika muriny uvaangwaa ni Efraimu, kakaa-fo na vakiloshyony vakwe.

⁵⁵Naasa Pasaka ya Vayuda yensha kufii. Vandu veengi vakanderwa na kulya Yerusalemu vauka efo urukeny lulya, kulaore kwamfika Pasaka, vandekwiilyisa.

⁵⁶Naasa vakava varuuya-ruuya-ny Yesu. Vakarera wo veni na veni vasalalyi efo mmba ya Iruva, vashaambaa, “A mulla kyava inda? Ni dede nnasheshaa ishesaiya nkonu yeu nniini-fo ndesa?”

⁵⁷Na Vakohani valya vaniini vensanga na Vafarisayo vakauta mavavaso kyeamba, “Kwakooya nndu ammanya kundo akai neende mbony, naambo vakooye intira.”