Read BIBILLYA Mareiyo Meele a Iruva YOHANE 12 Bible Online

YOHANE 12 - BIBILLYA Mareiyo Meele a Iruva bible

YOHANE 12

¹Naasa kweeiyo mikonu irindaru kufike Pasaka. Yesu kafika kulya Betania kulya Lasaro elele ulya Yesu alennduta ammbuta kwa vafu.

²Naasa vakanndesya shoonga na Marta kava mmbo afurukana-u. Na Lasaro kava ni umwi wa valya veefo rembo velyaa shoongaa.

³Naasa Maria keende ratili imwi ya mafura eamba afwamaa nisha a ngata ya nardo akee mavaramu, atiri uuru uniini, kaamba marende a Yesu, Kawuya kaangata na fii ta nrweny wakwe. Na mmba ilya ikaishwa kifwaamu kya mafura alya.

⁴Naasa Yuda Iskariote aiyo ni umwi wa valya vakiloshyon kyakwe ulya asheendaa inndiinngya, we kaamba,

⁵“A nkyeema mafura yaa akummbwa fesa shiingi, nato tikandeniingwa vakiva.”

⁶Na kyaaniinga kaamba indo nshi atinnywa vakiva-fo nnyelyi ekee mwiivi, nawe mmbwe arie mboloko ilya ya fesa, na filya mfyavikwa-fo kava mwiipoo-fo.

⁷Naasa Yesu kaamba, “Kunreeyeny-te nadeesye kya nkonu wakwa weerikwa.

⁸Kya vandu vakiva mmbo mukee nawo mikonu myoose. Indi yeny mmukee neeny mikonu myoose-fo.”

⁹Naasa vandu valya vakuummbye-fo ironda iniini va efo kwa Vayuda, vakamanya Yesu mfo kundo akai, vakasha nafo, nshi kimaruma kya Yesu tupu-fo, mmbo vakunndye ilollya na Lasaro ulya alennduta ammbuta kwa vafu.

¹⁰Naasa vakohani valya vaniini vakafisha kyama naambo vawaa na Lasaro vansande nawe.

¹¹Nyeeli mashika akwe Vayuda veengyi valekusirya na Yesu.

¹²Naasa elyi lya ndesi kweifo ironda iniini lya vandu lyisheye nafo kya nkonu ulya nniini. Vakaita Yesu eefo ashaa na kulya Yerusalemu.

¹³Vakakamara maramba a myaangashi. Vakawara shia vandemwaammbya. Vakakapa kisangelele vakaamba, “Hosiana! Kundearafumwa yeto asha arumwa ni Nndumi kaveva mangyi ya Israeli.

¹⁴Naasa na Yesu emmbonisa ngashe ya nshungu, kasaama mungony wa vayo. Kikaveva indo shaasa kikee kireiye kyeamba,

¹⁵Yeni va Sion mulairyae-fo! Akakato mangyi yafo aifo akusheya asaammyi mungony wa ngashe ya nshungu.”

¹⁶Nakyo shaasa kikai valya vakiloshyony valaitumuso mbele. Ni meendi alya Yesu aleira na efo itumbeny llyo meendi valekummbwa ni indo kyekee kireiye na itana vakaventannya indo-da.

¹⁷Naasa ironda llya lya vandu valya vekee nawe nkonu ulya alevaanga Lasaro kauka efo mbangeny, kannduta ammbuta vafuny, nawo-da vakava vavikaany ukureeki.

¹⁸Nakyo kikaveniinga ironda lyilya lya vandu vandemwaammbya nyelyi vamiita mmbo aletana kindo ekyo kya wende.

¹⁹Nalyo Vafarisayo vakaviana nndu na uroye, “Mulollye-da, mmushiidimaa-se kindo-fo. Akakalu ulana loose lwiifo lunsoraa.”

²⁰Naasa efo nnang'ani ya vandu valya valerwa nafo vandeindya Iruva nkonu ulya nniini kukavekaa-fo na Vagriki vaangu.

²¹Naasa vakaenngya Filipo wa kulya Betisaida ya kulya Galilaya. Vakantereva vakaamba, “Nndumi, lulanngye ilollya Yesu!”

²²Filipo kaenda kandevia Andrea. Andrea kasanga na Filipo vakandevia Yesu.

²³Na Yesu kavaallwa kaamba, “Akakyo kyeeri kyamfika, Mwana yeto wa nndu nakooye-ny iira na efo itumbeny.”

²⁴Ni dede kya dede shamuvia, “Mbekye yeyo ya nganu kwakooya kulaore yaoloka efo uteriny ikafiiya-fo, mmbo irewaa ikakaa yo sheni. Indi kwakooya yamfiiya-fo mmbo isheendee kimu kiingyi.

²⁵Yeto ankunda muu wakwe akaa naurete. Na yeto ansua muu wakwe kunu ulaniny yelu mmbwe asheuringaa ukooye muu wa llung'anu.

²⁶Kwakooya nndu akunndye ishirunndya nashilatye-ny. Na kundo shakaa yeny, na yeto ashirunndya mfo kundo ashevekaa. Na kwakooya nndu ashirunndya, mmbwe Nde ashenng'anisaa.”

²⁷Ulaalu nrima wakwa wasavaa. Neeny shyaambeny inda? Ndesa shyaambe, “Nde kushaauwe ulaalu? Indi kimaruma nkyo ekyo shakooya saa yei.

²⁸Woi Nde enda kwiing'anisaa irina lyafo yewe!” Nalyo kukaitiwa unyanga luuka efo iruveeu lwiishaambaa, “Shammeelying'anisa na lyingyi nsheendaa ilying'anisa-da.”

²⁹Naasa ironda lilya lya vandu vasalali-fo vakaita vakaamba, “Ni iruruma lyarera.” Veengyi vakaamba, Ni nsu wa Iruva arera nawe.

³⁰Yesu kaallwa kaamba, “Unyanga yelo nshi kimaruma kyakwa lwarera-fo, ni kimaruma kyany.

³¹Ulaalu ulana elu lwiifo lushuutywaa uvingo. Ni ulaalu nniini wa ulana yelo asheerwaa na efo poo.

³²Neeny kwakooya shammeeroswa na uuwe shyuutwa kunu urukeny, llyo nshewoomuyaa na kwakwa woose.”

³³Karera indo yoolongya kya ufu ashendaa ifwa llwa ngata-ki.

³⁴Naasa vandu valya vakuummbye-u vakanndouwa, “Yese lwiitye kya Kristo kyuuka efo uvavasony mmbo ashekaa-fo llung'anu. A kyavaany inda elyi yewe kwaamba mmbo kikee kideerye Mwana yeto wa Nndu nanderoswa na uuwe? A Mwana yeto wa nndu ni viiny?”

³⁵Naasa Yesu kavavia, “Kusaa-u kyeeri kidu mukee na sa nnang'ani yaany. Kerueny mukee sha vandu vatiri sa mulakooye imilwa ni ireema. Na yeto mweenda ireeminy nnyamanyaa nta kundo afikaa-fo.

³⁶Elyi mukee na sa kusiryeny na sa yeyo mukooye yaaluka vana va sa.”

³⁷Naasa lla ndesa aleva mwiitana findo finiini indo velollye fya iwoora ngyende, nawo nta valakunde ikusirya-u.

³⁸Mmbo kileenda indo naambo kilya nkisuku ulya Isaya alerera kiinukye kyeamba, “Nndumi, a nndu alekusirya na kyoongoyo kyeru ni vi? A ni vi alesukuywa woko Nndumi?”

³⁹Na kimaruma valaidimi ikusirya-u ni kilya kingyi Isaya alerera kyeamba,

⁴⁰Mmbo alewaa miso awo, kaallwa ngoo tawo tikava shuumu, na miso awo naambo valakooye illa nang'u kindo, na ngoo tawo valakooye iipuye nato kindo vawuye neeny shivakire.

⁴¹Ni indo Isaya alerera llya alelollya itumbe lyakwe karera kyakwe.

⁴²Lyo mmbo kweefo na vandu va nrwe veengyi-da valeva vandu vakusirye nawe, indi ni kimaruma kya Vafarisayo valakyaambe paa valakooye yaantwa efo ikwaanuny lyawo.

⁴³Kaamba wo vakunndye nnduma wa kunu vanduny kilanya ya nnduma wa efo kwa Iruva.

⁴⁴Naasa Yesu kaonisa unyanga kaamba, “Nndu akusirye neeny nshi yeny ashikusirye-fo, ni yeto aleshiruma.

⁴⁵Na yeto ashilollye yeny mmbo alollye yeto aleshiruma.

⁴⁶Na kwakooya nndu aita marero akwa kara nalaaringa nshi yeny nshemmbutyaa uvingo-fo. Kimmba kindo shilesheya na kunu ulaniny nshi isheutya ulana yelu uvingo-fo ni ishekira ulana yelu.

⁴⁷Na kwakooya nndu aita marero akwa kara nalaaringa, nshi yeny nshemmbutyaa uvingo-fo. Kimmba kindo shilesheya na kunu ulaniny nshi isheutya ulana yelu uvingo-fo, ni ishekira ulana yelu.

⁴⁸Yeto ashiinyika kara nalawarya marero yoo akwa mmbo akooya yeto ammbutya uvingo. Ndera yeyo yakwa shileamba nyo ishemmbutyaa uvingo nkonu yeto weefurumya.

⁴⁹Kimmba nshi kindo shikyuutye kwakwa shimuni shilerera-fo. Ni Nde-yaakwa yeto aleshiruma mmbwe ashiniingye ivavaso lya kindo nshaambaa na kindo nshereraa.

⁵⁰Neeny shiveishi ivavaso elyo lyakwe mmbo lyava lya muu wa llung'anu. Naasany kindo sharera, shaasa kisumani na ekyo Nde ashiviiye, ni indo shareraany.”