Read BIBILLYA Mareiyo Meele a Iruva YOHANE 13 Bible Online

YOHANE 13 - BIBILLYA Mareiyo Meele a Iruva bible

YOHANE 13

¹Naasa kyeeri nkonu ulya nniini wa Pasaka ulandefika Yesu amanyaa kyeeri kyakwe kyammeesha nakwiipoo kunu ulaniny yelu indefika kwa Nde. Nawe ndesa alekunda yewo vakwe meendi akee kunu ulaniny, mmbo alevakunda dede deny.

²Naasa kweefo kwelyiwa shoonga ya nkwaany. Na yeto nkumbi emmaa yaanga. Yuda Iskariote, ulya akee mwana wa Simon, naambo nandenndiinngya.

³Nawe Yesu emmanya Nde mmbo ammeenrambikya findo fyoose maakony akwe nawe mmbo alesha auka kwa Iruva, na efo kwa Iruva mfo kundo aifo asheendaa nafo.

⁴Naasa kakwiipoo alya kilyiiyony kya kilaayo. Kakuuta soori yakwe ya yeerya. Kaende soori ya ifurukannya shoongen kakufinga nayo yoo mwiininy.

⁵Kawuya kaletya mura wa isamba nndeeveny. Kapooka isangya valya vakiloshyony marende nayaangata na soori ilya akufingye.

⁶Naasa afika yoo kwa Simon Petro, we kammbia, “Nndumi a yewe mmbo kushisangyaa marende?”

⁷Yesu kaallwa kammbia, “Kindo shiifo ntanaa nkukiishi ulaalu-fo, mmbo kushekimanyaa numa.”

⁸Petro kammbia, “Ode nta-fo nkusheeshisangyaa marende nakukafika indii-fo.” Yesu kanndouwa, “Kwakooya kulaore shakusangya marende nkukee umwi neeny-fo.”

⁹Simon Petro kaallwa, “Woi Nndumi, nshi marende tupu-fo, naakwa ni maako na nrwe-da mbee.”

¹⁰Yesu kammbia, “Yeto ansamba nnatiri kisanngyo-se-fo, kulaore ni marende meni, mmbo ameeremuka efo mwiiliny koose. Neeni mukee veeremutu-da, indi nshi moose-fo.”

¹¹Nyeeli eeshi ulya eefo anndinngyaa, nkyo kimaruma kaamba, “Nshi mukee veeremutu moose-fo.”

¹²Naasa elyi ammaa ivasangya marende kawuya iipoo soori ilya yakwe ya yeerya. Kakaa-fo lyingyi rembo kavavia, “Mwamanya ekyo shamutannya shaasa kikai-ro?

¹³Mmbo mwashivaanga llosha na Nndumi. Na elyi mwaamba indo kyikava kisha-da, kimmba yeny mmbwe.

¹⁴Naasany kwankooya yeny mmbo shamusangya marende shikee nndumi na llosha waany, na yeni-da mmbo kimusumanyi mukusangye marende.

¹⁵Mmbo shamureeya kindo kyeelola neeni mundetawa indo shaasa yeny shamutannya yeni.

¹⁶Ni dede kya dede shamuvia, nkwiifoo nndundi airye nndumi wakwe-fo, nta nndu nrumi airye ulya alenruma-fo.

¹⁷Kwakooya mmbo mwammeekimanya, mushevaa va ngoma mukauta indo.

¹⁸Nshi shaamba indo kikee kya woose-fo. Yeny shiveishi yewo shilevasauwa. Indi kilya kikee kireiye kuti kindeinukya kyeamba, ‘Yeto alyiiye nkate wakwa, mmbwe ashirosyaa tutu nashikape inanga.’”

¹⁹Mmbo shalava imuvia ulaalu kulaore kyammba indo, na elyi kivaa indo naambo mukooye ikusirya-u sheelyi yeny mmbwe.

²⁰Ni dede kya dede shamuvia, “Yeto awaryaa nndu shanruma ni yeny ashiwarya, na yeto ashiwarya yeny mmbo awarya yeto aleshiruma.”

²¹Na elyi Yesu amaamba indo nalyo kasavaa efo nriminy, kakureeka-u kaamba, “Ni dede kya dede shamuvia, Nndu umwi wa kunu nnang'ani yaany asheshiriinngyaa.”

²²Nalyo valya vakiloshyony vakakulola-lola vakatirwa ntamba kya nndu arera kyakwe.

²³Naasa kweifo umwi wa valya vakiloshyony vakwe akaa rembo yoo uvariny lwakwe. Mmbwe ulya Yesu eitani nawe.

²⁴Nawe Simon Petro kansinnya kammbia, “Mmbese yeto arera kyakwe ni vii.”

²⁵Naasa nndu ulya nalyo yeni kakwaamira yoo uvariny lwa Yesu akweevetye kammbia, “Nndumi, ni vii?”

²⁶Yesu kamwaallwa, “Ni yeto shinkapyaa kipereshu eki yoo nndeeveny shinniinngye, yeto mmbwe.” Naasa kipereshu kilya kakikapa efo nndeeveny, kaniingya Yuda Iskariote wa Simon.

²⁷Nawe eekilya kipereshu kilya Satana kamwaanga. Naasa Yesu kammbia, “Ekyo kwiifo kutanaa kitani uviny.”

²⁸Na valya veefo velyaa shoonga nkwiifo nndu alemanya kimaruma kammbia indo-fo.

²⁹Kukakaa-fo vekusaraa kya Yuda elyi arie mboloko yeesuruma fesa kulakooye Yesu mmbo ammbia, Endeura findo efyo lwatura fya nkonu yeu nniini ao nandeniingya vakiva kindo.

³⁰Naasa elyi ammeelya kipereshu kilya nalyo kasomuka na poo na kio kyemmesha.

³¹Naasa eekisomuka na poo Yesu kaamba, “Mwana yeto wa nndu ni ulaalu ammeng'aniswa na Iruva kaveng'aniswa kyeendwa mmbwe.

³²Kwakooya Iruva mmbo ammeeng'aniswa kyeendwa mmbwe, na Iruva ashenng'anisaa kikee kyakwe muni. Na ulaalu indi-da ashenng'anisaa-se.”

³³“Nyira fivana nsindaa neeni kyaangu-da. Mmbo musheshiruuyaa. Nakyo kivevaa indo-da shaasa shilevia Vayuda shaamba, ‘Kundo yeny nsheendaa, mmushiidimaa ifika-fo yeni-fo. Neeny shamuviany ulaalu.’

³⁴Mmbo shamuniingya ivavaso iiya lyikee indi, kaeny mukundani shaasa shilemukunda yeni, neeni mukundani indo!

³⁵Kindo vandu woose vashemumanyaa nakyo mukee vakiloshyony kyakwa ni elyi mwakundana.”

³⁶Simon Petro kammbia, “A nkwi kusheendaa Nndumi?” Yesu kaallwa, “Kundo yeny nsheendaa, yewe nkushiidimaa ishisora-fo ulaalu-fo, mmbo kusheshisoraa-fo elyi numa.”

³⁷Petro Kammbia, “Nndumi, a kimaruma nkikyi elyi shilashiidimaa ikusora-fo ulaalu? Mmbo nshelekeyaa muu wakwa kimaruma kyafo.”

³⁸Yesu kaallwa, kaamba, “Mmbo kushelekaya muu wafo kimaruma kyakwa?” Ni dede kya dede shakuvia, “Oro ya nguku nnyikapaa kulaore kwanshikana kararu-fo.”