Read BIBILLYA Mareiyo Meele a Iruva YOHANE 17 Bible Online

YOHANE 17 - BIBILLYA Mareiyo Meele a Iruva bible

YOHANE 17

¹Yesu ekimaa irera marero yoo kainuya miso na efo uuwe kaamba, “Woi Nde akakakyi kyeeri kyamfikany. Kundany ing'anisa Mwana wafo, na Mwana wafo nakooye ikung'anisa yewe.

²Kiryani na elyi kunniingye ushilyi lweeshillya findo fyoose, na efyo kunniingye naambo nakooye ifilyimmya muu wa lung'anu fyoose.

³Na muu wa llung'anu ukavaany ule, ni ikumanya yewe mmbo kukee Iruva dede, na yeto kulenruma we Yesu Kristo.

⁴Yeny mmbo shilekung'anisa shikee kunu ulaniny shiinutye ishora elyo kushiniingye shilyitani.

⁵Na ulaalu woi Nde shing'anisaany efo kwafo kwashiniinga nng'anu ulya shetiri efo kwafo kulaore ulana lwammbikwa.

⁶Mmbo shilesukuya vandu yewo irina lyafo, yewo kuleshiniinga kunu ulaniny. Vekee vafo, neewe kwavashiniinga. Nawo mmbo vammeeringa ndera yafo.

⁷Ulaalu vakamanya efyo fyoose kushiiniinngye mmbo fyauka kwafo.

⁸Kimmba marero yoo kuleshianiinga nng'u shilevaniinga nawo. Nawo vakaawarya. Vakamanya dede mmbo shileuka kwafo. Vakakooya ikusirya-u ni yewe kuleshiruma.

⁹Neeny mmbo yewo shavaterevya. Nshi ulana yelo shaluterevya-fo, ni yewo kushiniinngye kiimmba mmbo vakee vafo.

¹⁰Na efyo fikee fyakwa fikaveva fyafo fyoose. Na efyo fikee fyafo fikaveva fyakwa-da. Neeny efo kwawo shava nng'u shammeeng'anisywa.”

¹¹“Neeny nshikikee-se kunu ulanin-fo. Nawo mmbo vakee kunu ulaniny. Neeny shiifo nkusheyaany kwafo. Woi Nde Mweele, varinge vakae na irina lyafo elyo kushiniinngye yeny nawo vakooye iva vamwi na yese.

¹²Meendi sheekee nawo ni yeny shileva mwiivaringa kyikee kya irina lyafo. Shavaauwa, nta nkwiifo nndu waawo alereka-u kulaore ni mwana yeto wa ureti-fo, naambo kilya kikee kireiye kikooye indeinukya.

¹³Indi ulaalu shiifo nkusheyaa na kwafo, na marero yoo sharera shikee kunu ulaniny naambo vakooye ikaa na nsia yeto shitiri nato weende ing'ana efo miriminy yaawo.

¹⁴Yeny mmbo shivalyimmyi ndera yafo na ulana yelu lukauta-u ivasua kimmba valakee va ngata ya ulana, shaasa na yeny shilakee wa ngata ya ulana.

¹⁵Nshi shavaterevya kuvaute kunu ulanin-fo. Ni ivaringa vakie yeto nkasha.

¹⁶Wo nshi va ulana yelu-fo shaasa na yeny shilakee wa mushu ya ulana yelu.

¹⁷Vavike veele na ekyo kyikee dede Irero lyafo llyo dede.

¹⁸Na shaasa kuleshiruma shishe kunu ulaniny, ni indo neeny shilevaruma vafike ulaniny.

¹⁹Na kimaruma kyawo shakuvika mweele naambo nawo-da vakooye ivikwa veele.”

²⁰“Indi lyo nshi kyawo-da shatereva-fo. Mmbo shakummbwa na yewo vashevaa vandu vakusirye neeny, kyeendwa ni kirero kyawo.

²¹Nawo vakooye iva vamwi woose shaasa yewe Nde kusangi neeny neeny shivesangyi neewe, naambo nawo-da vave vandu vasangyi neese, na ulana yelu luute-u ikusirya-u mmbo kuleshiruma yeny.

²²Na usuri yelo kushilyimmyi yeny neeny mmbo shivealyimmye wo, naambo vakooye iva vamwi,

²³Neeny shive mmbo nsangyi neewe neewe kusange neeny nawo-da vakooye iinutya iva vamwi, na ulana yelu luute-u imanya mmbo kuleshiruma yeny, kwavevakunda shaasa kuleshikunda yeny.

²⁴Woi Nde mmbo shakunda kya yewo kuleshivaniinga, nawo-da vakooye ikaa ando amwi neeny efo kundo shikai, naambo vakooye ilollya usuri lwakwa kushiniinngye kimmba kuleshikunda kulaore ulana yelu lwammbeiywa.

²⁵Woi Nde kukee wa usumanu na ulana yelu nta lulakwiishi, yeny mmbo shilekumanya. Na yewo-da vakavemanya yewe mmbo kuleshiruma.

²⁶Neeny shavarambuya irina lyafo, na lyingyi nsheengeraa ivarambuya na ukundi yelo kuleshikunda luvakaye efo nriminy, neeny shive mmbo nsangyi nawo.”