Read BIBILLYA Mareiyo Meele a Iruva YOHANE 19 Bible Online

YOHANE 19 - BIBILLYA Mareiyo Meele a Iruva bible

YOHANE 19

¹Kifikaa yoo nalyo Pilato kaamba Yesu nadekapwa na ngova.

²Nalyo vasikari valya vakaoka ureto lwa miinga vakammbika nrweny. Vakavemmbika na soori ya yeerya ifwani kinyanyari.

³Vakasha isalala yoo usumanu nawo vakaamba, “Lwakwiidikira mangyi ya Vayuda!” Vakava vankapaa-ny ngyoyi.

⁴Pilato kawuya kasomuka lyingyi na poo kavavia, “Akakau shamweende na kunu poo kundo mukai mukooye imanya nshaona kindo kya uvingo lwakwe-fo.”

⁵Naasa Yesu kasomuka na efo poo aree ureto lulya lwa miinga na soori ilya ya yeerya ifwani kinyanyari. Nalyo kavavia, “Llen-te nndu yeu shaasa aamba!”

⁶Naasa vakohani valya vaniini vasangyi na vasoro valya vawo va efo poo valollya vakakapa kyoorongye vashaambaa, “Endenkapye nsalaben! Endenkapye nsalaben!” Pilato kavavia, “Nkamareny yeni-te mundenkapya nsalabeny, mashika yeny nshilollye kindo kya uvingo kwakwe-fo.”

⁷Vayuda vakaamba, “Yese mmbo lutiri ivavaso lya kikweru, na ivavaso yelyo kwakooya lyaindyo we kuti nafwe, kimmba akwaallwa Mwana wa Iruva we muni.”

⁸Naasa elyi aita vaamba indo nawe kaengera iiryaa.

⁹Kawuya yaanga lyingyi na efo mmba ya nshilyi wa Kaisari kavia Yesu, “A yewe ni nndu wakwi? Naasa Yesu nta nalanndouwe kindo.”

¹⁰Pilato kammbia, “A mmbo kulaishi yeny shitiri ushilyi lwekuporomwa, shivetiri na ushilyi lwekukapya nsalabeny?”

¹¹Yesu kaallwa, “Nkutiri ushilyi neeny kwee kulaore kweeluningyo luuka efo uuwe-fo. Nkyo kyaniinga yeto ashirambikya kunu maakony afo kava mmbo awonisa ulyamari uniini nnu.”

¹²Kipookyaany lyo Pilato karuuya mwaanya weemporomwa. Naasa Vayuda vakava vakapyaany kyoorongye veshaambaa, “Kwakooya kwamporomwa nkukee nndu akundani na Kaisari-fo. Wo nndu akwaallwa mangyi we muni mmbo alema Kaisari.”

¹³Naasa elyi Pilato aita vaamba indo, nalyo kaamba, “Yesu narawa na efo poo.” Kashekaa rembo yoo kitiminy kya ushilyi efo kundo kuvaangwaa, “Mmbengye shaale mawe.” (Na irina lya vayo lya Kiebrania ni Gabata.)

¹⁴Naasa na nkonu ulya ni nkonu weekudeesya ni kyeeri kya saa irindaru. Nalyo kavia Vayuda, “Llen-te mangyi yaany.”

¹⁵Nawo vakakapa kyoorongye veshaambaa, “Muute yaa! Muute yaa! Kundenkapya nsalabeny.” Pilato kavavia, “A shitani shakapya mangyi yaany nsalabeny?” Vakohani valya vaniini vakaallwa, “Yese llutiri mangyi kulaore ni Kaisari-fo.”

¹⁶Naasa kifikaa yoo nalyo kandenrambikya maakony awo nandekapyo nsalabeny. Vakaenda varie Yesu.

¹⁷Nawe kaenda akurikye nsalaba wakwe muni. Kauka kulya muriny, kafika kundo kuvaangwaa ni kisharongony. Na irina lya Kiebrania ni Golgota.

¹⁸Nafo vakankapya-fo nsalabeny. Vakansanda na vengi vavii, umwi taari yei na ungyi taari yei. Yesu kakaa yoo nnang'ani.

¹⁹Naasa Pilato kareiya kiipoo kyeologya kakikapya yoo nsalabeu kwa uuwe. Na kikee kireiye-u indi: “YEU NI YESU WA NASARETI MANGYI YA VAYUDA.”

²⁰Naasa kipoo kilya Vayuda veengyi vakakisoma, mashika alya Yesu akapywa nsalabeu kukee kufii na kulya muriny. Na marero akee mareiye-u ni a Kiebrania na Kiroma na Kigriki.

²¹Nalyo vakohani valya vaniini va Vayuda vakandevia Pilato, “Nta kulareiye kyeamba, Akee mangyi ya Vayuda-fo-te! Mmbo kureiyaa kyeamba, Nndu yeto aleamba, Yeny ni mangyi ya Vayuda!”

²²Pilato kaallwa, “Kindo shanndeiya ni ekyo shammereiya naasa.”

²³Naasa vasikari elyi vakapya Yesu nsalabeny vakaipoo soori takwe, vakaava fyenga fiina wo nsikari na kyenyga kyakwe, na soori ilya ya mwiiliny nnyitiri ufumu-fo mmbo ikee shooke ikarayo.

²⁴Nalyo vakaviana wo veni na veni, “Yeyo lulashe iirandwa-fo. Ndifony lwikapye kura ilolwa yeto immboyaa.” Naasa kyikaenda indo naambo-kilya kyikee kireiye kindeinukya kyeamba, “Valava soori takwa. Na masara akwa vakaakapya kura.” Naasa vasikari valya ni indo valetana.

²⁵Naasa kulya kufii na nsalaba ulya wa Yesu kusalalye-fo maye na mfwamaye wa maye na Maria ulya nka wa Kleopa na Maria wa kulya Magdala.

²⁶Nalyo Yesu alollya maye na ulya wa kiloshyony aitani nawe, kavia maye, “Nka, yeu mmbwe mwana wafo.”

²⁷Kawuya kavia ulya wa kiloshyony, “Yeu mmbwe mau!” Nalyo kyeeri kilya kyenyi ulya wa kiloshyony kanrwaa na efo kyeny kwakwe.

²⁸Yoo numa Yesu kamanya fyoose mmbo fyammarisyo kundeinutyo filya fikee fireiye. Nalyo kaamba, “Shaakuka.”

²⁹Naasa kukee kusimbite-u kiiya kitiri mfinyo utarang'aa. Nalyo vakaipoo kyoonga-mura vakakiishura mfinyo ulya utarang'aa, vakakivika irereny vakanrwaaya yoo kaniny.

³⁰Naasa Yesu ekina mfinyo ulya utarang'aa kaamba, “Kyamminutyo!” Kainyika nrwe kakumba muu kafwa!

³¹Naasa elyi nkonu wiifoo ukee wa ikudeesya Vayuda vakalollya nshi kisha miili ilya ilale kulya nsalabeu nkonu wa Sabato-fo. Na Sabato, yekee nkonu nniini deny. Vakandetereva Pilato mafua alya awo andefishwa-fishwa vavanuwa-fo.

³²Nalyo vasikari valya vakasha nafo, vakafisha mafua a ulya wa mbee na ulya ungyi valya vakapyo nsalabeny ando amwi na Yesu.

³³Naasa vakafikya Yesu. Vakakooya ate ammefwa, nalyo valakimfishe-fishe-se mafua.

³⁴Indi vasikari valya ulya umwi kandosha yoo uvari na ifumu. Nang'u akataa mura usangyi na samu.

³⁵Na yeto akilolye kava mmbo avikau ukureekyi. Na ukureekyi lwakwe ni lwa dede. Nawe aishi ni kya dede, arera, na yeni-da naambo muvange ikusirya-u.

³⁶Mashika kyaniinga kikaenda indo ni kilya kikee kireiye naambo kindeinukya indo kyeamba, “Nashefishwaa nta ifua-fo.”

³⁷Kukavekaa-fo kindo kyikee kireiye kingyi kyeamba, Vakaa valollye yeto valenndosha na ifumu.

³⁸Naasa filya fimiira Yosefu wa kulya Arimataya kasha nawe akee wa kiloshyony kya Yesu kirika kimaruma kya iiryaa Vayuda. Kashetereva Pilato muumu wendevanwa mwiili ulya wa Yesu. Pilato kammbikya muumu. Naasa kasha nang'u kauvanwa.

³⁹Naasa Nikodemu kasha nafo ulya alensheya llya lya mbee kyeeri kya kio. Kasha arie manemane isasangyi na muya ya ngata ingyi ifwaamaa nafyo fyamaa kilo makumi araru indi.

⁴⁰Naasa vakaipoo mwiili ulya wa Yesu, vakauososya sooriny shaa teerika vakasanda na miri ilya ifwaamaa shaasa kikee mbuka ya Vayuda yerika vafu vawo.

⁴¹Naasa na alya alekapyo nsalabeny kweifo nnda. Na efo nndeny ulya kweifo mbanga shiiya yerika ikee shidoshe iweny, nafo kulandearwa nndu-fo.

⁴²Nafo vakaara-fo Yesu mashika nkonu ulya mbwekudeesya wa Vayuda na mbanga ilya ikaveva kufii.