Read BIBILLYA Mareiyo Meele a Iruva YOHANE 20 Bible Online

YOHANE 20 - BIBILLYA Mareiyo Meele a Iruva bible

YOHANE 20

¹Naasa nkonu ulya wepooka mfungare elyi ngama nraasi na ivishi-vishi, nalyo Maria wa kulya Magdala kandefika alya mbangeny, kakooya iwe llya lyambutwa yoo mbangeny.

²Nalyo kaenda sere kafika kulya kwa Simion Petro na nndu ulya wa kiloshyony Yesu eetani nawe. Kavavia, “Ate vamiipoo-fo Nndumi kulya mbangeny nta lulaishi kundo veenda imbika.”

³Naasa Petro kakwipoo-fo na ulya ungyi wa kiloshyony. Vakawara shia yefika kulya mbangeny.

⁴Vakaenda veerisha ve vavii. Nalyo ulya ungyi wa kiloshyony karisha uviny kailanya Petro, kapooka ifika alya mbangeny.

⁵Nawe kaimaiya-fo akulemmyi kalollya soori tilya teerika tikee shivike-fo, nta nalaange nafo.

⁶Naasa Simion Petro kafika-u ashe numa yakwe. Nalyo kaira na efo mbangeny. Kalollya soori tilya tikee shivike-fo.

⁷Na kirami kilya ekee mfingyeny nrony, nakyo kilakee kivike ando amwi na soori tilya teerika, kikee kyososye ando engyi kikakaa kyaanya kya vayo.

⁸Nalyo na ulya ungyi wa kiloshyony kaveiira nafo ulya alepooka ifika alya mbangeny. Kalollya kakusirya-u.

⁹Mashika valendeitumuso kilya kikee kireiye kyeamba, “Mmbo kikee kirummbwe nanderuka auka kwa vafu.”

¹⁰Naasa valya vakiloshyony vakakwiipoo-fo vakawuya na kyenyy.

¹¹Naasa Maria karewa asalali yoo usumanu na mbanga ilya yoo kipoo ashiiyaa. Naasa elyi eefo ashiiyaa kakulema kaimaiya efo mbangeny.

¹²Kalollya vasu va Iruva vavii varee soori timikamikaa vakee-fo rembo. Ulya umwi kakaa yoo kinrony na ungi kimarendeny alya ando mwiili ulya wa Yesu wekee mwaare.

¹³Nawo vakammbia, “A yewe nka nkikyi kwiiyaa?” Kavavia, “Mmbo vamipoo-fo Nndumi ulya wakwa. Neeny nta shilamanyi kundo vambika!”

¹⁴Ekyaamba indo kainduka kalla numa kalolya Yesu asalali-u nta nalamanyi ni Yesu.

¹⁵Yesu kammbia, “A nkikyi elyi kukeiya? Mmbi mai kukennduuya?” Nawe kakummbwa kulakooye ni mwiremya nnda ulya. Kammbia, “Nndumi kwakooya ni yewe kwamwipoo-fo, shiviany kundo kwaenda imbika neeny shyeende imoondwa-fo.”

¹⁶Yesu kammbia, “Maria-ro!” Nawe kainduka kammbia, kwa Kiebrania, “Raboni!” Nakyo mmbo kyaamba, “Llosha wakwa!”

¹⁷Yesu kammbia, “Nta kulashitire-fo. Shamashika shilanderwa na efo kwa Nde. Mmbo kushendaa kwa vanavama vakwa kundevavia, shiifo shirwaa neefo kwa Nde-yaakwa, nawe ni Nde waany, efo kwa Iruva wakwa nawe na Iruva waany.”

¹⁸Maria wa kulya Magdala kaenda kanderuuya valya vakiloshyony kavavia, “Mmbo shallollya Nndumi.” Kavewoongoya na kilya ammbia.

¹⁹Naasa nkonu ulya mweni-da ukee nkonu wepooka mfungare elyi nkwaany na myaango yanrayo ya iira na alya vakiloshyony vakuumbye mashika elyi veereiye Vayuda, nalyo Yesu kasha nau kasalala yoo nnang'ani yaawo kavavia, “Sindeny na Ufoo!”

²⁰Amaamba indo kawoora maako alya akwe na uvari lulya lwakwe. Nalyo valya vakiloshyony vakafura elyi valolya Nndumi.

²¹Karera lya kavii kavavia, “Sindeny na ufoo, Shaasa Nde aleshiruma yeny, neeny ni kiwo-da shavemuruma yeni.”

²²Arera indo kavavia, “Waryeny Mumuyo Mweele.

²³Vandu mwambafwaaya ulyamari lwawo, vamaifwaayo. Na vandu mwambavikya ishingo kya ulyamari, lwawo, vammaa ivikyo ishingo.”

²⁴Naasa umwi wa vakiloshyony ni Toma, na irina lyakwe lya kavii avaangwaa Wamaasa, nawe nalaiyo ando amwi nawo kyeeri kilya Yesu alesha nau.

²⁵Naasa vakiloshyony valya vengyi vakandemoongoya, vakammbia, “Lwallolya Nndumi!” Nawe kavavia, “Shanra shilalolya ngoru ta misumari ilya efo maakony akwe, nepaana ngoru ta misumari na nni, nepaana uvari lwakwe na woko, yeny nshishekusiryaa-u-fo.”

²⁶Naasa kukaira-u mikonu nyanya na valya vakiloshyony vakee lyingyi efo mmba na Toma aveiyo ando amwi nawo. Yesu kasha nau, na myaango ikee miraye, kashesalala yoo nnang'ani kaamba, “Sindeny na ufoo.”

²⁷Kawuya kavia Toma, “Kyeende nni wafo na yaa kulole maako akwa kuveende na woko lwafo kupaani nalo uvari lwakwa naambo kulave mwira ikusirya-u! Vaany nndu mwikunda ikusirya-u.”

²⁸Toma kaallwa kammbia, “Nndumi wakwa na Iruva wakwa!”

²⁹Yesu kammbia, “Kwanshilollya nkyo kyakuniinga kwakusirya-u, ngoma vandu vakusirya-u valalollya.”

³⁰Naasa kukavekaa-fo na findo fingyi fiingyi Yesu aletana fyeyoora ngyende valya vakiloshyony valollye. Nafyo filakee fireiye fikavikwa kunu kyitabuny ekyi-fo.

³¹Indi filereiyo ni efi fyeni naambo mukooye iva vandu vavangyi ikusirya na Yesu mmbo akee Kristo we Mwana wa Iruva na efo kikusiryony ekyo mukooye-fo muu mukutiri na irina lyakwe.