Read BIBILLYA Mareiyo Meele a Iruva YOHANE 21 Bible Online

YOHANE 21 - BIBILLYA Mareiyo Meele a Iruva bible

YOHANE 21

¹Naasa elyi numa ya vayo Yesu kawuya ikoora lyingyi na valya vakiloshyony vakee kulya waambeu lwa yeeve ilya ya Galilaya. Na shaasa alekoora nawo kyikee indi.

²Ni Simion Petro vekee ando amwi na Toma ulya avaangwa Wamaasa na Natanaeli wa kulya Kana ya kulya Galilaya, na vana valya va Sebedayo na vengyi-se vavii va efo kiloshyony kyakwe.

³Simon Petro kavavia, “Nsheendaany indereiya makunga.” Vakammbia, “Neese-da lusheendaa neewe.” Vakakwiipoo vakasaama na efo ngalaveny. Nalyo kio kilya valatire nta kindo.

⁴Naasa kwamfika kwiikyaa, Yesu kashesalala alya waambeu, indi valya vakiloshyony valamanyi ni Yesu.

⁵Nalyo Yesu kavavia, “Nyira fivana a mmbo mulatiri kindo kyelya?” Vakammbia, “Oode mbee!”

⁶Kavavia, “Oloteny mireiyo yoo taari ya woko usha lwa ngalava yeyo. Mmbo mushewonisaa!” Nalyo vakoolota-fo. Nawo valakiidimi-se yoomwa vaalutye uuwe kimaruma kya makunga ammba kilula.

⁷Nalyo ulya va kiloshyony Yesu aitani nawe kavia Petro, “Ate ni Nndumi!” Naasa Simon Petro ekiita ni Nndumi kakufinga soori ya uuwe, mashika mmbo eree kirami tupu. Kakoolota efo yeeveny.

⁸Naasa vakiloshyony valya vengyi vakasha variwa ni ngalava ilya mashika mmbeekee kwaasha na alya waambeu-fo. Ando aiyo ni ando sha meta iyana. Vakasha veshomwaa nreiyo ulya wishwe makunga.

⁹Naasa vakooloka-fo vakafika alya wambeu vakalollya kwikee kuvike muro wa makaa na ikunga lyikee ideerye-u na nkate.

¹⁰Yesu kavavia, “Makunga yoo mwareiya ulaalu indi enden-fo maata!”

¹¹Petro kaalukya-fo kaalutya nreiyo ulya na efo wambeu. Nato wishe makunga maniini afikye iyana na makumi araanu na araru. Nang'u Lla ndesa akee meengyi indo, nreiyo ulya ularanduke.

¹²Yesu kavavia, “Oshony-te mushetuka!” Naasa valya vakiloshyony nta kulakae-fo nndu akarya immbesa, “A yewe ni yewe vi?” Ni elyi vemmanya ni Nndumi.

¹³Yesu kasha nau, kaipoo nkate ulya. Kavaniingya, na ikunga lyilya ni kiwo-da.

¹⁴Nalyo lyikava lya kararu Yesu alekoora na valya vakiloshyony elyi ammeruka auka kwa vafu.

¹⁵Naasa elyi vammeetuka, Yesu kavia Simon Petro, “Simon wa Yohane kushikundye ngota yeva?” Nawe kaamba, “Ee Nndumi, yewe kuveishi shikukundye!” Kammbia, “Endeesa ngurana takwa.”

¹⁶Kawuya kammbia lyingyi lya kavii, “Simion wa Yohane kushikundye ndesa?” Nawe kammbia, “Ee-da Nndumi. Yewe kuveishi yeny shikukundye.” Kammbia, “Endeesa maanri akwa.”

¹⁷Kammbia lya kararu, “Simion wa Yohane kushikunndye?” Petro kafulukyo elyi ammbia lya kararu, kushikunndye? Nalyo Petro kammbia, “Nndumi mmbo kwiishi findo fyoose, kwavemanya-da mmbo shikukundye.” Yesu kammbia, “Endeesa maanri akwa.”

¹⁸Ni dede kya dede shakuvia, Elyi kwekee nkoo mmbo kuleva mwikufinga yoo mwiininy kumuni, na kundo kwakunda kwavekweengya-da. Indi elyi kuvaa mmiku mmbo kushorwaa maako afo na ungyi nakufinge yoo mwiininy nakurwaa kundo kulakundye.

¹⁹Na kyaniinga karera indo ni kya yoolongya ufu akaa nawoni nang'anise nalo Iruva mmbo lushevaa lwa ngata ingai. Nalyo elyi amaamba indo kammbia, shilatyaany.

²⁰Petro kainduka kalollya ulya wa kiloshyony ulya Yesu aitani nawe eefo ashaa yoo numa, (nawe mmbwe ulya alekaa rembo yoo uvariny lwakwe llya valelya kilaayo kilya kaamba, “Nndumi a ni vi akuringyaa?”)

²¹Naasa elyi Petro alollya nndu yeto kavia Yesu, “Nndumi a yeu kyakwe ni inda?”

²²Yesu kaamba, “Kwakooya shakunda yeu nakae-fo shitani shawuya a ekyo kikuwore ki yewe? Yewe shilatya-da!”

²³Naasa nng'u manuuna alepookya akakwaana efo kwa vana yewo va nka kyeamba nndu yeu wa kiloshyony nnyaafwaa-fo. Na Yesu nnyalembia nnyafwa-fo mmbo alemmbia, shakunda yeu nakae-fo shitani shawuya a ekyo kikuwore ki yewe.

²⁴Naasa yeto mmbwe nndu wa kiloshyony avikye-u ukureeki kya mbony yeti kavetireiya. Neese lukamanya na nshushwa sheelyi ukureeki lwakwe mmbo lukee lwa dede.

²⁵Naasa kukavekaa-fo na findo fingyi fiingyi Yesu aletana. Nafyo kwee fyeereiyoo fyoose, shikusara ulana elu llweshiidimaa itira fitabu efyo fyereiywaa-fo.