Read BIBILLYA Mareiyo Meele a Iruva YOHANE 5 Bible Online

YOHANE 5 - BIBILLYA Mareiyo Meele a Iruva bible

YOHANE 5

¹Elyi numa kukafika nkonu ulya nniini wa Vayuda Yesu kanderwa na kulya Yerusalemu.

²Naasa kulya Yerusalemu, yoo kufii na Ngiri ya Moonri kweifo iruva lyivaangwa irina lya vayo lya Kiebrania ni Betsata. Nalyo lyitiri matengo araanu a uraa.

³Nafo mfo kundo kukee kwaare nsemu mwiingyi wa vandu valwee na vafu-miso, na miketekete, na fitongororo. [Nawo vakava veevereya mura ulya usarywa.

⁴Mashika kwifo kyeeri nsu wa Iruva ashoolokaa efo iruveny kasarya mura ulya. Naasa nndu ansongwa yooloka-fo elyi mura wansarywa-sarywa, kaveshia, na ndwari yakwe intiri na ikava-ki.]

⁵Naasa kweifo nndu emaye-fo myaaka makumi araru na nyanya eeserikaa na ndwari yakwe.

⁶Nndu ulya Yesu kallollya elele-fo, kamanya emaye-fo fyeeri fyaasha. Kammbia, “Kukundye ishia?”

⁷Nndu ulya alwee kamwaallwa, “Nndumi nshitiri nndu ashoolotaa efo iruveny elyi mura wasarywa-fo. Mashika elyi shiifo nshoolokaa, nndu ungyi kaveshiirya mbee yooloka-fo.”

⁸Yesu kammbia, “Kwiipoo, kurike kitara kyafo kukweengye.”

⁹Nalyo nndu ulya kava nsha deny, kaipoo kitara kyakwe, kakweengya. Naasa nkonu ulya wekee wa Sabato.

¹⁰Naasa Vayuda vakavia nndu yeu amishia, “Inu ni Sabato-te, nkutiri muumu weekurika kitara-fo.”

¹¹Kavarouwa, “Ni nndu yeto ashishiisa mmbwe ashivia, kurike kitara kyafo kukweengye.”

¹²Vakammbesa, “A ni vi nndu yeto akuvia kurike kitara kukweengye?”

¹³Naasa nndu ulya eelwee nalamanyi mmbwe-vi, kimmba Yesu enrekya efo vanduny valya vakuumbyeu nkuka.

¹⁴Naasa elyi numa Yesu kankooya akee efo mmba ya Iruva kammbia, “Lla-te, kwammishia-ny. Nta kulalyamare-se-fo kukooye iwoywa nkindo kikasha mmwasi yeekyo.”

¹⁵Naasa nndu ulya kakweengya kandevia Vayuda ni Yesu anshiisa.

¹⁶Nakyo kyikaniinga Vayuda vakatira kisuuya nawe mashika elyi aleva mwiitana indo nkonu wa Sabato.

¹⁷Nawe kavaalwa, “Nde-yaakwa aifo arundaa kafika ulaalu, neeny shivee-fo shirundaa-da.”

¹⁸Naasa nkyo kimaruma Vayuda vakaengera iruuya mwaanya weembwaa, nshi kimaruma kya iimmbwa Sabato-fo, ni elyi aamba Iruva ni ndeye muni kakwiinanisa na Iruva.

¹⁹Naasa Yesu kaallwa kavavia, “Ni dede kya dede shamuvia, We mwana nnyamanyaa itana kindo kikee kya shila yakwe muni, kulaore ni ekyo alollya Nde etanaa-fo. Mashika we kindo atana na mwana nakyo kavekitana indo-da.

²⁰Mashika Nde akunndye Mwana kamoora fyoose atana we muni. Nawe ashemooraa fyeetana finiini kilanya ya efyo, neeni mukooye itambwa.

²¹Mashika Nde aruta vafu kavaallwa va muu.

²²Mashika Nde nta nnyarummbwaa mwaandu wa nndu-fo, mmbo aniinngye Mwana ushilyi loose lweerummbwa mwaandu wa vandu.

²³Naambo woose vainndye Mwana shaasa vashiindyaa Nde. Yeto ara nalainndya Mwana mmbo ara nalainndya Nde alenruma.”

²⁴Ni dede kya dede shamuvia, “Nndu asharanyaa ndera yakwa kavekusirya na yeto aleshiruma, mmbwe ammbwarya muu wa llung'anu, nta nnashiitwaa mwaandun-fo. Mmbo ammbuka ufuny; kandeanga muuny.

²⁵Ni dede kya dede shamuvia, kukaa kushe kyeeri, naakwa ni ulaalu kiveefo-da elyi vafu vasheetaa unyanga lwa Mwana wa Iruva na yewo vamiita vawonise muu.

²⁶Mashika shaasa Nde atiri muu ummya efo kwakwe niindo-da aleniinga na Mwana itira muu ummya efo nnang'ani yakwe.

²⁷Kavenniinga na ushilyi lweerummbwa mwaandu kimmba akee Mwana wa Nndu.

²⁸Nta mulatambwa kya ekyo. Mashika kukaa kushe kyeeri elyi yewo valele efo fifuny vasheitaa unyanga lwakwe woose.

²⁹Nawo vashekwiipoo-fo, yewo vatanyi mesha varuke vawonise muu. Na yewo vatannyi makasha varuke vawonise mwaandu.”

³⁰“Yeny nshishiidimaa itana kindo kikee kya shila yakwa shimuni-fo. Mmbo sharummbwa kikwaani na ekyo shamiita, na ekyo sharummbwa kyikava kya usumanu. Mashika kindo mmballyaa nakyo nshi yekyo kikundywa ni yeny-fo, ni ekyo kikundywa ni yeto aleshiruma.

³¹Kwakooya shavika ukureeki kyakwa shimuni, ukureeki lwakwa nshi lwa dede-fo.

³²Indi yeto ashivikya ukureeki ni ungi. Neeny shiishi ukureeki yelu akureekye kyakwa ni lwa dede.

³³Mmbo muleruma vandu kulya kwa Yohane muveni. Nawe kakureekya dede yeyo.

³⁴Neeny nta nshiwaryaa ukureeki luuka kwa vandu-fo, mmbo shaamba-u ekyo naambo yeni mukooye ikirwa.

³⁵Ulya mmbo akee sha taa yaatwa ikamika, Neeni mukakyesa na sa yakwe ando a kivero.

³⁶Indi yeny ukureeki lwakwa shitiri ni uniini lukailanya lulya lwa Yohane, kimmba mashora Nde aleshiniinga naambo shaainutye nng'u yoo meni shiifo nndundaa. Nang'u akava nng'u ukureeki lwakwa kyeamba ni Nde aleshiruma.

³⁷Nawe Nde aleshiruma kaveshivikya ukureeki we muni. Neeni unyanga lwakwe nta mulandelwiite nta lyimwi-fo nta fwana yakwe mulandelollye-fo.

³⁸Na ndera yeyo yakwe nta mulandeitire mukakaa nayo efo nrimin-fo, mashika yeto alenruma mulakunde ikusirya nawe.

³⁹Mmbo mwava vesununda-sununda mareiyo kimmba mwiishi mmbo mushuutaa-u iwonisa-fo muu wa llung'anu nang'u ashivikye ukureeki.

⁴⁰Neeni nta mulakunde ikusheya na kwakwa naambo muwoni muu.”

⁴¹“Nshiwaryaa nnduma wuuka na vandu-fo.

⁴²Indi yeni shammumanya nshi mukee na ukundi lwa Iruva efo nriminy-fo.

⁴³Yeny mmbo shisheye kyikee kya irina lya Nde-yaakwa, nta mulashiwarye, kyeendi kwakooya ungyi asha kyikee kya irina lyakwe muni, we mushemmbwaryaa.

⁴⁴A niinda mushewonisaa mwaanya weekusirya-u mummbe vandu vevikyana nnduma muveni na veni nta mulalalakyaa iwonisa nnduma wuuka kwa yeto akee Iruva muni?

⁴⁵Nta mulakusare mmbo shikunndye imukumba efo kwa Nde-fo, kwiifo yeto amukumba, mmbwe Mose yeto mummbikye nsia yeni.

⁴⁶Mashika kwee mweekusirye na Mose, mmbo mweevekusiryaa neeny kimmba we areiye kya ishyaambya.

⁴⁷Indi kwakooya kulaore mwakusirya na mareiyo yoo akwe, ni inda mushekusiryaa na marero akwa?”