Read BIBILLYA Mareiyo Meele a Iruva YOHANE 6 Bible Online

YOHANE 6 - BIBILLYA Mareiyo Meele a Iruva bible

YOHANE 6

¹Na elyi numa Yesu kakwiipoo-fo kafika kulya kwa kulya ya yeeve ilya ya Galilaya nayo nnyo Tiberia.

²Na vandu vakansora nseemu mwiingyi mashika velollya filya fya wende atana fyeekira vandu valwee.

³Naasa Yesu kasaama na efo ifumbuny, kakaa-fo rembo. Na valya vakiloshyony kyakwe varyani nawe.

⁴Naasa na nkonu ulya nniini wa Vayuda, ulya wa pasaka, ukee kufii.

⁵Yesu kainwa miso, kalollya vandu vansheya nseemu mwiingyi kavia Filipo, “A kundo lushuuraa mikate, vandu yeva vawoni kindo kyeelya nkwi?”

⁶Karera indo kikee kya imweesa. Shamashika we muni eeshi ninsha kindo akunndye itana.

⁷Filipo kamwaallwa, “Mikate ya dinari mayana avii nnyimaa wo nndu naoni kipereshu tupu-fo.”

⁸Na umwi wa valya vakiloshyony kyakwe we Andrea ekee mwanamaye wa Simon Petro kammbia,

⁹“Kwiiyo mwana wa womi yaa atiri mikate iraanu ya nganu shuu na makunga avii.”

¹⁰Indi findo efi fifwanaa kwi vandu vammiingifwa indo? Yesu kaamba, “Vikeny vandu rembo.” Na alya vekai weekee mooro mwiingyi wa mare. Naasa womi valya vakakaa rembo vafikye fiku firaanu.

¹¹Naasa Yesu kawarya mikate ilya iraanu kaana Iruva. Kaavya vandu valya vakwaallye si. Na makunga alya kavevaavya shaasa vakunndye.

¹²Naasa elyi vammbuura kavia valya va kiloshyony vakwe, “Enderorweny fipereshu efyo fisaa-u, mulare nta kindo kirekye-si.”

¹³Vakanderorwa vakaishura mikusha ikumi na ivii, fipereshu fya mikate ilya iraanu, filya fyasaa elyi vammaa ilya.

¹⁴Naasa vandu valya veekilolya ekyo kya wende atana, vakaamba, “Ate ni dede we mmbwe mwauya fisuku ulya akee nteerye nashe kunu ulaniny.”

¹⁵Naasa Yesu kamanya vakundye isha imwipoo vamwallwa mangyi, nawe koovya kandesaama lyingyi neefo ifumbuny we muni.

¹⁶Naasa elyi kwamfika iila, valya vakiloshyony kyakwe vakandesoka na alya mbaambaa ya yeeve ilya.

¹⁷Vakasaama neefo ngalaveny, varuuke veende na kulya Kapernaumu. Naasa ireema lyikooloka na Yesu nalandefika kundo vekai.

¹⁸Na yeve ikaalukaluka kyeendwa ni uraato uniini.

¹⁹Naasa elyi vanrwa ngalava ilya na mbee ando alyaa sha kilometa isaanu ao irindaru indi nalyo vakalollya Yesu asheendaa yoo uwe ya yeve amfika kufii na ngalava ilya. Nawo vakatirwa mmbweerei.

²⁰Naawe kavavia, “Ni yen-te, mulairyae-fo.”

²¹Naasa vakakunda insaamisa efo ngalaveny. Vakakooya ngalava yamfika alya waambeu kulya vasheendaa nafo.

²²Naasa elyi lya ndesi nsemu ulya wa vandu valya valerewa vasalalyi kulya kwa kulya ya yeve ilya, vakalollya nkwiifo-se ngalava ingyi-fo kuuta ilya imwi yeefo, na Yesu nalandesanga na valya vakiloshyony kyakwe mmbo valeenda wo veni.

²³Naasa vakakooya kwansha nafo ngalava tingyi tuuka kulya Tiberia tikashefika kufii na alya valelyiiya mikate kyeeri Nndumi aleana Iruva.

²⁴Naasa mamwiingyi ulya wa vandu elyi valollya Yesu nalaiyo nta vakiloshyony kyakwe, vakasaama ngalaveny, vakafika kulya Kapernaumu vanderuuya-fo Yesu.

²⁵Vakakooya ammaa iruuka kafika taari ilya ingyi ya yeve, vakammbia, “Llori a ni indii-da kwafika kunu.”

²⁶Yesu kaalwa kaamba, “Ni dede kya dede shamuvia, kyaniinga mukasheshiruuya nshi mashika a ngyende tilya mulelollya-fo, ni kimaruma kya mikate ilya mulelya mukawuura.

²⁷Nta mulavinnyi shoonga yeyo ikaa ipwaa, vinnyiny shooka yeyo ya muu wa llung'anu. Nayo ni Mwana yeto wa nndu ashemuniingaa. Mmbwe Nde, we Iruva alemmbikya kiringisyo namanyike mmbwa dede.”

²⁸Naasa vakammbia, “A mmbo lutanaa inda lukooye itana mashora yoo a Iruva?”

²⁹Yesu kaallwa kavavia, “Ishora elyo lya Iruva llyo elyi, ni ikusirya na yeto alenruma.”

³⁰Naasa vakammbia, “A kiki kutanaa kyeeloora wende neese lukilollye lukooye ikusirya neewe? A ni ishora-ki kwatana?

³¹Vande valya veru mmbo valelya mana kulya kasa shaasa kikee kireiye kyeamba, ‘Alevaniinga nkate wuuka efo iruveeu.’”

³²Naasa Yesu kavavia, “Ni dede kya dede shamuvia, nshi Mose alemuniinga nkate yeto wuuka iruveeu-fo, mmbwe Nde-yaakwa amuniinga nkate yeto wuuka efo iruveeu ukee wa dede.

³³Mashika nkate wa Iruva nto yeto wooloka wuuka iruveeu ukaniinga ulana yelu muu.”

³⁴Naasa vakammbia, “Nndumi kyeluniinge nkate yeto kyeeri kyoose!”

³⁵Naasa Yesu kavavia, “Yeny mmbwe nkate yeto wa muu! Nndu akusheya na kwakwa nnakitirwaa nshaa-se-fo. Na nndu kakusirya kwakwa nnatirwaa nyura-se-fo.”

³⁶Indi mmbo shamuvia, “Ilollya mwanshilollya nta mulaute-u ikusirya-fo.”

³⁷Ekyo Nde anshiniinga nkyo kikusheyaa na kwakwa, Na nndu ankusheya na kwakwa nshishemweeraa poo-fo.

³⁸Mashika kyashiniinga shooloka na kunu si, nshi ishetana kindo shikunndye shimuni-fo, ni kindo kikundywa ni yeto aleshiruma.

³⁹Na kindo kikundywa ni yeto aleshiruma nkyo ekyi, Woose Nde aleshiniinga naambo shilarete-u nta umwi, indi shinndute nkonu yeto weefurumya.

⁴⁰Mashika kindo kikunndywa ni Nde-yaakwa kikee indi, Wo nndu alola Mwana na ikusirya nawe, nawarye muu wa llung'anu na yeny nkaa shinndute nkonu yeto weefurumya.

⁴¹Naasa Vayuda vakarininda kyakwe mashika elyi aamba, “Yeny mmbwe nkate yeto uleoloka wuuka iruveeu.”

⁴²Vakaamba, “A yeu nshi Yesu, we mwana wa Yosefu, a mmbo lulaishi ndeye na maye? Kyavaany inda elyi aamba mmbo aolokye auka iruveeu?”

⁴³Yesu kaallwa kavavia, “Nta mulakae murinindaa muveni na veni.

⁴⁴Nkwiifo nndu aidima ifika kwakwa kulaore ni Nde yeto aleshiruma amwoommwa nafo-fo, neeny nkaa shinndute nkonu yeto wa ifurumya.”

⁴⁵Mmbo kikee kireiye efo fitabuny fya vakisuku kyeamba, nawo woose vakaa vave vafunde ni Iruva. Naasa, wo nndu amaarannya kyuuka na Nde na ikulosha mmbo ashaa na kwakwa-da.

⁴⁶Nshi kikee sheelyi kwiifo nndu alollye Nde-fo, kulaore ni yeto aparikye efo kwa Iruva, mmbwe alollye Nde.

⁴⁷Ni dede kya dede shamuvia, Yeto akusirye-u mmbo ammbwarya muu wa llung'anu.

⁴⁸Yeny mmbwe nkate yeto wa muu.

⁴⁹Vandeye valya vany mmbo valelya manna kulya kasa vakavefwa.

⁵⁰Indi nkate yeto shaamba nto woolokye wuuka efo iruveeu, naambo vandu vaulye valakikooye-se ifwa.

⁵¹Yeny mmbwe nkate wa muu yeto uleoloka wuuka iruveeu. Na nkate yeto kwakooya nndu aulya nnyashefwaa-fo. Na nkate yeto shinsimbaa ni mwiili wakwa shyoonisye nato ulana yelu muu.

⁵²Naasa Vayuda vakava vallyaa ulai wo veni na veni vakaamba, A ni inda ashiidimaa ilusimba mwiili wakwe luulye?

⁵³Naasa Yesu kavavia, “Ni dede kya dede shamuvia, kwakooya kulaore mwalya mwiili wa Mwana yeto wa nndu na ina samu yakwe nta mmukaa na muu efo nnang'ani yaany-fo.

⁵⁴Nndu kalya mwiili wakwa na ina samu yakwa mmbo awaryaa muu wa llung'anu, neeny nkaa shindute nkonu yeto weefurumya.

⁵⁵Mashika mwiili wakwa nto kyeelya kya dede, na samu yakwa nnyo kyeena kya dede.

⁵⁶Na nndu kalya mwiili wakwa kavena na samu yakwa mmbo akaa asangyi neeny, neeny nkaa nsangyi nawe.

⁵⁷Kyikava shaasa Nde yeto aleshiruma akee muni muu, neen shakaa na muu kimaruma kya Nde, nakiwo-da yeto ashilya akaa na muu kimaruma kyakwa.

⁵⁸Eto nto nkate uleoloka uuka efo iruveeu, nta ulakee wa ngata imwi na ulya vande valya veru valelya vakavefwa. Indi nkate yeto, nndu kaulya mmbo alung'anaa ikaa na muu.

⁵⁹Na kundo aleamba marero yoo ni kulya mmba yeeterevya ya kulya Kapernaumu eeloshyaa-fo.”

⁶⁰Naasa vandu veengyi nnang'ani ya valya vakiloshyony kyakwe vekiita indo vakaamba, “Marero yoo mmoomu-te, A nndu ashiidimaa yaairanya mmbii?”

⁶¹Naasa Yesu kamanya we muni efo nriminy valya vakiloshyony mmbo veefo varininda kya ekyo. Nalyo kavavia, “A ekyo mmbo kyamuviiya nsindara?

⁶²A kishevaany inda kwakooya mushelollya Mwana yeto wa nndu eesherwaa na uuwe efo ekee elyo mbee?”

⁶³Mumuyo nto uningaa muu. Mwiili mmbumaa kindo-fo. Na marero yoo yeny shammeemuvia, nng'u a ngata ya Mumuyo akaveva a muu.

⁶⁴Indi kunu nnang'ani yaany kwiifo maata valakusirye-u. Nyeli uka elyo mbee Yesu eeshi vandu valakusirye-u mmbo vangava, nndu ashenndiingyaa ni ungau.

⁶⁵Nalyo kaamba, “Nkyo kimaruma shamuvia, Nkwiifo nndu eedima ifika kwakwa kulaore ni yeto ammbonisywa mwaanya ni Nde wakwa-fo.”

⁶⁶Naasa llyo vandu va efo kiloshyony veengyi valepooka iwuya na numa valakivandami-se nawe.

⁶⁷Naasa Yesu kavia valya ikumi na vavii, “A mmbo mukunndye ikweengya na yeni-da?”

⁶⁸Naasa Simon Petro kamwaallwa, “Lweende kwa vi Nndumi? Mmbo kutiri marero aende muu wa llung'anu.

⁶⁹Neese lwankusirya neewe, lukamanya yewe mmbo kukee yeto Mweele wa Iruva.”

⁷⁰Yesu karouwa, “A nshi yeny shimuni shilemukusauya yeni ikumi na vavii? Na efo nnang'ani yaany umwi kawuya iva mmbishwa?”

⁷¹Naasa karera indo kya Yuda Iskariote akee mwana wa Simon. Mashika mmbwe aleva nndu yeto alenndiingya nawe ni umwi wa valya ikumi na vavii.