Read BIBILLYA Mareiyo Meele a Iruva YOHANE 8 Bible Online

YOHANE 8 - BIBILLYA Mareiyo Meele a Iruva bible

YOHANE 8

¹Nawe Yesu kaenda kulya ifumbuny lya miri ya mafura.

²Elyi lya ndesi ngama shuru kafika-se kulya mmba ya Iruva, kaengywa ni Vayuda valele-fo woose. Nawe kakaa rembo kava avaloshaany.

³Naasa vaarya va fitabu vakasanga na Vafarisayo vakaende nang'u nka aaramwa atuuswaa. Vakanseleesa yoo nnang'ani.

⁴Vakammbia, “Llosha! Nka yeu mmbo aaramwa eetuswaa.

⁵Naasa Mose mmbo aluvavasye efo uvavasony kya vaka va ngata yeyo luvakape na mawe. A yewe kwaambaany inda ndesa?”

⁶Naasa kyavaniinga vakarera indo nyeeli vekundye imweesa naambo vawonise kindo vankumba nakyo. Naasa Yesu kakwiinyika kareiya na nni yoo uteriny.

⁷Naasa elyi vengera immbesa kakwiinwa kavavia, “Nndu wa kunu nnang'ani yaany nalatiri kindo alyamarye we nave wa mbee weenkapa na iwe.”

⁸Nalyo kawuya kakwiinyika lyingyi na ireiya yoo uteriny.

⁹Nawo vamiita indo vakapooka isuruka-u umwi umwi vapookya na vamiku vakatana vasia-u. Na Yesu karewa-u we muni na nka ulya asalalyi-u.

¹⁰Naasa Yesu kawuya ikwiinnwa kammbia, “A valya vekukumba valla na kwi nka? A mmbo kulakaa-fo nta umwi akuutya uvingo?”

¹¹Nawe kaamba, “Nta umwi-fo Nndumi!” Naasa Yesu kammbia, “Nta yeny nshikuutyaa uvingo-fo. Kweenngye, kure deny kulalyamare-se-fo.”]

¹²Naasa Yesu kawuya irera nawo lyingyi kaamba, “Yeny ni sa ya ulana. Nndu kashilatya nnyakyendaa-se ireemin-fo. Mmbo akaa na sa ishendee muu.”

¹³Naasa Vafarisayo vakammbia, “Mmbo kwakureeka-u kyafo ku muni! Ukureeki lwafo nshi lwa dede-fo.”

¹⁴Yesu kaallwa kavavia, “Na kwakooya shakureeka-u kyakwa shi muni ukureekyi lwakwa mmbo lwava lwa dede-da, kimmba shiishi kundo shyuukye na kundo nsheendaa.

¹⁵Neeni mmbo mwarummbwa mwiilolaa nyama yeto ta nndu, indi yeny nsharummbwa kya nndu nta-fo.

¹⁶Naakwa kwakooya sharummbwa kya nndu, nrumbuye wakwa waveva wa dede-da, mashika nshakaa-fo shimuni-fo, mmbo shakaa-fo yeny na yeto aleshiruma.

¹⁷Naakwa na efo uvavasony yelo lwany mmbo kikee kireiye kyeamba, Kindo kyammbikywa ukureeki ni vandu vavii mmbo kikee kya dede.

¹⁸Yeny shimuni mmbo shikureekye-u kyakwa, na yeto aleshiruma we Nde, kavekureeka-u kyakwa-da.”

¹⁹Naasa vakammbia, “A Nde yeto wafo akee kwi.” Yesu kaallwa, “Yeny mmushiishi-fo, nta Nde wakwa-fo. Kwee mmbo mweeshiishi yeny, mmbo mwemanyaa na Nde yeto wakwa.”

²⁰Nng'u marero alererya alya kufii na isanduku lyeesanyirya fesa efo mmba ya Iruva. Nta kulakae-fo nndu antira nnyelyi kyeeri kyakwe kilandefika.

²¹Naasa kawuya kavavia lyingi, “Yeny shiifo nkweenngyaa, neeni musheshisiaa. Neefo ulyamariny lwan kundo mukai mfo mushefiiyaa. Kundo yeny nsheendaa nta mmushiidimaa ifika-fo yeni-fo.”

²²Nalyo ayuda vaamba, kulakooye mmbo akundye ikuwaa ndese, elyi aamba, kundo yeny nsheenda nta mmushiidimaa ifikapo yeni-fo.

²³Nawe kavavia, “Yeni mmbo muparikye kunu si, na yeny ni efo uuwe shiparikye. Yeni mukavaany vandu muparikye kunu ulaniny, yeny shi nndu shiparikye kunu ulanin-fo.

²⁴Naasa neeny shamuviany, ni efo ulyamariny lwany kundo mukai mfo mushefiiyaa. Mashika kwakooya kulaore mukusirye-u yeny mmbwe, na efo ulyamariny lwany kundo mukai mfo mushefiiyaa.”

²⁵Naasa vakammbia, “A yewe ni viiny?” Yesu kavavia, “Ni indo kikai shaasa shilelava imuvia, na ulaalu shavemuvia indo-da.

²⁶Mmbo shetiri fiingyi fyeerera kyany na irummbwa kyany. Kyaindi yeto aleshiruma mmbwa dede. Neeny mbony shamiita shyuuta kwakwe nto nshambaa-u teevia ulana.”

²⁷Nawo nta valamanyi mmbo arera nawo kikee kya Nde.

²⁸Naasa Yesu kaamba, “Mukamfika irosa mwana yeto wa nndu llyo mushemanyaa yeny mmbwe, nta shilatiri kindo shatana kikee kya shila yakwa shimuni. Ni ekyo Nde aleshoora nkyo shaamba.

²⁹Na yeto aleshiruma, mmbo ashikaye. Nta nnashireeye shimuni-fo. Kimmba yeny findo finsennyi we mfyo shava mwiifitana kyeeri kyoose.”

³⁰Naasa elyi arera indo veengyi vakauta-u ikusirya nawe.

³¹Naasa karera na Vayuda valya vakusirye nawe kaamba, “Kwakooya mwakaa mukutiri na ndera yakwa llyo-ny mushevaa vakiloshyony vakwa dede deny.

³²Neeni mushemanyaa ekyo kikee dede, kishemuvikaa muve valeke.”

³³Nawo vakamwaallwa, “Mmbo lukee ufyari lwa Abrahamu, nta limwi lulandeve mashinga a nndu-fo. A kyavaany inda, elyi kwaamba, mmbo mushevaa vandu valeke?”

³⁴Yesu kavaalwa, “Ni dede kya dede shamuvia, wo nndu atana fya ulyamari mmbo aaluka ishinga lya ulyamari.

³⁵Indi ishinga lyo lyikaa efo kyeny kyeeri kyoose-fo. Nndu akaa kyeny kyeeri kyoose Mmwana.

³⁶Naasany kwakooya mwana ashemwaallwaa muve valeke, llyoony mushevaa valeke dede deny.

³⁷Shiveishi-da mmbo mukee va ufyari lwa Abrahamu. Indi yeni mukasia mwaanya weeshiwaa, kimmba ndera yakwa ilaonnyi kirembo efo nnang'ani yaany.

³⁸Yeny kindo shilollye efo kwa Nde nkyo nshaambaa. Naasany neeni kevetaniny ekyo mwamiita muuta efo kwa Nde.”

³⁹Vakaallwa vakammbia, “A Nde weeru nshiwe Abrahamu?” Yesu kavavia, “Kwee mwekee vana va Abrahamu mmbo mweetanaa mitannyi ya Abrahamu.

⁴⁰Kya indi ulaalu mukeruuya mwaanya weeshiwaa, neeny shikee nndu shamuvia ekyo kikee kya dede, ekyo shilekiita shyuuta efo kwa Nde. Nta Abrahamu nshi indo aletana-fo-te.

⁴¹Yeni mmbo mwava veetana mitannyi ya nde yeto waany.” Vakammbia, “Yese lluwonikye kyuuka na utuusi-fo. Mmbo lutiri Nde umwi-da, ni Iruva.”

⁴²Yesu kavavia, “Kwee Iruva ekee Nde waany, mmbo mweeshikundaa yeny, kimmba yeny shilesha shyuuka kwa Iruva shasha yaa shikai. Nta nshisheye kikee kya shila yakwa shimuni-fo. Mmbwe aleshiruma.

⁴³A kimaruma nkikyi elyi mulakeemanya ekyo nkeemuvia? Mmashika elyi mulashiidimaa yaaranya Irero lyakwa.

⁴⁴Yeni mmbo mukee va nde yeto waany we mmbishwa. Na efyo fikunndyo mmbwe mfyo mukunndye itana. We ekee mwiiwaa vandu uka elyo mapoonkyony nta nalakee na dede-fo kimmba efo nriminy mmbwakwe kulaifo kya dede yeyo kyeeri arera wongo mmbo arera ekyo kikee kyakwe muni, mashika we akee muni wongo kaveva mmbwe ndeye wa vayo.

⁴⁵Kya indi yeny elyi sharera ekyo kyikee dede nkyo kyaima mulakusirye neeny.

⁴⁶A nndu wa kunu kwany ni ungau ashiidimaa ishikureekya sheelyi shikee llyamari? A kwakooya sharera kya dede naambo-ki-se elyi kulaore mwakusirya neeny?

⁴⁷Yeto aparikye efo kwa Iruva, mmbo ashiitaa marero a Iruva, nkyo kyaniinga yeni mulaite nnyeeli mulakee vandu vaparikye efo kwa Iruva.”

⁴⁸Naasa Vayuda valya vakarouwa vakammbia, “A nshi lwaronga ninsha elyi lwaamba yewe mmbo kukee Nsamaria, kwavetirwa ni Mumuyo nkasha?”

⁴⁹Yesu kaallwa, “Yeny nshitirwa nta ni Mumuyo nkasha-fo mmbo shainndyaa Nde wakwa neeni mukashimina.

⁵⁰Neeny nta nshiruyaa nnduma wakwa shimuni-fo. Mmbo kwiifo yeto ashiniinga nnduma na irummbwa kyakwa na kyany.

⁵¹Ni dede kya dede shamuvia, kwakooya nndu aringa ndera yakwa nnasheshoshaa ufu-fo na kafika llung'anu.”

⁵²Vayuda valya vakammbia, “Akakyo ulaalu lwammanya mmbo kutirwa mmumuyo nkasha. Abrahamu mmbo alefwa na valya veauya fisuku vakavefwa, na yewe kwaamba, kwakooya nndu aringa ndera yakwa nnasheshoshaa ufu fika llung'anu-fo.

⁵³A mmbo kukee nniini kwailanya nde weeru Abrahamu, nawe alevefwa-da? Na vakisuku vakavefwa-da. A mmbo kwakwaallwa sha vi?”

⁵⁴Yesu kaallwa, “Kwakooya shakung'anisa shimuni nng'anu wakwa nshi kindo-fo. Mmbo kwakaa-fo Nde-yaakwa mmbwe yeto ashing'anisaa. Na yeni mukaamba mmbwe Iruva waany.

⁵⁵Nta mulamwiishi. Kya indi yeny shimwiishi. Na kwakooya shaamba, nshimwiishi mmbo shava mwoongo sheeni. Kya indi shimwiishi na kirero kyakwe shavekiringa.

⁵⁶Na nde ulya waany we Abrahamu alelooka eeishi mmbo akaa nalollye nkonu wakwe, nawe naveulollya-da kafura.”

⁵⁷Naasa Vayuda vakammbia, “A yewe kulandefika irika lya mmyaaka makumi araanu-le, kwaamba inda kwallollya Abrahamu?”

⁵⁸Yesu kavavia, “Ni dede kya dede shamuvia, meendi Abrahamu nalandekaa-fo, yeny shiifo.”

⁵⁹Naasa Vayuda valya vakaipoo mawe vamweerye. Yesu kakusuruma kauka efo mmba ya Iruva.