Read BIBILLYA Mareiyo Meele a Iruva MASHORA 11 Bible Online

MASHORA 11 - BIBILLYA Mareiyo Meele a Iruva bible

MASHORA 11

¹Naasany vakiloshyony ewo na Vakristo vekee kulya Uyuda vakeeta sheelyi vandu va masanga nawo vambwarya kirero kya Iruva.

²Na kyeeri Petro alerwa na Yerusalemu, valya va ngata ya Kiyuda yeerina vakasalala nawe.

³Vakallya nawe ulai vakaamba, “Mmbo kuleenda kwa vandu valakee varini kwalya nawo?”

⁴Petro kapooka irera nawo waarya-dwa, kaamba,

⁵“Nkonu umwi mmbo shekee kulya Yafa, shiiterevaa, shooma, shoorya yooryeny, kiiya kikaoloka, sha ntaraso wa soori niini ikoolotwa yuuka iruveeu na taari tavayo iinya, ikashisheya.

⁶Shaimaiya-fo shalollya findo fikee na muu fya ngata shiingyi, fya marende aana na fya ngoroshony efyo fikuruffwaa si na ndeye teefo nginiiu.

⁷Sheeta na unyanga lushambaa, ‘Petro, kwiipoo, kushishe, kulye.’

⁸Shaamba, ‘Oode Nndumi mashika nkwiifo kindo kitefusu kilemmanga kaniny kyakwa tara-fo.’

⁹Unyanga luuka iruveeu lukashirouwa lya kavii, ‘Efyo Iruva anfyereemuta, yewe kulafyallwe fitefusu-fo.

¹⁰Kindo ekyi kyikatanyika kararu, numa findo efyo fikaviirwa na iruveeu.’”

¹¹Na llya yeni ekava vandu vararu vasalali yoo mwaangony wa mmba ilya lwekai, vekee varumi kwakwa vauka Kaisaria.

¹²Mumuyo Kashivia sheende nawo, shire itirwa nnyinyira. Vanavama eva varindaru vakaenda neeny lukandeanga mmba kwa nndu yeto;

¹³Kaloongoya shaasa alelollya nsu wa Iruva alesalala kyeny kwakwe na immbia, “Ruma vandu veende Yafa vandevaanga nndu avaangwa Simon Petro,

¹⁴nashekuvia marero ashidimaa ikukira, yewe na mmba yafo shoose.”

¹⁵Naasa kyeeri alepooka irera Mumuyo Mweele kavasokkya shaasa alelusokkya naako ni yese mapookyony.

¹⁶Neeny shakummbwa irero llya lya Nndumi, shaasa aleamba, Yohane mmbo alebatisa na mura, lyo yeni mmbo mushebatiswaa na Mumuyo Mweele.

¹⁷Naasany kwakooya Iruva muni finya toose ammbaniinga wo simbo ilya sheni aleluniinga yese luleirikkya Nndumi Yesu Kristo, yeny mmbo shivaa sha vi shivakyane na Iruva?

¹⁸Llya valeeta marero yoo vakamalallya sau, vakarumisha Iruva, vakaamba, “Naasa-da Iruva allyilya na vandu va masanga vakakooya yaalashika lyeende muu.”

¹⁹Naasany na valya valenyanyaka kimaruma kya ngatara ilya ilevasheya kya mbony tilya ta Stefano, vakaipoo kyaaro vakafika Foinike, Kipro na Antiokia, nawo mmbalevambisa irero llya kuuta kwa Vayuda veni-fo.

²⁰Llyo kyaindi veengyi vawo vekee vandu va Kipro na Krene, nawo kyeeri valefika Antiokia vakarera na Vayuda va Kigriki, veevambisa mbony shaantu ta Nndumi Yesu.

²¹Woko lwa Nndumi lukakaa nawo; vandu veengyi vakakusirya-u, vakasora Nndumi.

²²Mbony ta vandu yewo tikashefikya Siri ya kulya Yerusalemu, vakaruma Barnaba neende Antiokia.

²³Nawe ekifika neelollya isarya lya Iruva katirwa nnu ni nsia, kavaikyima vengere yeenda na Nndumi kya nrima deny.

²⁴Mashika eeke nndu nsaari aishwe Mumuyo Mweele na kikusiryo; valya valekaa kyaalu kya Nndumi vakaengereka.

²⁵Numa kauka-u keenda Tarso nanderuuya-fo Sauli.

²⁶Eekyimaa illolya kamweende Antiokia. Naasany ando a mwaaka moose vakakaa siriny ilya vakalosha vandu veengyi.

²⁷Mikonu yeyo myeni veawuya fisuku vave vakasoka vauka Yerusalemu vakandefika Antiokia.

²⁸Kyeeri lulekwaanannya umwi waawo kasalala, irina lyakwe ni Agabo, kaawuya kisuku na finya ya Mumuyo Mweele sheelyi shaa niini ishaa kufii ulaniny koose; nayo dede ilesha kyeeri kya Kaisari Klaudio.

²⁹Na vakiloshyony valya, wo umwi kiinani na ivesyo lyakwe, vakarummbwa varike ngarami yaawo kwa vanavamaye vawo vakee Uyuda.

³⁰Vakavetana indo, vakavarikya vamiku veeteterwaa ni Barnaba na Saulo.