Read BIBILLYA Mareiyo Meele a Iruva MASHORA 24 Bible Online

MASHORA 24 - BIBILLYA Mareiyo Meele a Iruva bible

MASHORA 24

¹Kwiikisia mikonu iraanu, Anania, we Nkohani nniini, kaoloka ando amwi na vamiku vave, na nreri umwi Tertulo, nawo vakavia mwitori wa uruka mbony ta Paulo.

²Nawe Tertulo kyeeri alevaangwa kapooka irera indi kyenkumba, “Kimmba lukeewonisa ufoo wiingyi kwa finya yafo, Feliki mmbee, neelyi kusalallye findo fyoose naambo fyeende nisha kunu vanduny veru,

³mmbo lukeewarya efyo fyoose na kyaanu wo kyeeri na wo ando.

⁴Kyaindi shakutereva kulasue, lyo kulwaarannyi marero maangu kwi isarya lyafo.

⁵Mashika mmbo lulollye nndu yeu ngata, alepooka uriingyi kwa Vayuda ulaniny koose, na lyingyi we ni nrwe wa siri ta Vanazorayo.

⁶Na kingi-se mmbo alekunda itefusa mmba ya Iruva lukantira. [Lukakunda imuutya uvingo kisumani na uvavaso lweru.

⁷Indi Lisia nshilyi nnini wa vasikari kasha, kamuuta maakony eru na finya,

⁸kavavasya valya valenkumba vashe kwafo.] Yewe kumuni kwammbesa-vesa nkuti kumanyi mbony yeto lwankumba nato yese.”

⁹Vayuda nawo vakankumba kya mbony yeto sheni.

¹⁰Na llya mwitori wa uruka aletukya Paulo narere, karouwa indi, Kimmba shiishi shamanya yewe mmbo kukee mwirumbuya vandu va uruka yelu kwa myaaka miingyi, mmbo shikeerera kyakwa shimuni na nrima wa ifura nnu.

¹¹Mashika kushidimaa imanya sheelyi nkwaleirau mwasi ya mikonu ikumi na ivii uka kyeeri shilerwaa na Yerusalemu indeendya Iruva.

¹²Vandu yeva mmbaleshilollya kulya mmba ya Iruva-fo, nta shireraa na nndu moose, ao sheende mwaandu ikwaanuny nta efo kiterevyo kya Vayuda nta efo muriny-fo.

¹³Nta wo mmbashidimaa iringisya mbony yeti vasheshikumba nato-fo.

¹⁴Kuuta lyo kwiifo kindo kimwi, kyo kuti shikyiirikye, Shia yei ya Nndumi wo vakeiivanga ni ngula, niindo shikeindya Iruva yeu wa vakuu veru, shivikye yefi, mmbo firiani na uvavaso na fikee fireiye efo fitabuny fya vakisuku.

¹⁵Shivikye nsia efo kwa Iruva, shaasa nawo vavikye nsia, sheelyi kushekaa-fo iruka lya vafu, kwa yewo va usumanu na valakee va usumanu.

¹⁶Neeny mmbo shikekwishivira yoo ufundony yelu naambo nrima wakwa ulawonise usakiro mmbee ya Iruva na mmbee ya vandu vengyi mikonu myoose.

¹⁷Numa ya myaaka miingyi mmbo shilesha naambo shuutye vandu vakwa firaso na fyeeningyoo.

¹⁸Lyo wo valeshilollya mmba ya Iruva shiirunndya findo yefyo, shamma iilyiswa, nta nsherye ironda lya vandu nta yaatara-fo; kyaindi lyo kweifo Vayuda maata valeuka Asia,

¹⁹kyikavaitikya wo veni vafike yaa mmbee yafo isheshikumba, kwakooya vatiri kirero kyoose neeny.

²⁰Ao vandu yeva wo veni vakureeke, nkyoki valellollya shirengya llya shilesalala alya mwaanduny,

²¹kuuta tupu ni kimaruma kya unyanga elo lumwi, kyeeri shilefua shisalalyi nnang'ani yaawo, shaamba, “Kyeendwa ni ufundo lwa iruka lya vafu nkyo kyeengye shautyo uvingo yaa mmbee yaany inu.”

²²Feliki kaveerikisa, mashika we eishi mbony ta Shia yei ya Nndumi nisha mmwasi kaamba, “Lisia nniini wa vasikari kyeeri ashesokaa na kunu llyo nshemurumbuyaa mbony yeti tany.

²³Kavavasya nshilyi ulya sheelyi Paulo naringwa; naniingwa na uleke, nta kulave nndu aima umwi wa vambuya vakwe imfurukannya.”

²⁴Kwikyisia mikonu mive, Feliki kasha ariani na nkaakwe Drusila akee Myuda, karuma Paulo nandevaangwa naambo nawe nashaarannya mbony ta kikusiryo yekyo kya Yesu Kristo.

²⁵Na Paulo elyi ekeaamba mbony eto ta usumanu, na iva na mwiyanu, na mwaandu wefurumya, Feliki kairyaa, karouwa, “Ulaalu enda mbele neeny shallollya mwaanya shikuvangaa lyingyi.”

²⁶Na kyingi-se kavika nsia kulakooye Paulo anningaa fesa; kweekyo kammbaanga lyingyi-se eerera nawe.

²⁷Myaaka ivii ikiira, Feliki kawarya Porkio Festo nashillye ando akwe. Na kimmba Feliki eekunndye ikunndya Vayuda kara Paulo nengere ikaa kifingyony.