Read BIBILLYA Mareiyo Meele a Iruva MASHORA 27 Bible Online

MASHORA 27 - BIBILLYA Mareiyo Meele a Iruva bible

MASHORA 27

¹Naasa kyeeri lulevavasyo lusaami ngalava lweende Italia, vakavika Paulo ando amwi na vafungwa vengyi maakony a nshilyi umwi avaangwaa Yulio, wa itorito lya Augusto.

²Lukasaama ngalaveny ya Adramitio yekudeesye yeenda fika miriny ya mbai ya yeeve lya Asia, lukapooka kyaaro, Aristariko nndu wa Makedonia aukye Tesalonike keenda neese.

³Elyi lya ndesi lukafika Sidoni. Yulio katannya Paulo fya isarya kanninga muumu wa yeenda kwa vambuya vakwe, naambo nafurukanyo-fo.

⁴Lukauka-u lukaenda lukafika Kipro, naambo lukwiise uraato, mashika ngyuraato tekee ta finya.

⁵Kyeeri lweera yeeve taari ya Kilikia na Pamfilia, lukafika Mira muri wa Likia,

⁶Nafo nshilyi ulya kakooya-u ngalava ya Aleksandiria, iikudeesye yeenda Italia, kalusaamisa-fo.

⁷Lukeenda kyaaro ekyi waarya ando a mikonu miingyi lukafikya Nido kwa tamba nnu, mashika elyi uraato lwekeelusindika lukeera kwasinde ya Krete kufii na Salmoni.

⁸Lukaira-u na ngatara deny, mbaa mbaa ya yeeve, lukashekooya ando avaangwaa, “Shashio Shisha.” Kufii na yoo kwiiyo muri uvangwaa Lasea.

⁹Na llya kyeeri kiingyi kyemmiira, na kyaaro kyikava kya yeerese nnu, mashika na mikonu yekootoya yemmaa iira, Paulo kavaikimba,

¹⁰Kavavia, “Nyira vomi, shilollye sheelyi kyaaro ekyi kishetiraa ngapo na irekyo mfindo fiingyi, nshi ya masaa na ngalava-da-fo, kyaindi na ya muu weru-da.

¹¹Kyaindi Nshilyi ulya kaarannya nniini wa ngalava na muni wa vayo ngota filya Paulo aleamba.

¹²Na kimmba muri ulya wa alya yeeveny kulore weekeeva ikaa kyeeri kya mbeo, veengyi vakauta makusaro vauke-u veende Foinike, kwakooya kyiivaa, vandekaa-fo kyeeri kya mbeo, nato mmuri wa Krete usumanu na taari ya sinde-nkwaany na ndoo-nkwaany.”

¹³Na llya uraato lwa sinde lulepooka kyaangu, nawo vakakusara mmbo kivaa shaasa llya vekunndye, vakakwiipoo na ngalava vakaira Krete yo kufii na mbai ya yeeve.

¹⁴Numa kyaangu lukasha uraato lwa finya, sha kitita-si, nalo luvangwaa Eurakilo.

¹⁵Kyeeri ngalava iletamba, ilakiidimise ikuna uraato, lukaikureeya ikakunwa ni uraato.

¹⁶Kyeeri luleira uviny kufii na kiuruka kidu kivaangwaa Kauda lukaidima kwa tamba yaasshwa ngalava.

¹⁷Vekiidima iyaasshwa, vakafinga ngalava kwa iita fiwoye efo kwasi ya vayo nawo elyi veetiri weerei valashetammbya efo kwasi-kwa Sitri, vakara naambo ngalava ikunwa ni uraato.

¹⁸Kimmba lukekapwa nnu ni kivivita ekyo kya uraato, elyi lya ndesi vakapooka yeerya mario a ngalava efo mureny.

¹⁹Elyi lya nkonu wa kararu vakeerya naakwa ni fiiya fya ngalava efo mureny wo veni.

²⁰Nta nkyeere nta nyinyiri mfilelollyo-fo, ando a mikonu na uraato lwa finya lukalukapa, lukauta pa ya iturunya.

²¹Na llya venkaa kyaasha valallya shoonga, Paulo kasalala yoo nnang'ani yaawo, kavavia, “Vomi, mmbo kyesumani kukooye mmbo muleshaarannya mure mulauka Krete nkonu ulya, neeni mwewona ngatara yei na efi mwanreta-fo.

²²Ulaalu a shimuningeny makusaro. Kaariseny ngoo tany, mashika nkwiifo nta nndu umwi waany arekaa-fo, llyo kuuta ngalava sheni.

²³Mashika kio ekyi kya inu, nsu wa Iruva yeu yeny shikee wakwe, nawe mmbwe nkemwiindya, mmbo alesalala kufii neeny,

²⁴kashivia, ‘Kulairyee-fo Paulo, nkuti kundesalala mbee ya Kaisari, na lyingyi lola, Iruva mmbo ankuniinga vandu yeva woose kukee nawo.’

²⁵Naasany, vomi, kaarryeny, mashika shikusirye na Iruva, sheelyi fyoose mmbo fishevaa indo shaasa shilevio.

²⁶Kyaindi lyo nkuti lufwallyo mbai ya uruka lumwi.”

²⁷Kyeeri nkonu wa ikumi na kaana ulefika, kyeeri lwekerawa efo neefo efo yeeveny ya Adria, kufika kio nnang'ani varundi va ngalaveny vakakusara sheelyii nkufii vakooye uruka wuumu.

²⁸Vakeera kyeeso kya yeesa mura vakaonisa fyeeso makumi avii, vakeenda mbee vakeerase fikava firaanu.

²⁹Vakairyaa kulakooye lushefwallywa ando iwe lyikwaallye si, naasa vakavika mireiyo ya ngalava vakatereva Iruva kukye.

³⁰Kyeeri vateteri va ngalava valekunda iisitiyou ngalava varishe, kyeeri ekyo valeolota ngalava ta mundi efo mureny kive sheelyi mmbo vakeereiya ngalava-da,

³¹Paulo kavia nshilyi na nsikari, “Yeva vakanra valamammya kunu ngalaveny mmushidimaa ikia-fo.”

³²Naasa vaskari vakarummbwa fiwoye filya fya ngalava ilya ya mundi ikawa kulya mureny.

³³Kwikee kufii kukye Paulo kavaitika valye shoonga, evavia, “Inu ni nkonu wa ikumi na kaana lwiveraa na ikootoya, mmulekomba nta kindo-fo.

³⁴Naasa shamuutereva lyeny shoonga, mashika nkyo kishemukiraa. Nta nkwiifoo nta ufii lwumwi lwa nrweny wa umwi waany lurekaafo.”

³⁵Ekimaa yaamba indo kaipoo nkate kaarafuma Iruva velollye woose kaufisha-fisha kapooka iulya.

³⁶Naasa vakakya mirima woose vakalya shoonga wo veni.

³⁷Neese lwekee ngalaveny lwefikye vandu mayana avii makumi mfungare na varinderu indi.

³⁸Vekimaa iwuura vakaangura-se mario a ngalava, vakeera nganu efo mureny.

³⁹Kyeeri kulekya mmbalemanya uruka llwa-fo, lyo mmbo valelollya yoo mbai ando kuvakye mundi, vakalollya nkyeni vasaleese-u ngalava vakamiidima.

⁴⁰Vakeera nanga teesaleesa ngalava kwaasha, efo mureny, vakaelelisa na fiwoye fya ngalava, na soori eto tikunwaa ni uraato vakarau imwi shidu.

⁴¹Vakandefikya ando yeeve ivii tikwaanannyi, vakasaleesa-u ngalava.

⁴²Vasikari vakakunda vafungwa vawaawa, naambo nndu nalakeleye narishe.

⁴³Lyo nshilyi umwi eekundye ikira Paulo, kavaima valashetana shaasa vekundye, kavia valya veeshi ikeleya vapooke mbele ikweera mureny, naambo vafikye uruka uumu.

⁴⁴Neewo valesaau maata vakasaama uwe ya mapoo na vengyi uwe ya findo efyo fyekee ngalaveny. Naasa indo vandu woose vakatana vafikya uruka wuumu kipwa.