Read BIBILLYA Mareiyo Meele a Iruva VAROME 12 Bible Online

VAROME 12 - BIBILLYA Mareiyo Meele a Iruva bible

VAROME 12

¹Naasany vanavama vakwa, mmbo shamutereva kyikee kya isarya lya Iruva niingyeny miili yaany ive kyiraso kyeele kyitiri muu, kive nkyo mwiindye wa dede.

²Nta mulasore mikaaye ya ulana yelu-fo, mmbo mushaalashikaa mikaaye yaany, mwiimanyaa nkyokyi Iruva akunndye kwany naambo munsenyi neeva vasongovisi.

³Kimaruma kyeelyimyo isarya lya Iruva mmbo shaidima imuvia yeni moose, kulave nndu alanga ikurosa mwasi ngota elyi akai. Veny vandu va mwiina, shaasa Iruva aavye wo nndu mwiina wakwe wa kikusiryo.

⁴Mashika shaasa mwiili utiri filungo fiingyi nafyo filarundaa ishora lyimwi-nsi.

⁵Niindo neese mmbo lukee filungo fya mwiili wa Kristo wo nndu kalungwa neeto ungyi.

⁶Naasany kimmba lukee valyimye simbo tikwaavye-avye, kiinani na isarya lya Iruva, kwakooya ni ukisuku, lurere kyikee kya iirikkyo.

⁷Kwakooya ni yaambya veny lurunde nisha, neeto mwiilosha, naverunda nisha.

⁸Neeto ashiikimbaa vengyi, navaikimbe kyikee kya usha. Neeto mwiiwarya veny navawarye na nrima nkesi. Na mwiisalallya vengyi navasalallye nalashaaraa. Na mwiilyillya vengyi navalyillye na ifura.

⁹Ukundi lwany lulatire ukunang'ari-fo. Taniny findo fisha mulakani neefyo fikasha.

¹⁰Kundaniny muveni sha vana va nka, kyikee kya wiindi na ilekeiya vengyi mwaanya.

¹¹Veny vandu vasasari mulasheelelekaa, muve vakaari miriminy yaany irundya Iruva (Nndumi)

¹²mwiivikaa nsia na ifura, mutire usisiryo kyeeri kya ngatara, mukutire efo kiterewony.

¹³Muvetira maako irundya vandu va Iruva, muveambya veny na usau.

¹⁴Vemutannya makasha vakunndyeny mbora nta mulavadenge-fo.

¹⁵Fureny neewo vafuraa, muveiya neewo vaiyaa.

¹⁶Veny va nrwe umwi nsi moose, nta mulave vandu vakurosaa. Indi irikyeny yaatarwa naakwa mfindo fifwafwa. Nta mulave vandu vekushopa na urango mutiri.

¹⁷Mulataiye ukasha na ukasha-fo. Latyeny yefyo fisennyaa vandu woose.

¹⁸Llyo mushekaa na ufoo na vandu woose.

¹⁹Vakunde vakwa, loleny mulataiyane fiduva naambo mulasheesheyo ni unyafi lwa Iruva, kimmba kyikee kyireiye indi, “Itaiya kyiduva llyakwa yeny Nndumi.”

²⁰Lyo nkiduva wafo eetirwa nshaa nniinge shoonga. Eetirwa nnyura nrite. Kwantana indo llyo ashewonaa ngapo imfye.

²¹Ukasha lulakuvinge-fo, mmbo kutanaa mesha kuvinge ukasha.