Read BIBILLYA Mareiyo Meele a Iruva VAROME 15 Bible Online

VAROME 15 - BIBILLYA Mareiyo Meele a Iruva bible

VAROME 15

¹Kimmba niindo mmbo kilukooye yese lutiri finya lwiipoo ufwafwa lwa valya valatiri finya, nta lulave vandu vekukunda luveni.

²Wo nndu nnang'ani yeeru nalole shaasa ashesennyaa yeto ungyi, nasennywa neetumariswa.

³Mashika naakwa ni Kristo nnyalekusennya we muni-fo; kuuta nshaasa kyikee kyireiye. Filya filererwa-u kyikasha kyafo ni yeny fileshikooya.

⁴Mashika efyo fikee fireiye mmbo filereiyo naambo yese kyeendwa ni usisiryo na iviiryo muu lwawonisa efo Mareiyony yoo Meele lwiidimi ivika nsia.

⁵Iruva mmbwe mwiluniinga usisiryo na iviiryo muu, nawe namulyimyi ukaari na ikutira efo kwa Yesu Kristo.

⁶Naambo neeni moose mwikee na nrwe umwi-nsi mwiidimi iitikisa Iruva Nde na Nndumi weeru Yesu Kristo.

⁷Kyasia waryaniny kyeny kwany muveni na veni shaasa Kristo alemuwarya yeni naambo itumbe lya Iruva lyikooye ilollyo.

⁸Manyiny-te naakwa ni Kristo mmbo alerundya Vayuda naambo naore paa shaasa Iruva akee nsha, na fyaasa filya Iruva alevikya vakuu veru fikooye iinukkya.

⁹Naambo na vandu va masanga engyi vaute-u irumisha Iruva kyeendwa ni ilyillya lyakwe. Mareiyo yoo Meele niindo aamba: “Kimmba niindo mmbo nshekurumishaa efo vanduny va masanga moose. Shiimbe nnduma wa irina lyafo.”

¹⁰Nang'u mareiyo akaamba lyingyi, “Kyefureny yeni vandu va masanga fureny musange na vandu vengyi woose.”

¹¹Na lyingyi, “Eni vandu va masanga moose ng'aniseny Nndumi eni vandu woose nnganiseny.”

¹²Nawe Isaya kaamba, “Asheshaa nndu auka efo ufyariny lwa Yese, nawe asheshillyaa vandu va masanga nawo vashembikaa nsia.”

¹³Naasany, Iruva yeto amwiidimisya ivika nsia namweengye ifura lyoose na ufoo lyuukye efo kyikusiryony kyany, naambo na ivika nsia lyany lyeengereke kyeendwa ni finya ya Mumuyo Mweele.

¹⁴Vanavama, mmbo shikee nsununndye deny kyany kyeyaamba naakwa nnyeni mutiri mesha meengyi, muraiye urango, mukaidima na iikimbana.

¹⁵Lyo mmbo shiifo shimureiyaa findo efi nookaari yaa kyengeny ekyi kya barrwa yei, kyive sheelyi shamukumbura-da, kyimaruma kya isarya llya shilelyimmyo ni Iruva.

¹⁶Naambo shive mwifurukannya Kristo Yesu efo nnang'ani ya vandu va masanga, shirundye Nrumi ya Iruva ya Nsia ishora lya ukohani, naambo vandu va masanga vave kiraso kyisenyi, kyikammaa iilyiso ni Mumuyo Mweele.

¹⁷Naasany, yeny mmbo shilollye kyimaruma kya ifura nnu na Kristo Yesu mbee ya Iruva.

¹⁸Mashika nshishidimaa isenda nta irero lyimwi ishoreny lyakwa Kristo alyisuuye-fo, naambo vandu va masanga vaindye-u, na irero ao na kindo kyeetana.

¹⁹Kwi finya ya ngyende na findo filandelollywa na wiidimi lwa Mumuyo Mweele; naasa kipookya Yerusalemu neefo minyanuny ya vayo kufike Iluriko mmbo shilevambisa Nrumi shisha ya Kristo na ifura.

²⁰Lingyi shakutakura shilaambe Nrumi ya Nsia alya kweni irina lya Kristo lyilemmaa isendwa, naambo tupu shilatannyi mmba uvasheny lwa nndu ungyi.

²¹Kive shaasa kyikee kyireiye indi, “Valya valandeongoywa mbony takwe vashelollyaa. Na valya valandeite vashemmanyaa.”

²²Nkyo kyimaruma wo kyeeri shilelemwa isha kwany.

²³Kyaindi ulaalu, kimmba shilatiri mwaanya kunu, na lyingyi uka myaaka miingyi sheelangye isha kwany;

²⁴nkonu moose eto nshipoo kyaaro yeenda Hispania mmbo nshaa kwany. Mashika mmbo shilanngye imulollya yeni kyaarony ekyo kyakwa. Mushivikye kilyilyika, nrima wakwa uwuutiso nnyeni.

²⁵Lyo ulaalu nkuti sheende mbele Yerusalemu, shindefurukannya veele va Nndumi.

²⁶Mashika mmbo kilesennya vandu va Makedonia na Akaya isanyirya firaso kyimaruma kya veele yewo va Yerusalemu vakee vakiva.

²⁷Yee, mmbo kilevasennya indo, nawo mmbo vatiri sye kwawo. Mashika kwakooya vandu va masanga vantarannya nawo mbony ta miriminy, mmbo valesennyo nawo ivafurukannya kya efyo fya mwiili.

²⁸Naasany kwakooya shainutya ishora elyo, na iringisya ndunda eto, mmbo nshiiraa kwany sheende Hispania.

²⁹Neeny shiishi shamanya shansha kwany mmbo nshaa na mbora ya Kristo iishwe shapu.

³⁰Vanavama, mmbo shamutereva kwi Yesu Kristo, na kwi ukundi lwa Mumuyo kutakureny ando amwi neeny efo fiterewony fyany mbee ya Iruva kyimaruma kyakwa.

³¹Shikirwa maakony a valya valairikkye kulya Uyuda, na lyingyi naambo urundi elu lwakwa kulya Yerusalemu lukooye iirikkywa mbee ya veele.

³²Naambo shiidimi isha kwany shiitiri ifura, shaasa Iruva akundye, nsheimuya ando amwi neeni.

³³Iruva wa ufoo nakae ando amwi neeni moose. Amen.