Read BIBILLYA Mareiyo Meele a Iruva VAROME 2 Bible Online

VAROME 2 - BIBILLYA Mareiyo Meele a Iruva bible

VAROME 2

¹Naasany, yewe nndu mmbo kwava vi, kushuutyaa ungyi uvingo, nta nkutiri kyeekuuta-fo. Mashika efyo kukeeyuutya nafyo vengyi uvingo, mfyo fyeni kukeekuutya nafyo uvingo kumuni kyeyaamba kukee nrekwa, mashika yewe kukeeyuutya uvingo mmbo kwatana efyo fyeni.

²Lyo yese lwiishi sheelyi ni mirumbuye ya Iruva myeni ikee ya dede kwa yewo veetana efyo.

³Yewe nndu wa vandu kurumbuyaa vengyi neewe kumuni kwatana efyo fyeni. A ndesa mmbo kusheidimaa inda ikyia unyafi lwa Iruva?

⁴A ndesa mmbo kukeemina wiingyi lwa isarya lyakwe na usisiryo kulamanyi sheelyi usha lwa Iruva mmbo lwakoomwa naambo kufikkye ikurya?

⁵Kyaindi kyeendwa ni uumu lwafo, na nrima wafo ulatiri ngata ya ikurya, mmbo kwakudeesya unyafi kufike nkonu ulya wa unyafi na yaanduyo lyaorwa paa yoo usumanuny lwa Iruva,

⁶yeto ashetaa wo umwi kiinani na mitannyi yakwe;

⁷valya veefo vesisiryaa neetana mesha veruuya itumbe na nnduma na ira kulalyamarika, wo vasheningwaa muu wa llung'anu.

⁸Na valya veerenga, valalatyaa dede, lyo vakairikya uravi, vashewonisaa unyafi na yuumisyo ngoo.

⁹Ukiva na ngatara nkwa wo nndu mwitana meesi, kava Myuda ao Mgriki.

¹⁰Itumbe na wiindi na ufoo-ni kwa yeto mwitana mesha, Myuda mbele na Mgriki-da.

¹¹Mashika kwa Iruva nkwiifo ikunndyo-fo.

¹²Mashika yewo valyamarye kulaiyo uvavaso, neewo valelyamara veetiri uvavaso, woose mmbo vasheutyoo uvingo ni mavavaso.

¹³Lyoony nshi valya veeta mavavaso vatiri usumanu mbee ya Iruva-fo, kuuta ni valya veevallya na mavavaso mmbo vasheekennywa usumanu.

¹⁴Mashika kyeeri vandu va masanga vatana kiinani na mikaae yaawo filya fikee efo mavavasony, valya valatiri mavavaso mmbo vammeva mavavaso wo veni.

¹⁵Mmbo vaora mashora a mavavaso akee mareiye efo miriminy yaawo, ngoo tawo tiivakureekyaa, na makusaro awo, wo veni, eevautyaa uvingo ao evaletaa,

¹⁶kufike nkonu ulya Iruva ashesukwaa fyama fya vandu fyoose vaanduyo, kiinani na Nrumi ya Nsia yei yakwa, kwi Kristo Yesu.

¹⁷Lyo yewe kwakooya kukee Myuda kwavevika mavavaso nsia, na irumana na Iruva,

¹⁸na imanya filya akunndye, na ikunda findo fisha, neewe mmbo kurangusyo efo mavavasony,

¹⁹na ikumanya kumuni sheelyi mmbo kukee nteteri wa vafu miso, na sa ya yewo vakee ireeminy,

²⁰mwiilosha wa matondo na llori wa vana vadu, atiri ngata ya urango, na wa dede efo mavavasony.

²¹Naasany yewe kukeelosha vengyi, a mmbo kuraa kulakulosha kumuni?

²²Yewe kushambaa nndu nalatuuse, na yewe kumuni mmbo kutuusaa? Yewe kusuuye maruva a wongo, mmbo kutiraa mmba ta vayo?

²³A yewe kwarumana na mavavaso, mmbo kuturaa wiindi kwa Iruva kwiifishaa mavavaso yoo?

²⁴Mashika irina lya Iruva mmbo lyikee yaararwa efo kwa vandu va masanga kyimaruma kyany, shaasa llya kyikee kyireiye.

²⁵Mashika irinwa mmbo lyisheekyaa tupu elyi kukee mwiindya mavavaso, kyaindi kwankooya kukee mwiifisha mavavaso, irinwa lyafo mmbo lyikee sheelyi kulakee nrini tusu.

²⁶Naasany kwankooya yeto nalakee nrini antira ufundo lwa mavavaso, ra elyi nalakee nrini we nnyasheekenwa-se sheelyi mmbo akee nrini?

²⁷Na yeto nalakee nrini uka efo nkuu-kuu, kainndya mavavaso, a yeto nnyakuutya-se uvingo yewe kukee nrini lyo kwawuya ifisha mavavaso!

²⁸Kimmba we nshi Myuda akee Myuda kyipoo tupu-fo, nta urini nshi llwa lwa kyapoo tupu yoo mwiliny-fo.

²⁹Ni elyi akee Myuda akee Myuda auka efo nnang'ani na irinwa lyakwe llya efo nriminy, lya ngoony, nshi lya mareiyony-fo. Na nnduma wa vayo nshi wooka kwa vandu-fo, nkwa Iruva muni wooka.