Read BIBILLYA Mareiyo Meele a Iruva VAROME 8 Bible Online

VAROME 8 - BIBILLYA Mareiyo Meele a Iruva bible

VAROME 8

¹Naasany ulaalu, nkukyiifo uvingo lwa yoorotwa kwa yewo vakee nnang'ani ya Kristo Yesu-fo.

²Mashika ivavaso lya Mumuyo wa muu ulya wa Kristo Yesu mmbo wanshileka, sharawa kwaasha na ivavaso lya ulyamari na ufu.

³Mashika filya fileeshidimikaa ni mavavaso, mashika a ufwafwa lwa vayo lwa ngata ya mwiili, Iruva ekiruma mwana wakwe muni ekee na mwiili uvakye wa ulyamari, mmbo alevinga ulyamari mwiiliny;

⁴naambo filya mavavaso avavasye fiinutyo ni yese, luve lulaenda lwilatyaa mbony ta mwiili lyo lulatye ta nrima.

⁵Mashika valya vakeelatya mwili mmbo vakekusara mbony ta mwiili; kyaindi valya vakeesora mbony ta Mumuyo wo mmbo vakeekusara mbony ta Mumuyo.

⁶Mashika kirengo kya mwiili ni ufu kyaindi kyirengo kya Mumuyo ni muu na ufoo.

⁷Kyimmba kirengo kilya kya mwiili ni ukiduva na Iruva, mashika elyi kilashiindyaa mavavaso a Iruva, nta nkishiidimaa iinndya-fo.

⁸Valya vasoraa mbony ta mwiili mmbashidimaa isennya Iruva-fo.

⁹Lyo kwakooya Mumuyo wa Iruva ukee nnang'ani yaany, yeni mmukisoraa mwiili-fo; mmbo musoraa Mumuyo. Na nndu moose yeto nalatiri Mumuyo wa Kristo, yeto nshi wakwe-fo.

¹⁰Kristo kankaa nnang'ani yaany, miili yaany mmbo ifiiye efo ulyamariny, mirima yaany ikakaa na muu kyeendwa ni usumanu.

¹¹Kyaindi kwakooya Mumuyo wa yeto aleruta Yesu auka kwa vafu akee efo nnang'ani yaany, we yeto aleruta Yesu Kristo mmbo asheviryaa miili yaany muu yeyo itiri ngata ya ifwa, na Mumuyo wakwe yeto amukaye.

¹²Kimmba niindo, vanavama, mmbo lutiri sye, nshi sye ya mwiili lusore mwiili-fo.

¹³Mashika kwakooya mwasora mbony ta mwiili mmbo mwaruuya ufu, lyo Mumuyo kammweekya ilammya mbony ta mwiili mmbo mukaa na muu.

¹⁴Mashika valya vakee iteterwa Mmumuyo wa Iruva mmbo vakee vana va Iruva.

¹⁵Mashika mmulewarya ngata ya ushinga yeyo ya weeresi-fo, mmbo mulewarya ngata ya ivikwa vana, yalweengye lukavaanga, “Aba” nkyo kyaamba “Nde weeru.”

¹⁶Mumuyo Mweele mmbo akureeka ando amwi na mirima yeeru sheelyi yese mmbo lukee vana va Iruva;

¹⁷na kimmba lukee vana va Iruva, mmbo lukee veni ding'u, veni ding'u va Iruva, yewo vashekaa na Kristo, yee, lwiilyiswaa ukiva nawe ulaalu numa lusherumishwaa ando amwi nawe.

¹⁸Mmbo shilollye sheelyi ngatara yeti tiifo ulaalu nshi kindo, elyi shatiinanisa na itumbe elyo lushelyimywa.

¹⁹Mashika naakwa mfyuumbe fyoose mmbo fivikye nsia nnum isheorwa paa itumbe lya vana va Iruva.

²⁰Mashika fyuumbe fyoose mmbo fikee fishillye na finya ni yeto alefivika-u fikee fiivereyaa.

²¹Mashika nafyo mmbo fisheutwaa ushingeny lwa urumato, kutani fyaanga itumbeny lya vana va Iruva.

²²Mashika fyuumbe fyoose mmbo fikee ngatareny fika ulaalu.

²³Nta nshifyo-da-fo, naakwa ni yese lukee vakaye mumuyo mmbo luvekee ngatareny, lukavika nsia wa yaauwa efo ushingeny na yaaluwa vana.

²⁴Mashika mmbo lulekirwa kwi ivereya; kyaindi kindo kyikee ivereyo kwakooya kyallolyo, nkukiifo ivereya-fo. Mashika ni vi alemmbereya kilya kyammelollyo?

²⁵Indi lukammbereya kindo lulakilollye, mmbo lukivereyaa na usau.

²⁶Ni indo na Mumuyo nawe mmbo alweekyaa ufwafwa lweru, mashika elyi lulaishi itereva shaasa kisumani; kyaindi Mumuyo muni mmbo aluterevya neerosa uuwo kindo kilavaa yaamba.

²⁷Na yeto aishi mirima ya vandu mmbo aishi ngata ya Mumuyo shaasa ikai, mashika mmbwe ava mwiterevya veele shaasa Iruva akunndye.

²⁸Neese mmbo lwiishi Iruva mmbo arundaa ando amwi na valya vankunndye evawonisyaa mesha, mmbo valya vakee vavaange shaasa akunndye.

²⁹Mashika valya avaishi uka mbee, mmbo alevasauwa uka elyo mbee vavakaniswa na Mwana wakwe naambo we nave mwana mmbee nnang'ani ya vandu veengyi.

³⁰Na valya alevasauwa uka elyo mbee, yewo kavavaanga, na valya alevavaanga, wo kaveekennya usumanu; na valya aleveekennya usumanu wo kavang'anisa.

³¹A kya efyo fyoose lukaambany inda? Iruva kankaa taari yeeru ni vi ashiidimaa ilukyinga?

³²Yeto alelotora aleima mwana wakwe kyimaruma kyeru yese loose, mmbo araa inda nalalulyimya findo fyoose ando amwi nawe?

³³Ni vi yeto asheringyaa vasauwe va Iruva? Ni Iruva muni aveekennya usumanu.

³⁴Ni vi ashevarumbuyaa mwaandu? Ni Kristo Yesu alefwa, yee, na mmwasi ya efyo mmbo aleruka kooka kwa vafu, nawe mmbo akee woko usha lwa Iruva; na mmbwe yeto akeeluterevya.

³⁵Ni vi ashelurauwaa na ikunda lya Kristo? A ndesa ni ukyiva ao ngatara, ao ni fyuure, ao nshaa, ao ni ikuuywa, ao ni nrenga ao ni ufu?

³⁶Shaasa kyikee kyireiye kyeyaamba, “Mmbo lukee isisyo nkonu piti kyimaruma kyafo, lukavevaka maanri eeshisha.”

³⁷Kyaindi nnang'ani ya efyo fyoose mmbo lukeevinga na mmwasi yeevinga, kyeendwa mmbwe yeto alukunndye.

³⁸Mashika mmbo shammaa imanya na nshusshwa sheelyi, nta ufu ao muu, ao vasu, nta yewo vatiri ushilyi, nta yefi fiiyo ao yefyo fishaa numa, nta yewo vatiri wiidimi,

³⁹nta efyo fikee uwe ao yefyo fikee-si, ao nta kyuumbe kingyi kyoose nkishiidimaa ilurauwa na ikunda lya Iruva yelyo lyuukye kwa Yesu Kristo Nndumi weeru-fo.