Read BIBILLYA Mareiyo Meele a Iruva 2 VAKORINTO 13 Bible Online

2 VAKORINTO 13 - BIBILLYA Mareiyo Meele a Iruva bible

2 VAKORINTO 13

¹Elyi llya kararu nkeesha kwany. Kya kana kya vakureekyi vavii ao vararu wo irero lyishemanyika paa.

²Mmbo shilesongwa imuvia; na shaasa llya shekee kwany lya kavii, ni indo naakwa ni ulaalu shilaiyo, valya valetana ulyamari uka elyo mbee mmbo shavavia paa, na yewo vengyi woose, sheelyi, elyi nshaa nkwiifo kyesarya-fo.

³Mashika mmbo mukeeruuya ngata ya Kristo yeyo ishikaaye nalakee mfwafwa kwany, avetiri wiidimi nnang'ani yaany.

⁴Mashika we mmbo alekapywa nsalabeny akee na ufwafwa, kyaindi ulaalu mmbo akee na muu akee na finya ya Iruva. Neese kiwo mmbo lukee vafwafwa efo kwakwe, lyo mmbo lushekaa na muu nawe lukee na wiidimi lwa Iruva lukee kwany.

⁵Kweeseny muveni mulole kwakooya muselelyi iirikyony, kuvangiseny muveni. Ao ndesa mmbo mulakwiishi sheelyi Kristo akee nnang'ani yaany? Kulakooye llyo mulellemika.

⁶Shivikye nsia lyo mwiishi sheelyi llulemikkye-fo.

⁷Neese mmbo lukeetereva Iruva naambo mulatani nta kindo kiravi, nshi naambo lulollywa mmbo lwiirikyo-fo lyo naambo yeni mukooye itana ekyo kyisha, na kyikava yese luvakkye yewo valeminkye.

⁸Mashika llushidimaa itana kindo kyoose kikapanaa na dede-fo. Mmbo lutanaa fyoose kimaruma kya dede.

⁹Mmbo lufurye kyeeri lukee vafwafwa, lyo yeni mmbo mukee vakaari. Na yekyi nkyo lwatereva kiinutywa kwany.

¹⁰Kikeeny indo, mmbo shareiya efi mulaiyo yoo mukai, naambo kyeeri shiiyo, shire shilanyaasya kiilannyi wiidimi elo Nndumi ashiniingye, kya irosa kilakee kya isammbwa.

¹¹Na kya ifurummya, vanavama vakwa, nakwany, woniny ivanga na iviirywa muu, mukee na nrwe umwi, mukae iirikyony. Na Iruva yeto muni ukundi ashekaa ando amwi na yeni.

¹²Kwiidikireny na kimimindo kyeele.

¹³Veele woose vamwiidikira.

¹⁴Isarya lya Nndumi Yesu Kristo, na ikunda lya Iruva, na yaakaniswa Mmumuyo Mweele lyimukaye yeni moose.