Read BIBILLYA Mareiyo Meele a Iruva YOSUA 1 Bible Online

YOSUA 1 - BIBILLYA Mareiyo Meele a Iruva bible

YOSUA 1

¹Naasany Mose we ishinga lya Nndumi Iruva eekifwa, Nndumi Iruva kavia Yosua mwana wa Nuni, ulya ekee mweekyi va Mose,

²“Mose ulya ishinga lyakwa ekau amfwa, kyasia, iboony vandu yeva woose muruuke mura va Yordan, urukeny yelo shikeeniinga vana va Israeli.

³Wo ando uvayo lwany luvaryaa mmbo shamuniinga uruka elo, shaasa shilevia Mose.

⁴Minyanu ya uruka lwany ni indi, taari ya sinde ni kasa koomu taari ya ndoo ni mafumbu a Lebanoni, taari ya ngama ni mura ulya nniini Efrati na iira uruka loose lwa Vahiti kundekooya yeeve lya Meditarenia taari ya nkwaany.

⁵Nkushekaafo nndu moose ashiidimaa ikukikisa yoo mbee yafo kyeeri kyoose, kya mu wafo-fo, na shaasa shekee na Mose shansongoya, niindo nshekaa neeweda, shilakuraa nta ikwaanguya.

⁶“Tira nrima nkaari neeva ntakusu, mashika ni yewe kushefitaa vandu yeva urukeny yelo shilevikkya vakuu vany kyaasa sheelyi mmbo nshevaniingaa.

⁷Va nkaari nnu kuve ntakusu. Lola nnu kutani shaasa nsero wakwa Mose alekuvavasya. Kulaevekye mbai taari yei ao yei-fo, llyo kushevikyoo mbora findony fyafo fyoose.

⁸Kyitabu ekyi kya uvavaso mmbo kukuloshaa kyeeri kyoose, na marero a vayo kuve mwiia-soongya kio na nsanyiny, kutane shaasa kikee kireiye, llyo shia yafo ishevaa ya iviiri, kuvikyo mbora deny.

⁹A nshi yeny shilekuruma va ntakusu kutire nrima nkaari! Kulasheereyaa nta isavaa, mashika Nndumi Iruva, Iruva wafo mmbo akee neewe ando koose kusheenda.”

¹⁰Naasa Yosua kavaanga maakida va vandu kavavia,

¹¹“Endeny efo mmbeny, muvye vandu vadeesye shoonga, mashika kukamiira mikonu iraru nsi mmbo lukillyaa Yordan naambo lundetira uruka elu Nndumi Iruva waany aleluniinga luve lweru.”

¹²Kawuya kavia ufyari lwa Ruben, lwa Gadi na kyenga ekyo kya ufyari lwa Manase;

¹³“Mukumbuye irero llya nsero wa Nndumi Iruva we Mose llya alemuvia, mmbo nshemwengyee ifura shimuniinge uruka yelu.

¹⁴Vaka vany na vana vany na findo fyany, fyoose mmbo mushekaa urukeny yelo Mose alemuvia, kwakulya ya Yordan, lyo yeni vengyi mmbo musongoyaa yewo vengyi mwiirye fisha fyany, yewo vatiri finya na ukaari, mweekye vengyi.

¹⁵Kutani elyi vanava maye vany nawo vasheonisaa kirembo shaasa neeni mulewonisa, elyi vamaa iwonisa uruka yelo Nndumi Iruva waany alemuniinga, llo Mose nsero wa Nndumi Iruva alemuniinga alya kwakulya ya Yordan taari ya nkwaany.”

¹⁶Nawo vakarouwa Yosua neembia, “Efyo fyoose kwaluvia mmbo lutanaa na wo ando kwaluruma lweende.

¹⁷Shaasa lulearanya Mose findon fyoose, niindo-da lushekwaaranyaa yewe, Nndumi Iruva wafo nakukaye, shaasa ekee na Mose.

¹⁸Nndu moose yeto araa nalasora efyo fyoose kuluvavasyaa, nawaawa. Lyo va ntakusu kutire na nrima nkaari, kyo kyeni mmbo kifye!”