Read BIBILLYA Mareiyo Meele a Iruva YOSUA 16 Bible Online

YOSUA 16 - BIBILLYA Mareiyo Meele a Iruva bible

YOSUA 16

¹Vana va Yosefu mmbo valeonisa uka Yordan kufii na Yerko yoo mureny taari ya ngama, kasa eko, uruka elo lwa mafumbu fika Beteli.

²Uka Beteli fika Luu kikaenda indo fika nnyanu wa Vaariki fika Ataroti,

³ikasoka nataari yankwaany fika vayafleti fika nnyanu wa Bet-horoni ya sinde, fika Geseri fika yeeveny.

⁴Nawo Manase na Efraimu wo vana va Yosefu vakawonisa waavi lwawo.

⁵Na nnyanu wa vana va Efraimu ukava indi. Taari ya ngama ni Ataroti-adari fika Bet-haroni ya ndoo,

⁶Naasa nnyanu ukeenda taari ya nkwaany, efo Mikmeta taari ya ndoo na fika taari ya ngama fika Taanat-shilo, ukeenda fika ya ngama ya Yanoa.

⁷Nnyanu yeto ukasoka wunka Yanoa fika Ataroti na Naara, fika Yeriko, fika mura wa Yordan.

⁸Uka Tapua fika taari ya nkwaany fika usoka lwa kana fika yeeveny.

⁹Ando amwi na miri ilya ilereeyo vana va Efraimu yoo nnangani ya uruka lwa Manase, miri ya vayo na fyuungo fya vayo.

¹⁰Nawo valaumbute Vakanaani valya vekee Geseri, vakeengera ikaa na Vaefraimu fika inu, Vakanaani vakawa mashinga awo.