Read BIBILLYA Mareiyo Meele a Iruva YOSUA 17 Bible Online

YOSUA 17 - BIBILLYA Mareiyo Meele a Iruva bible

YOSUA 17

¹Neelu llo luleva waavi lwa vana va Manase, kimba we ekee mwana mbee wa Yosefu. Makiri ulya mwana mbee wa Manase mmbwe ndeye wa Gileadi, mashika eekee nndu wa fira kaka na Gileadi na Bashani.

²Kura ikava ya vana va Manase valya kulaore vemmavyo waavi lwawo, na vana va Abieseri na va Heleki, na vana va Asrieli na vana va Shekemu, na vana va Heferi na vana va Shemida, yewo mmbo vana va kyuumi va Manase, we mwana wa Yosefu.

³Lyo Selofehadi mwana wa Heferi wa Gileadi mwana wa Makiri mwana wa Manase, nnyetiri mwana wa kyuumifo, neewo va kika marina awo ni Mala, Noa, Hogla, Milka na Tirsa.

⁴Naasa vakasha kwa nkohani Elieseri na Yosua wa Nuni na kwa vasongoru, vakaamba, “Nndumi Iruva mmbo alevavasya Mose sheelyi yese luniingwa waavi sha vengyi. Nawe kavaniinga waavi sha vandu vawo vengyi.”

⁵Kuru yeyo ilewoya Manase ikava fyenga ikumi ando amwi na uruka lwa Gileadi na Bashani, kwakulya ya yordan

⁶Na vana va Manase va kyika nawo mmbo valewonisa waavi sheeewo va kyuumi, na uruka lwa Gileadi lukava lwa vana va womi va Manase vengyi.

⁷Nnyanu wa Manase ukapooka yoo kwa Aseri fika Mikweta, taari ya Shekemu nato ukaenda taari ya woko usha, ukakooya vandu va Antapua.

⁸Uruka lwa Tapua llwa Manase, lyo muri wa Tapua wekee yao nnyanuny wa uruka lwa Manasa ukava wa vana va Efraimu.

⁹Nnyanu ukasoka ukakooya usoka lwa Kana, taari ya sinde ya usoka yelo miri yeyo mmbo yekee ya Efraimu yuutwa efo miriny ya Manase. Na nnyanu wa Manase ukava taari ya ndoo ya usoka yelo fika yeeveny,

¹⁰Taari ya sinde ikava ya Efraimu, na taari ya ndoo ikava ya Manase fika yeeveny, vakakooya nnyanu wa Aseri taari ya ndoo fika taari ya ngama ya vana va Iskari.

¹¹Nawe Manase mmbo alewonisa miri efo urukeny lwa vana va Iskari na Aseri Miri yeyo ya Betsheani na fyuungo fya vayo, na Ibleamu na fyuungo fya vayo, na Dori na fyuungo fya vayo, na Endori na fyuungo fya vayo, na Vataanaki na fyuungo fya vayo, na Megido na fyuungo fya vayo.

¹²Lyo vana va Manase mbaleidima yuumbuta vandu valevakooyafo-fo, nkyo Vakanaani vakeengera ikaafo.

¹³Naasa elyi vana va Israeli llya valeengera itira finya mmbaleidima yuumbuta Vakanaani yewo-fo indi lyo vakavalamya na mashora a iitikywa.

¹⁴Naasa vana va Yosefu vakarera na Yosua, vakammbia, A niinda kuleshiniinga mwaanya wa waavi lumwi nsi, na yese lukee veengyi, mashika Nndumi Iruva mmbo alelufumbuta?

¹⁵Yosua kavarouwa, “Kwakooya yeni mukee veengyi kyasia rweny na nturu, mundetirafo kundo kumumaa efo kwa Vaperisi na Warefai, kimba uruka yelo lwa Efraimu lulamumaa.”

¹⁶Vana va Yosefu vakammbia, “Uruka yelu llulumaafo, lyo Vakanaani wo mmbo vatiri mitika ya minya, mmbo yewo vakee Betshaani na fyuungo fya vayo, neewo va Yesreeli-da.”

¹⁷Naasa Yosua karera na vana va Yosefu lmbo va Manase na Efraimu kavavia yeni mmbo mukee veengyi mukavetira finya deny, mwaanya wafo nshi umwi nsi-fo,

¹⁸Nkyo uruka yelo lwa mafuumbu mbo lushevaa lwany, lla elyi lukee nturu, mmbo muumanyaa kuve kwany, kuumbutefo Vakanaani, lla elyi vatiri mitika a minya vakavetira finya niini.