Read BIBILLYA Mareiyo Meele a Iruva YOSUA 18 Bible Online

YOSUA 18 - BIBILLYA Mareiyo Meele a Iruva bible

YOSUA 18

¹Naasa llyo vana woose va Israeli valekwaananya shilo, vakavikau yeema lyeekwaananya.

²Nalyo kukaafo ngyufyari mfungare ta vana va Israeli vakandeonisa waavi lwawo lwa uruka.

³Naasa Yosua kavia vana va Israeli, “A mmbo muvaa vapeere indi fika indii mulakundye ikutakura itira uruka elu Nndumi Iruva wa vandeye vany alemuniinga?”

⁴Kyasia ulaalu sauweny vandu vararu wo ufyari, neeny shivarume veende, vandesauwa neetira waavi lwawo, vasheshivia.

⁵Vandu yewo vaave uruka yelu fyenga mfungare, ufyari lwa Yuda lukae taari ya sinde, na vana va Yosefu taari ya ndoo.

⁶Mmbo mureiyaa shaasa mwaava fyenga efyo mfungare musheengye ekyo mwareiya nshemukabya kura mbee ya Nndumi Iruva waany.

⁷Wo Valevi mbatiri ding'u efo kwany-fo Mashika urundi elo lwa ukohani nnyo ding'u yaawo. Na ufyari lwa Gadi na Ruben na kyenga kya ufyari lwa Manase wo valemmaa iwona waavi lwawo kulya kwakulya ya Yordan taari ya ngama, llya valeniingwa ni nsero ulya wa Nndumi Iruva Mose.

⁸Naasa Yosua kavia valya valeenda ireiya uruka, Endeny mukandeera efo urukeny, mureiye mbony ta vayo shoose, musheny yaa, neeny nshemurambikya mbee ya Nndumi Iruva kulya Shilo,

⁹Llyo vandu yewo valeenda vakandereiya uruka vakaava na miri ya vayo vakaava fyenga mfungare, vakasheya Yosua kulya Shilo.

¹⁰Naasa Yosua kavakabya kura mbee ya Nndumi Iruva kulya Shilo, Yosua kaavya Israeli shaasa kisumani nawo.

¹¹Naasa kikafikya kura ya vana va Benyaminy, kura yaawo ikava nnyanu na yeyo ya vana va Yuda na va Yosefu.

¹²Nnyanu wawo wa taari ya nndoo ukava mura wa Yordan, ukeenda fika yoo mbai ya muri wa Yeriko taari ya ndoo, ukanderwa na mafumbuu taari ya nkwaany fika kasa ka Betaveni.

¹³Nnyanu wawo ukeenda indo ukandekooya miri ya Lusu nto Beteli, taari ya sinde, fika Ataroti-adari kufii na ifumbu lya taari ya sinde ya Bethoron.

¹⁴Naasa nnyanu ukaenda indo taari ya nkwaany na ya sinde, na uka yoo ifumbuny lya Bethoron ukandekooya kiriat-baali nto Kiriat-yearimu, nato mmuri wa Yuda na nnyo taari ya nkwaany.

¹⁵Na nnyanu wa sinde mmbo wuukye yoo Kiriat-yearimu umandi, fika taari ya nkwaany, ukandekooya usoka lwa Nefloa yoo lurukaa nang'u.

¹⁶Naasa nnyanu ukasoka indo fika yoo ifumbu lyimandi na imungo lya Hinomu yoo kyaandaany kya Varefai taari ya ndoo, ukandefika yoo mbai ya muri wa Myebusi taari ya sinde fika Enrogeli.

¹⁷Naasa ukainduka, ukarwa fika Enshemeshi fika Geliloti underwa na Adumimu ukawuya isoka na alya iweny lya Bohani mwana wa Ruben,

¹⁸naasa ukasora Araba taari ya nndoo, ukasoka.

¹⁹Naasa nnyanu ukeenda fika Bet-hogla taari ya ndoo ukandekooya wombe lwa ndoo lwa Yeeve ya shumbi taari ya sinde yoo mura wa Yordan umandi, nto nnyanu wa taari ya sinde.

²⁰Mura wa Yordan ukava nto nnyanu wa taari ya ngama kwa vana va Benyaminy. Yelo llo waavi lwa vana va Benyamen shaasa valeniingwa, iringitya koose.

²¹Miri ya vana va Benyaminy nnyo Yeriko na Bet-hogla na Emek-ko-sisi

²²na Betiaraba, na Semaraimu na Betheli,

²³na Avimu na Para na Ofra,

²⁴na Kefar-amon, na Ofui na Geba. Myoose mmiri ikumi na ivii ando amwi na fyuungo fya vayo,

²⁵na Gibeon na rama na Beeroti

²⁶na Mispa na Kefiri na Mosa,

²⁷na Rekemu na Irpeeli na Tarala

²⁸na Sela na Elefu na Myebusi nto Yerusalemu, na Gibeati na Kiriat, nnyo miri ikumi na iina na fyuungo fya vayo. Yeyo nnyo ding'u ya vana va Benyamen shaasa valeniingwa.