Read BIBILLYA Mareiyo Meele a Iruva YOSUA 19 Bible Online

YOSUA 19 - BIBILLYA Mareiyo Meele a Iruva bible

YOSUA 19

¹Naasa na vana va Simion vakaniingwa waavi lwawo shaasa vafye, nawo vakakaa yoo nnaang'ani ya ufyari lwa Yuda.

²Miri yaawo ni Beer-sheba, na Sheba na Molada,

³na Hasar-shuali na Bala na Esemu,

⁴na Eltoladi na Betuli na Horma,

⁵na Siklagi na Betmarkaboti na Hasarsusa,

⁶na Betlebaoti na Sharuhen mmiri ikumi na iraru na fyuungo fya vayo,

⁷na Aini na Rimoni na Eteri na Ashani, miri iina na fyuungo fya vayo.

⁸Fyuungo fyoose firingitye miri yeyo, fika Baalat-beeri, na Rama ya Sinde. Yelo llo waavi lwa vana va Simion shaasa valeavyo.

⁹Ding'u ya vana va Simion mbo lukee ando amwi na lwa vana va Yuda, mashika yelo lwa vana va Yuda mbo lweeng'ani nnu, nkyoo vana va Simion vakaavyo-u.

¹⁰Naasa ikamba lya kararu lya yaavyo lyikava lya vana va Sablon, na nnyanu wawo mbo wefika Saridi,

¹¹ukarwa na taari ya nkwaan fika Marala na Dabesheti, fika usokeny lwa wa Yokeneyamu.

¹²Na uka Saridi ukasora taari ya ngama fika Kisilot-tabon fika Daberati fika Yafia.

¹³Kuuka ukafika Gat-heferi efo taari ya ngama fika Ethkasini na Rimoni na Nea.

¹⁴Nnyanu ukaringitya uruka yelo taari ya ndoo fika Hanatoni nkandefika imungony lya Iftaeli,

¹⁵na Kitathi na Nahali na Shimroni na Idala na Bethlehemu, nnyo miri ikumi na ivii na fyuungo fya vayo.

¹⁶Lukava llo waavi lwa vana va Sabulon shaasa luvefye.

¹⁷Kyaasia, vana va Iskari nawo vakaavyo shaasa vafye.

¹⁸Nato nnyanu wawo ukafika Yereseli na Kesuloti na Shunemu.

¹⁹Na Hafaraimu na Shioni na Anaharati,

²⁰na Rabitu na Kishioni na Ebesi,

²¹na Remeti, na Enganimu na Enhada na Bethparesi,

²²fika Tabori na Shahasuma na Betshemeshi ukandekooya mura wa Yordan, myoose ikava miri ikumi na irindaru amwi na fyuungo fyoose.

²³Llo waavilwa vana va Iskari shaasa vafye

²⁴Llyo waavi lwa karaanu lukava lwa vana va Aseri shaasa nawo vafye.

²⁵Vakamanda Helkati na Hali ya Beteni na Akishafu,

²⁶na Alameleki na Amadi na Mishali, kandekooya ifumbu lya Karmeli taari ya nkwany na Shihor-libnati;

²⁷ukalemya fika taari ya nkwaany fika Beth-dagoni, ukafiitana na Sablon neekooya imungo lya Iftaeli taari a ndoo fika Belementi na Neyeli, fika Kabuli woko umuso lwa vayo,

²⁸na Ebron na Rehobu, na Hamoni na Kana fika muri nniini wa Sidon.

²⁹Naasa nnyanu ukalla taari ya Rama, na muri wa turuve wa Tiro, nnyanu ukaringitya fika Hosa fika yeeveny kundefika Aksibu.

³⁰Na Uma na Efeka na Rehobu, nnyo miri makumi avii na ivii na fyuungo fya vayo.

³¹Waavi lwa vana va Aseri llo yelo miri yaawo shaasa vafye.

³²Naasa ufyari lwa Naftali nalo lukaavyo waavi lwawo shaasa nawo vafye.

³³Nnyanu wawo mbo ulebookya Helefu uka alya miriny ya Saananimu, na Adami-nekebu na Yabineeli fika Lakumu kufike mureny wa Yordan.

³⁴Nnyanu ukeenda indo fika taari ya nkwaany fika Asnot-tabari, ukau ukeenda fika Hukoki, ukandekooya nnyanu wa Sablon taari ya sinde, na nnyanu wa Aseri taari ya nkwaany, na ufyani lwa Yuda yoo mureny wa Yordan kuleenda na taari ya ngama.

³⁵Na miri yeetiri turuve ni Sidimu na Seri na Hamati na Rakat na Kinereti;

³⁶na Adama na Rama na Hasori,

³⁷na Kedeshi na Edrei na En-hasori,

³⁸na Ironi na Migdal-el na Horemu na Bataneti na Betsheweshi, mmiri ikumi na kyeenda na fyuungo fya vayo.

³⁹Llyo waawi lwa vana va Naftali shaasa vafye, miri yeyo na fyuungo fya vayo.

⁴⁰Waavi lwa mfungare lukava lwa vana va Dan kiinani nawo.

⁴¹Na nnyanu wawo ukabookya muri wa Sora na Eshtaoli, na Irishameshi,

⁴²na Shaalabini na Aiyaloni na Itla

⁴³na Eloni na Timna na Ekroni,

⁴⁴na Elteka na Gibetoni na Baalati,

⁴⁵na Yehudi na Bene-beraki na Gitrimoni,

⁴⁶na Meyarkoni na Rakoni nkaenda indo ukandekooya Yafa

⁴⁷Na elyi vana va Dan valereta kyenga kyawo vakandekabana na vandu va Leshemu, vakaviira neewaa vandu veengyi neetira uruka elo, muri yeto vakaufishya Dani, llyo irina lya nkuu waawo.

⁴⁸Yelo llo waavi lwa vana va Dani shaasa vafye, nnyo miri yaawo na fyuungo fyawo.

⁴⁹Naasa vana va Israeli veekimaa yaava uruka neevika minyanu myoose, naasa nawe Yosua mwana wa Nuni kaniingwa waavi lwakwe,

⁵⁰shaasa Nndumi Iruva alevavasya, kasauwa muri aukunda, nto Timnat-sera, nato mbo weekee urukeny lwa mafumbu lwa Efraimu, Nawe Yosua Katokoba muri yeto kakaafo.

⁵¹Na Elieseri we nkohani, na Yosua wa Nuni, na vasongoru va vana va Israeli vekimaa yaava veekapaa kura mbee va Nndumi Iruva kulya Shilo. Niindo valemaa ishora lyeevaavya uruka.