Read BIBILLYA Mareiyo Meele a Iruva YOSUA 22 Bible Online

YOSUA 22 - BIBILLYA Mareiyo Meele a Iruva bible

YOSUA 22

¹Naasa Yosua kavaanga ufyari lwa Ruben na Gadi na kyenga kya Manase,

²kavavia, “Yeni mmbo mukeesora efyo fyoose mulevio ni nsero wa Nndumi Iruva we Mose, mukaveindya neefyo ukemuvia,”

³nta mmulera vanavamaye vany-fo, mukasora mavavaso a Nndumi Iruva, waany.

⁴Nawe Nndumi Iruva, Iruva waany kaniinga vana va maye vany ufoo shaasa alevaarya kyaasa. Kyasia ulaalu kweengeny kyeny kwany, urukeny lwany yoo Mose nsero wa Nndumi Iruva alemuniinga kulya kwakulya ya Yordan

⁵Lyo loleny muvange deny ilatya mavavaso alya Mose nsero wa Nndumi Iruva alemuvavasya, ikunda Nndumi Iruva, Iruva waany, mukutire nawe neendundya na nrima na ngoo imwi nsi.

⁶Naasa Yosua kavavikya mbora, kavasama naambo vakweengye, nawo vakansama vakeenda.

⁷Naasa shaasa Mose aleninngya kyenga ekyo kimwi kya ufyari lwa Manase kive waavi lwawo kulya Bashani, kyeendi kyenga ekyo kyingyi kya Manase, Yosua kashevaavya kulya kwakulya ya Yordan taari ya nkwany. Naasa alya Yosua alevasama vakweengye kyeny, kavavikya mbora,

⁸Lyo kavavia, woniny masaa meengi efo kyeny kwany, ng'umbe, fesa, saabu, na minya, na soori shiingi nnu, mwaavye na vana va maye vany efyo fileutwa fireny.

⁹Naasa vana va Ruben na va Gadi na va Manase kyenga ekyo, vakooka alya Shilo ya Kanaani, veende Gileadi kwawo shaasa Nndumi Iruva alevaniinga na woko lwa Mose.

¹⁰Nawo kyeeri valefika efo Kanaani mnangani, vana yewo va Ruben na Gadi na kyenga yekyo kya Manase vakatanya Nndumi Iruva kitara kyeerasya kufii na Yordan, kitara kyeerasya kiniini nnu.

¹¹Vana va Israeli yewo vengyi vakeeta kishaambawaa, “vana va Ruben na va Gadi na Manase, mbo valetana kitara-kyeerasya efo Kanaani, kufii na Yordan.”

¹²Naasa vana va Israeli vekiita indo, vakakusanyirya woose efo shilo, naambo vandekabana nawo.

¹³Naasa vana va Israeli vakarumau vandu va mirwe kwa vana va Ruben na Gadi na kyenga kya Manase, urukeny lwa Gileadi nawo ni Finehasi mwana wa nkohani Elieseri,

¹⁴vakanninga na vandu ikumi va mirwe, umwi wo mmba ya vande vawo, wo ufyani lwa Israeli, nawo ni vandu nrwe va wo mmba ya Israeli.

¹⁵Nawo vakeenda vakandekooya vana va Ruben na va Gadi na Manase efo Gileadi, vakarera nawo neevavia,

¹⁶“Ironda lyoose lya Nndumi Iruva mmbo lyikeeyaamba indi, ‘A nkyiki elyi mulelyamarya Iruva wa Israeli indo, elyi muletana kitara kyeerasya, neelyamara indo?

¹⁷A mmbo mulakumbuye mbony ta urekwa lulya lwa Peori nalo kulore lulenkwiilyisa kya vayo fika inu lla shaasa lulesheyo nngapo kimaruma kya vayo?

¹⁸Nta mmutiri kimaruma kya yeeveka ulaalu neera Nndumi Iruva-fo, na kimmba mwallyamarya Nndumi Iruva indo, nawe Nndumi Iruva mmbo arooyoo ni unyafi kyeru yese loose.’

¹⁹“Naasa kwankooya uruka lwany lulavaa irasya Iruva, ruukeny mushekooya uruka lwa Nndumi Iruva yoo akai, neeni mukaeu, lyo mulalyamarye Nndumi Iruva-fo nta ilumina yese-fo, shaasa muletana kitara kyingi kyeerasya kuuta ekyo kya irasya Nndumi Iruva.

²⁰A mukumbuye shaasa Akani wa Sera alelyamara kya findo filya fyeele nalo unyafi lwa Nndumi Iruva! Ngapo ta Iruva tikasheya vandu woose va Israeli, nawe nta nnyalerumatwa muni-fo?”

²¹Llyo vana va Ruben na Kati na kyenga ekyo kya Manase vakarouwa vandu yewo va mirwe valesha, vakavavia,

²²“Iruva Mwaafinya! Nndumi Iruva! Nndumi Iruva! Iruva Mwafinya! Nndumi Iruva! We eeshi, na Israeli vamanyi, kwakooya nkya usha ao kya ukasha, kwakooya mmbo lwalyamarya Nndumi Iruva, (nawe inu nalalure-fo);

²³yese lutane kitara kyeerasya vai naambo lwiindukye mbai lure Nndumi Iruva, ao yuutya yoo uwe ya vayo firaso fyeekora na muro na firaso fya nswa, ao firaso fya ufoo, we Nndumi Iruva muni alollye fyoose.

²⁴Ao kwakooya kindo ekyi mmbo lwatana kisha kwiishi deny kulakooye elyi numa vana vany vasheviaa vana veru, “Yeni mmutiri ando a Nndumi Iruva wa Israeli-fo.

²⁵Kimmba Nndumi Iruva aleluvikyau mura yeu wa Yordan uve nnyanu weru nkyo yeni vana va Ruben na Gadi na Manase kyenga mmusangi neesefo. Kive indo vana veru vashiindyaa Nndumi Iruva.

²⁶Nkyo kileengye lukakusara lukaamba, lukudeesye itana kitara kyeerasya, nshi kya firaso fyeekora ao firaso fingi-fo,

²⁷ni ukureeki-da, kweru na kwany na vana veru elyi numa, naambo luvike urundi elo lwa Nndumi Iruva lwa firaso fyeekora na fingi, na firaso fya ufoo, naambo vana vany valasheevya vana veru elyi numa, Yeni mmukee va Nndumi Iruva-fo.”

²⁸Nkyo lukaamba, “Elyi vasheluviaa kindo sha yekyo, ao vashevia vandu veru kyeeri kya numa, llyo neese lushevarouwaa, ‘Lolen-te neese luvetiri kitara kyeerasya Nndumi Iruva kiletanwa ni vande veru, nshi kya firaso fyeekora ao fingi-fo, kuuta ni ukureeki lweru neeni.

²⁹Iruva naluringe deny ekyo kyellyamarya na yaangya mbai ira Nndumi Iruva elyilwatana kitara kya firaso fyeekora na muro, na fya nswa na fingi mbai na kilya Nndumi Iruva waany alevavasya.’”

³⁰Naasa Nkohani Finehasi na vaniini va shila yeyo na vasongoru va taari toose ivii valevio marero yoo moose a vana va Ruben na Gadi na Manase kyenga, nawo vakaeerikya.

³¹Naasa Finehasi mwana wa Elieseri nkohani kavia vana va Ruben na Gadi na Manase kyenga, “Inu lulollye Nndumi Iruva mbo alukaaye, mashika nkwiiyo kindo mulelyamara mbee ya Nndumi Iruva-fo, nkyoony mmbo mwamuuta vana va Israeli unyafiny lwa Nndumi Iruva.”

³²Naasa llyo nkohani Finehasi na vasongoru yewo vakawuya veeviaa vana va Ruben na Gadi na Manase “nakwafo” vakauka Gileade na yeenda Kanaani kwa vana va Israeli, vakaveengye mbony.

³³Vana va Israeli nawo vakairikya mbony tilya valeengyo vakaarafuma Iruva, nta mbalekirera kyeendekabana nawo-fo.

³⁴Naasa vana yewo va Ruben na Gadi vakavaanga kitara ekyo ukureeki, nkyo kyaamba, Ni ukureeki kweru lweyaamba, “Nndumi Iruva mmbwe Iruva.”