Read BIBILLYA Mareiyo Meele a Iruva YOSUA 23 Bible Online

YOSUA 23 - BIBILLYA Mareiyo Meele a Iruva bible

YOSUA 23

¹Naasa kukairau mikonu miingi, nawe Nndumi Iruva kaonisya Israeli ufoo, vakiduva valavasaveese-se. Nawe Yosua kava mmiku wa myaaka miingyi.

²Llyo Yosua kavaanga Israeli woose, vamiku vawo na vandu vasongoru woose, kavavia, “Ulalalu yeny mmbo shammikwa na mkonu yakwa mmiingyi.

³Yeni mmbo mulelollya fyoose shaasa Nndumi Iruva waany aletanya vandu yewo kimaruma kyany, mashika Nndumi Iruva waany mmbwe muni alemukabannya.”

⁴Yeny mmbo shilemwaarya uruka yelu lwa vandu yewo lulevavinga luve lwany, uka nura wa Yordan na kwa mbee mmwasi kundekooya yeeve ilya niini taari ya nkwaany.

⁵We Nndumi Iruva waany mmbo ashevaumbataafo mwiilollye, mutire uruka yelo, shaasa Nndumi Iruva waany alemuvikya kyaasa.

⁶Kyasia, kaaryen-te musore fyoose fikee fireiye efo uvavason lwa Mose, muleende mbai kunu na kunufo,

⁷Mulasore ngata ta vandu va masanga yeva vakee kwany-fo, nta isenda maruva awo-fo, nta yaarundya na iyaindya-fo.

⁸Kyaindi waraneny na Nndumi Iruva waany shaasa lwekeetana fika ulaalu.

⁹Mulollye Nndumi Iruva mmbo alemmumbuta vandu yewo veetiri finya, nta kulakeefo umwi waawo aidima ikukikisau yoo mbee yaany.

¹⁰Nndu umwi weeru mmbo aleidima yuumbuta vandu kiku, ni elyi Nndumi Iruva waany akee imukapannya shaasa alemuvia.

¹¹Lolente mukwiise mukunde Nndumi Iruva waany,

¹²lyo kwakooya mwawuya numa mukakutira na vandu va masanga yewo vakee kwany, nayaalyikana nawo, neesasanga nawo,

¹³lyo mumanye deny Nndumi Iruva waany nnyashekiumbutaa vandu yewo-fo, nawe mbo vashevaa nsindara na kyoove kyany kyeesanga, vavake mwiinga kutani mwamamika muuke urukeny yelu usha indi Nndumi Iruva waany alemuniinga.

¹⁴Manyin-te, yeny ulaalu mmbo nkeelakana yaa ulaniny kimwi sha vandu vengyi woose, neeni kisumani mukummbwe efo miriminy yaany sheelyi filya fyoose Nndumi Iruva waany aleluvikya kyaasa nkulewiikau nta kimwi-fo, Fyoose mmbo fileinukyany indo eemutannyaa mesha.

¹⁵Naasany shaasa mulewonisa mesha yoo moose Nndumi Iruva waany aleluvikya kyaasa, niindo-da ashemutannyaa makasha namumamite deny kunu urukeny yelu usha Nndumi Iruva alemuniinga,

¹⁶kwakooya mwafisha kyaasa kilya Nndumi Iruva waan alevika neeni murunndye maruva engyi na ieenndya, llyo Nndumi Iruva asherooyoo ni unyafi kimaruma kyany murumakye kunu urukeny yelu usha alemuniinga.