Read BIBILLYA Mareiyo Meele a Iruva YOSUA 9 Bible Online

YOSUA 9 - BIBILLYA Mareiyo Meele a Iruva bible

YOSUA 9

¹Mbony yeti toose tikaitiwa ni vamangyi va ngyuruka tilya ta kwakulya ya Yordan, nato nto ta Shefela, na taari ya yeeve ilya niini na Lebanon, nnyo ya Mhiti na Mwamori na Mkanaani na Mperisi na Mhivi na Myebusi,

²Nawo vakavaangana woose ivika shila shaasa vashekapanaa na Yosua na Israeli, vekee kindo kimwi.

³Kyeeri vandu va Gibeon valeeta mbon ta filya Yosua aletannya vandu va Yeriko na Ai,

⁴wo vakooka ntambo vakava sheelyi wo mmbo varumwa veeree makunnya makuu veesaamye mishungu, veerye na fikushu na mifiri ya mfinyu mikuu ikee miveiye-veiye;

⁵na fyaaru veeree fidoshikye-doshikye, na soori varee tikava shikuu deny na mikate veerye yemmuuma pony, ikatira mashwaa.

⁶Naasa vakasora Yosua ulaleny kulya Gilgali vakarera nawe na vandu va Israeli vakavavia, “Yese mmbo luukye kwaasha deny, mmbo lukundye ilya mma neeni.”

⁷Llyo Vaisraeli valevia Vahifi; “A kwankooya ndesa yeni mmbakufii neese, a mmbo kyava inda ikunda ikumanya neese?”

⁸Nawo vakavia Yosua, “Yese mmba nsero vafo.” Yosua kavavesa, “A yeni mmbaki, na nkwi muukye?”

⁹Nawo vakammbia, “Yese vasero vafo mmbo luukye kwaasha deny, lyo kimaruma kya irina lya Nndumi Iruva waany, kimmba luleita kya nnduma wakwe, na efyo fyoose aletana kulya Misri,

¹⁰na kya efyo aletanya vamangyi valya vavii va Vaamori va kwakulya ya Yordan, Sihoni mangyi ya Heshboni na Ogu mangyi ya Bashani ekee Ashitaroti.”

¹¹Llyo vamiku veru na vandu veru woose valerera neese veshaambaa, “Kamareny kishau mundeambya vandu yewo, neevavia, ‘Yese mmbo lukee vasero vany, mmbo lukundye ikumanya neeni.’

¹²Mikate yei mmbo luleyiipoo elyi ilekorwa indi, naambo ive kishau, lyo nkyelola ulaalu yamuuma pony neemya mashwaa,

¹³na fikushu efi llya lulevikafo mfinyo mmbo fyeekee fiiya, lyo nkyelola ulaalu mmbo fyammaa iranduka-randuka, na soori na fyaaru fyeru mbo fyammikwa kyeengyo nkyaaro kyaasha nnu.”

¹⁴Naasa llyo vandu va Israeli valewarya shoonga ta vandu yeva, valavese mbele Nndumi Iruva kya mbony yei.

¹⁵Yosua kavikyana nawo kyaasa kya urilalyi; kavavikya kyaasa sheelyi mmbo avaniinga muumu ikaa-u. Vasongoru va ufyari lwa Israeli vakavalyiiya mboo ya iindya fyaasa yefyo

¹⁶Kwiikisia mikonu iraru elyi vamaa ivikyana kyaasa, Vaisraeli vakamanya sheelyi vandu yewo ni va yoo kweni kufii deny nawo.

¹⁷Nalyo vandu va Israeli vakaiboo kyaaro kya mikonu iraru vakafika efo kwawo, nayo ni Giveon, Kefira, Beeroti na Kiriat-yearimu.

¹⁸Vandu va Israeli vekimanya indo mmbalekiidima ivawaa-fo, kimmba vasongoru vawo vemma ivalyiiya mboo na irina lya Nndumi Iruva wa Israeli. Lyo ironda lyoose lya Israeli lyikakunung'una kimaruma kya vasongoru yewo.

¹⁹Vasongoru vakavavia, “Kimmba lwambalyiiya mboo na irina lya Nndumi Iruva llukiidimaase ivatannya kikasha-fo.

²⁰Kyasia, kureeyeny kikuviyye indo, naambo lulashekabwa kya yiimbwa mboo ilya.”

²¹Vasongoru vakavavia, “Kureeyeny vakee.” Vakavarundya ibara ngwi neeraa mura, neerunda ekyo kyoose valevavasyo.

²²Naasa Yosua kavavaanga karera nawo kavavia, “A nkiki elyi mulelulemba mushaamba, ‘Yese mmbo luukye va kwaasha deny, ate kwany nnyaa kweni kufii?

²³Kyasiany ulaalu yeni mmbo mukee vadenge, neefo kwany nkwiikaa kuwiikefo mashinga fo, veebara ngwi na veeraa mura kimaruma kya ando eele a Iruva wakwa.’”

²⁴Llyo nawo vakarouwa Yosua, vakammbia, “Mmashika elyi yese mashinga afo lulevio kya dede deny shaasa Nndumi Iruva wafo alevavasya nsero wakwe we Mose kyeevaninga ngyuruka eti toose varumate vandu va vayo woose valakilollyoo-se, neese nkyo kimaruma luleiryaa nnu deny kya muu weru elyi lumukumbwaa, nkyo kyeengye lukatana indo.

²⁵Kyasia, ulaalu, lola yese mmbo lukee maakony any kulutanye yekyo kulollye nkisha kwafo kumuni ilutanya.”

²⁶Nawe kavatanya indo kya yiima valawaawa ni Vaisraeli.

²⁷Nkonu yeto mweni Yosua kavavika ni veebara ngwi neeraa mura kimaruma kya ironda yelyo lya Israeli na kya ando kweele a Nndumi Iruva, fika inu, na ando koose yoo vasheendaa.