Read BIBILLYA Mareiyo Meele a Iruva 1 TIMOTEO 4 Bible Online

1 TIMOTEO 4 - BIBILLYA Mareiyo Meele a Iruva bible

1 TIMOTEO 4

¹Naasany Mumuyo mmbo arera paa deny kyeyaamba sheelyi fyeeri fya ifurumya vandu vengyi mmbo vashelakanaa na iirikyo, vakutire na mimuyo yeyo ilembaa, na ngyufundo ta varumu;

²veeriwa ni ukunang'ari lwa vandu va wongo, mirima yaawo ikorwaa mmuro;

³veshiima vandu valaore vaka, neevavikya ishingo lya shoonga eto Iruva aletivika-fo naambo lutiwarye lumwaani neewo vatiri kyikusiryo vengere imanya dede yeyo.

⁴Mashika lyo wo kyuumbe kya Iruva mmbo kyikee kisha, nta nkwiifo kivaa ilema-fo kuuta ni ifiwarya lwishaanaa.

⁵Mashika mmbo kyikee kyiilyise ni irero lya Iruva na fiterewo.

⁶Kumbura Vakristo mbony yeto, neewe llyo kushevaa nndundi nsha wa Kristo Yesu, kuvemanya nisha ufundo lwa iirikyo ando amwi na ufundo lwa dede llwa kuleloshwa.

⁷Lyo ngyuraawe ta kimiku tilakee ta siri, nkuti kutilemi, kuvekwiishivira iva nsaari.

⁸Mashika ikwiishivira iwona finya ya mwiili nkisha-da kyaindi usaari mmbo lukee usha kyeeri kyoose, mmbo lukee uvikye kyaasa kya muu wa ulaalu na ulya ushaa numa.

⁹Ni irero lyeevikyo nsia, nalyo lyisumani iirikyo deny;

¹⁰mashika mmbo lukee ikuvinisa nekwaatara kimaruma kya efi, mashika elyi lukusirye Iruva yeu muni muu, yeu avekee Mwiikira wa vandu woose, mmwasi yewo vakusirye.

¹¹Vavasya mbony yeti neetilosha.

¹²Lola nndu moose nalasheemina ukoo lwafo-fo, mashika nkuti kuve kyaaso kwa yewo vakusirye, kwiireraa na kwiitanaa, na yoora ikunda na kyikusiryo kisha.

¹³Kutani elyi nshaa, kutakure isoma na iikimba neelosha.

¹⁴Kulare kularunda na simbo yeyo kulesimbwa, nkimaruma kya ukisuku neelyi kuleekeryo maako a vamiku.

¹⁵Swaangya nnu efyo, kukutire nafyo; naambo ivesyo lyafo lyikooye ilollyo mmbandu woose.

¹⁶Kuringe kumuni kutire ufundo lwafo. Kusinde ufundony yelo mashika kwatana indo mmbo kusheashuka yewe kumuni ando amwi na yewo vekwaaranya.