Read BIBILLYA Mareiyo Meele a Iruva FILEMONI 1 Bible Online

FILEMONI 1 - BIBILLYA Mareiyo Meele a Iruva bible

FILEMONI 1

¹Ni yeny Paulo, mfingwa wa Kristo Yesu, na Timoteo mwanamaye weeru shakureiya yewe Filemoni nkunde weeru, mwaakana mashora yaa neese,

²na kwa Afia, mwanamaye weeru, na Arkipo nsikari uroyeeru, na kwa siri yeyo ikee efo mmba kwafo.

³Isarya lyimukaye na urilalyi lyuukye kwa Iruva Nde weeru na kwa Nndumi Yesu Kristo.

⁴Mmbo nkeyaana Iruva wakwa nkonu simu, shiikukumbwaa efo fiterewony fyakwa.

⁵Elyi nkeeiita mbony ta ikunda lyafo na kyikusiryo kyafo kwa Nndumi Yesu na kwa veele woose.

⁶Naambo ukulungo lwa iirikyo lyafo lurunde mashora mesha a urango kwi Kristo.

⁷Mashika mmbo shiletirwa ni ifura iniini na iviiryo muu kimaruma kya ikunda lyafo, mashika mirima ya vandu veele mmbo ilevangiswa nnu mwanamaye weeru.

⁸Naasany, lla elyi shitiri ukaari uniini efo kwa Kristo kyeeri nkekuvavasya efyo fikwani na yewe,

⁹nkyo kimaruma kya ikunda lyeru mmbo shakutereva, shaasa shifye, yeny Paulo yaa ukuuny lwakwa, shivekee mfinge, kimaruma kya Kristo Yesu.

¹⁰Mmbo shikee ikutereva kimaruma kya mwana yeto wakwa Onesimo yeto shilemwiira shikee mfinge.

¹¹Yeto mapookyony kulore etiri mbusha kwafo lyo ulaalu mmbo akweekyaa deny, yewe na yeny-da.

¹²Na yeny shanruma kwafo, kasha we muni, ekee na nrima wa ngata yakwa deny.

¹³Na yeny lyo mmbo shelanngye nakae mbele kunu kwakwa naambo nashirundye ando afo elyi nkee kifingyony ekyi kya Nrumi ya Nsia.

¹⁴Lyo nta nshilekunda itana kindo kulore shakuvesa mbele-fo, naambo usha lwafo lulasheeva sha kindo kwaitikywa, kyaindi kive kya ikunda.

¹⁵Mashika kulakooye nkyo kimaruma ekaa kwaasha neewe ando a kirambo, naambo nashekaany kwafo deny.

¹⁶Uka ulaalu nshi akyikee-se ishinga-fo, lyo ni mmwasi ya ishinga, mwanamaye-akwa nkunde, kwakwa yeny na kwafo yewe ni mmwasi lukee na mwiili.

¹⁷Naasany kwakooya kulollye yeny shikee umwi neewe, warya yeu shaasa kweeshiwaryaa yeny.

¹⁸Na kwakooya alenkulemba kindo, ao kwakooya atiri sye yafo, findo efyo reiya shitaa yeny.

¹⁹Ni yeny Paulo shareiya na woko lwakwa shimuni, yeny mmbo nshekutaa. Nta nshikeekuvia mmbo kukee wa sye kwakwa-fo.

²⁰Naasany mwanamaye wakwa, na shiwoni mbusha kwafo kimaruma kya Nndumi, shiviirya muu kimaruma kya Kristo.

²¹Kimmba shikwiirikye kya wiindi lwafo nkyo kimaruma neeny shakureiya barrwa yei, shiivikye nsia sheelyi mmbo kutanaa nisha mmwasi ngota efi nkeekuvia.

²²Ando amwi neefyo mmbo shakutereva kushideesye ando ekaa, mashika mmbo shivikye nsia sheelyi kyeendwa ni fiterewo fyany, mulyimyoo ishiwonisa.

²³Epafra yeu akee mfinge ando amwi neeny akwiidikira.

²⁴Na Marko na Aristariko, na Dema na Luka, vakee veerunda ando amwi neeny.

²⁵Isarya lya Nndumi Yesu Kristo lyimukaye miriminy yaany.