Read BIBILLYA Mareiyo Meele a Iruva VAEBRANIA 3 Bible Online

VAEBRANIA 3 - BIBILLYA Mareiyo Meele a Iruva bible

VAEBRANIA 3

¹Naasany, vanavama veele, mukee vaakanise uvaango lwa iruveeu, kusareny nnu kya Nrumi na Nkohani Nniini wa kyikusiryo kyeru, we Yesu.

²Yeto aleindya yeto mwinruma, shaasa na Mose ekai, kulya mmba koose kwa Iruva.

³Mashika we mmbo akee nninge itumbe mmwasi ngota Mose, kimwi sha nndu mwisongosya mmba awona nnduma ngota mmba yeyo.

⁴Mashika wo mmba mmbo ikeeshisongosye ni nndu; kyaindi yeto mwisongosya findo fyoose ni Iruva muni.

⁵Na Mose dede lyo mmbo aleinndya fyoose kulya mmba ya Iruva, ekee mwifurukannya-u; nave nkureekyi wa findo fyoose fishererwaa numa;

⁶lyo we Kristo, akee mwana, mwikallya mmba ya Iruva, yeto mmba yakwe ikee nnyo yese, lyo kwakooya luwaranaa nnu na ukaari lweru na itumbe lya ivereya lyeru fika mafurumyony.

⁷Naasany shaasa Mumuyo Mweele arera, “Inu yeni kwakooya mwaita unyanga lwakwe.

⁸Mulasheumisa mirima yaany, sha kyeeri kya yeende unyafi sha nkonu wa kyeeso kulya kasa.

⁹Llya vande valya vany valesheesa, vakashiisa, vakalollya mitannyi yakwa ando a myaaka makumi aana.

¹⁰Nkyo sharooyo ni unyafi kimaruma kya irika elyi, shaamba, ‘Kyeeri kyoose mirima ya vandu yeva mmbo yeevekye, mmbalemanya shia takwa-fo.’

¹¹Kimaruma kya unyafi lwakwa shalya mboo, ‘Mmbashangaa ifureny lyakwa-fo.’”

¹²Kyasia, loleny vanavama vakwa, nnang'ani yaany kulashekaa-fo nrima muumu ulatiri kikusiryo; kimaruma kya ikurauwa na Iruva yeu akee na muu.

¹³Naasa kwiikyimbiny nkonu simu, naambo kulave-fo nta umwi waany ava muumu elembwaa nnyulyamari.

¹⁴Mashika mmbo lwammba veakana ando amwi na Kristo, kwankooya lwavandama na ukaari lweru lwa finya uka mbee fika mafurumyony;

¹⁵shaasa kyaambawa, Inu yeni kwakooya mwaita unyanga lwakwe mulasheumisa mirima yaany sha kyeeri kya yeende unyafi.

¹⁶Mashika ni vakyi valeende unyafi kyeeri valeita? Nshi woose-se valya valeuka Misri veeteterwaa ni Mose?

¹⁷A-ndesa ni vakyi alerooywa ni unyafi kimaruma kyawo ando a myaaka makumi aana? Nshi valya valelyamara, minying'a yaawo ikawa kulya kasa?

¹⁸A ndesa ni vakyi valevalyiiya mboo sheelyi mbashangaa ifureny lyakwe, kulaore ni valya valelyang'aa?

¹⁹Naasany mmbo lwakooya sheelyi mbaleidima yaanga ifureny-fo, kimaruma ira valakusirya-u.