Read BIBILLYA Mareiyo Meele a Iruva VAEBRANIA 6 Bible Online

VAEBRANIA 6 - BIBILLYA Mareiyo Meele a Iruva bible

VAEBRANIA 6

¹Kimmba ni indo, lukara lulasenda ufundo lwa mbee lwa Kristo, lwangusye yeenda lwaawutye, lulasheva-se vekaa uvasheny lwa mashora alakee a muu, neera kyikusiryo kwa Iruva,

²na ufundo lwa ubatiso, na yeekeryo maako, neeruka lya vafu na mwaandu wa llung'anu.

³Na efyo mmbo lutanaa kwakooya Iruva alwiidimisya.

⁴Mashika yewo valemmainingwa sa, na ishosha simbo yeyo ya iruveeu na iwona yaakaniswa na Mumuyo Mweele,

⁵na ishosha irero yelyo lyirolaa lya Iruva, na wiidimi lwa fyeeri efyo fishaa,

⁶vakawuya iwa-da numa ya efyo, nkikiidimikaa-se ivaviira wiiya kutani vakurya-fo, mashika mmbo vakeekapya Mwana wa Iruva nsalabeny lya kavii, na insuta wo veni.

⁷Mashika naakwa ni sumbai yeyo yana mura wa mmbwa yeyo ikapaa-u wo kyeeri na ivikya yewo varema ndunda shisha, wo mmbo vawaryaa mbora tishukaa kwa Iruva;

⁸lyo kwakooya sumbai yeyo yauta miinga tupu na mooro, mmbo ivaa sheelyi yadengwa nyishirikyoo-fo, nayo mmbo ishelyamarwaa.

⁹Kyaindi vakunde vakwa, lla elyi lwaamba indo, mmbo lwiishi mbony tany, tikee shisha mmwasi, tikee ta ukiro.

¹⁰Mashika Iruva nshi nrekwa kutani arekyo mashora any-fo, na ukundi lulya muleora kimaruma kya irina lyakwe, llya mulefurukannya veele, na fika ulaalu ni indo-da mukeetana.

¹¹Neese mmbo lukee mwikima nnu naambo mutire usasari yelo weni na yaawutya ekyo luvereye fika mafurumyony;

¹²naambo mulasherokkwa, naambo musheva vamwi neewo va fyaasa efyo vekee na kyikusiryo sanda na usisiryo.

¹³Mashika kyeeri Iruva alevika kyaasa na Abrahamu, mashika elyi kulaore eiyo ungyi nniini ngota we wellyisa mboo, mmbo alelya mboo we muni,

¹⁴kaamba, ni dede ivikya mbora nshekuvikyaa, na ikufumbuta nshekufumbuta.

¹⁵Na kyeendwa ni ivika nsia kashefityo kyaasa ekyo.

¹⁶Mashika nndu mmbo alyee mboo na yeto amwilannyi, na yekyo kyailannya marero moose ni ilya mboo, evikaa kyiringyisyo.

¹⁷Kyikeeny indo Iruva ekundye yoora valya vashewaryaa kyaasa kilya, shaasa fyaasa fyakwe filashaalashikaa, kavika-u kyaasa.

¹⁸Naambo kimaruma kya findo fivii filashaalashikaa, nang'u Iruva nalashambaa wongo, lukaariswa lwivirywaa muu, yese lukeetamballya efyo luvikye nsia fikee mbee yeeru,

¹⁹nakyo mmbo kivakye kya nrima, kyeluuta nrengeny, itiri finya, yeelwaata efo nnang'ani ya ando eele,

²⁰yefo Yesu aleanga nafo kimaruma kyeru, nsongoru weeru, kava Nkohani Nniini fika llung'anu avakye Melekizedeki.