Read BIBILLYA Mareiyo Meele a Iruva 1 YOHANE 2 Bible Online

1 YOHANE 2 - BIBILLYA Mareiyo Meele a Iruva bible

1 YOHANE 2

¹Vana vakwa vadu, mmbo shikeemureiya efi naambo mulashetana ulyamari. Kwakooya nndu atana ulyamari lutiri Mwiluterevya kwa Nde, we Yesu Kristo muni usumanu.

²Nawe mmbwe nsandi kimaruma kya ngyulyamari teru; nta nshi kya ngyulyamari teru yese-da-fo, kyaindi na ta ulana loose.

³Kya ekyo yese mmbo lwammumanya, elyi lwaringa mavavaso akwe.

⁴Yeto ashambaa, shammumanya, lyo kara nalaringa mavavaso akwe, mmbo akee mwoongo, nta dede nnyikee nnang'ani yakwe-fo.

⁵Kyaindi yeto mwiringa irero lyakwe, nnang'ani ya yeto ukundi lwa Iruva mmbo luvangyi dede deny. Na yese lwiishi mmbo lukee nnang'ani yakwe.

⁶Yeto ashambaa akee nnang'ani yakwe, mmbo kinkooye we muni nave shaasa we Kristo ekai.

⁷Vakunde vakwa, nshi ivavaso iiya nkeemuniinga-fo, ni ivavaso lya kasha mwekee nalyo uka mbee. Ivavaso elyo lya kasha ni irero llya mulelyiita.

⁸Na lyingyi mmbo shamureiya ivavaso iiya, irero lyikee lya dede nnang'ani yakwe na nnang'ani yaany; mashika ireema mmbo lyikeeiira na sa yammaa imika.

⁹Yeto aamba mmbo akee seny, indi kaswa mwanamaye, yeto mmbo akee ireeminy fika ulaalu.

¹⁰Yeto akunda mwanamaye, mmbo akee seny, nta nnang'ani yakwe nkwiifo kiteve-fo.

¹¹Lyo yeto aswa mwanamaye, ni ireminy akai, kaverua-rua ireeminy nta nalamanyaa kundo akeenda, mashika ireema lyammuwaa miso.

¹²Yeni vana vadu, shamureiya yeni, mashika elyi mwansaryo ngyulyamari tany, kimaruma kya irina lyakwe.

¹³Na yeni vamiku, shamureiya, mashika elyi mwamumanya yeto eefo uka elyo mbee. Na yeni vakoo shamureiya, mashika elyi mwammbinga nravi ulya. Na yeni vana shamureiya, mashika elyi mwammanya Nde.

¹⁴Na yeni vamiku mmbo shamureiya mashika elyi mwammanya yeto eefo uka elyo mbee. Mmbo shamureiya yeni vakoo mashika elyi mutiri finya, na irero kya Iruva lyikee nnang'ani yaany, na yeni mukavinga nravi ulya.

¹⁵Mulashekunda ulana nta findo fiifo-fo. Kwakooya nndu akunda ulana, yekyo kya ikunda Nde nkyikee nnang'ani yakwe-fo.

¹⁶Mashika wo kindo kyikee ulaniny, nto lango ta mwiili na lango ta miso, na ikurosa kya muu yeu, mfyuukye kwa Nde-fo, mfya ulana elu.

¹⁷Na ulana elu mmbo lukee iira ando amwi na lango ta vayo, kyaindi yeto mwiitana filya Iruva akundye mmbo ashekaa-u fika llung'anu.

¹⁸Vana vakwa-ro, yefi mfyeeri fya ifurumya; na shaasa llya muleita kya mwiilema Kristo akeesha, na fika ulaalu velema Kristo valenkaa-fo nkuka. Kimmba ni indo lumanyi efi ni fyeeri fya ifurumya.

¹⁹Nkweru valeuka lyo mmbekee veru-fo. Mashika kukooye vekee veru, mmbo vekaa ando amwi neese. Lyo mmbo valeuka-fo naambo kimanyike paa sheelyi nshi woose vakee veru-fo.

²⁰Kristo mmbo alemupusuya mumuyo we yeto akee mweele na yeni moose mwiishi ekyo.

²¹Nshilemureiya yeni-fo, mashika elyi mulaishi dede, kyaindi elyi muyiishi, neelyi kulaore kwiifo nta wongo lumwi luukye efo dedeny yeyo.

²²Ni vi yeto akee mwoongo kuuta yeto akanaa sheelyi Yesu ni Kristo? Yeto mmbwe mwilema Kristo, yeto mwikana Nde na Mwana.

²³Yeto moose akana Mwana, nnyatiri Nde-fo, na yeto erikya Mwana mmbo avetiri Nde.

²⁴Na yeni, kilya mulekiita uka elyo mbee kyikee efo nnang'ani yaany. Na kwakooya ekyo mulekiita uka elyo mbee kyikee efo nnang'ani yaany, na yeni mmbo mukaa-fo nnang'ani ya Mwana na nnang'ani ya Nde.

²⁵Na ekyi nkyo kyaasa aleluvikya, nto muu wa llung'anu.

²⁶Efi fyoose mmbo shamureiya kimaruma kya vandu yewo vakundye imureta.

²⁷Na yeni mmbo muleletwa Mumuyo eto akee na yeni fika ulaalu, nta nkwiifo kimaruma nndu namuloshe kindo kingyi-fo, mashika Mumuyo mmbwe akee imulosha mbony toose, ta dede nta nshi ta wongo-fo, kaeny nnang'ani yakwe.

²⁸Ulaalu-le vana vadu, kaeny nnang'ani yakwe, naambo kyeeri ashelollywa paa, luve vakaari, lulashesukaa mbee yakwe elyi asheshaa.

²⁹Kimmba mwiishi we ni wa usumanu, manyiny sheelyi wo nndu atana fya usumanu mmbo aleirwa mmbwe.