Read BIBILLYA Mareiyo Meele a Iruva VALETI 14 Bible Online

VALETI 14 - BIBILLYA Mareiyo Meele a Iruva bible

VALETI 14

¹Nkonu umwi Samson kasoka na Timna. Nafo kalollya-fo nka umwi wa Kifilisti.

²Ekiwuya na kyeny kandevia ndeye na maye, “Shallollya nka nsha kulya Timna wa Kifilisti. Kyasia sheekyeny shimoore.”

³Nalyo ndeye na maye vakammbia, “A mmbo kulaifoo nka nta umwi kunu kwa vandu yewo kukwaani nawo, kutani-dwa kwanderuuya nka kwa Vafilisti vandu valakee varini?” Samson kavia ndeye. “Shioryeny nka yeto mashika mmbo ashisennyi nnu.”

⁴Lyo ndeye na maye valamanye kindo eki mmbo kyuukye kwa Nndumi Iruva muni-fo, ni elyi Nndumi Iruva eekunndye ikaba Vafilisti. Kyeeri eki Vafilisti mmbo vekeeshillya Israeli.

⁵Naasa Samson na ndeye na maye vakasoka na Timna kulya mareminy a misabibu. Vakeeta miiso yiidinaa.

⁶Mumuyo wa Nndumi Iruva ukansheya na finya, karandwa miiso yeyo sheelyi nndu aranndwaa ngurana ya mburu, nta nnyeetiri kyaandu wokony-fo, Kindo ekyo lyo nnyalevia ndeye nta maye-fo.

⁷Naasa kasoka kanderera na nka yeto, nawe kasenya Samson deny.

⁸Naasa elyi efoo asokaa nandeiboo nka yeto kalola nnying'a wa miiso ilya alewaa kakooyau shuki shiingyi nnu na wuki wa vayo.

⁹Kootau wuki keenda eerye na woko eelyaa kandekooya ndeye na maye Kavaniinga nawo vakally, lyo nalavavie kundo awuuta ni alya nnying'eny wa miiso.

¹⁰Nawe ndeye wa Samson kandesoka kwa nka ulya, nawe Samson na vakoo vakandevika sukukuu niini ndesa ikee miishivire ya vana vakoo.

¹¹Kyeeri vandu valollya atana vakamweenngye vakoo vengyi makumi araru vekaa nawe.

¹²Samson kavavia, “A shimuvie uraawe lwakwa neeni kwakooya mwaidima ikitammbashwa ando a mikonu yei mfungare ya sukukuu yei shimuniinge soori makumi araru wo nndu yakwe, na masara engi-da makumi araru.

¹³Lyo mukallemwa llyo yeni mushiningaa masara eeraa makumi araru na soori makumi araru. Naasa vakammbia. Nnde, luvie uraawe lwafo.”

¹⁴Llyo alevavia, Efo kwa yeto mwiilya ikooka-fo shoonga, Na kweeto atiri finya ukookafo nrolo. Lyo ando a mikonu iraru mmbaleidima itammbashwa uraawe yelo-fo.

¹⁵Ando a mikonu yeyo yiina vakavia nka wa Samson natereve mmi nantammbashuye uraawe yelo, na kulantana indo mmbo lushekumamitaa na muro yewe na va mmba yafo, mashika yeni mbo muleluvaanga yaa sukukuuny yei mushelusoka masaa eru?

¹⁶Nalyo nka wa Samson kaiya na mmi kammbia, “Yewe mmbo kushisuuye, nkushikunndye-fo, mashika mmbo kuleniinga vandu yeva va kwakwa uraawe yelo, lyo yeny kulashitammbashuye.” Nawe Samson kammbia, “Kwiishi, nshiletammbashuya ndeyaakwa nta ma-fo, ni yewe nshekutammbashuya?”

¹⁷Ando a mikonu yeyo mfungare kaiya nawe elyi sikukuu yeyo yeefo. Naasa elyi lya nkonu wa mfungare, kantammbashuya uraawe yelo mashika a elyi alesavaa nnu nawe, llyo alevia vasoro yewo va vandu vakwe.

¹⁸Nawo vandu va muri vakakupoo ngama shuru vakammbia A nkyoki kirolaa ngota wuki? A nkyiki kitiri finya ngota miiso? Nawe kavavia, Kukooye kulore mulerema na ng'umbe yakwa, Mmwemanyaa uraawe lwakwa-fo.

¹⁹Mumuyo wa Nndumi Iruva ukasheya Samson na finya, kandesoka na Ashikeloni, katira womi makumi araru kavakaba neevasoka findo fyawo na vandu valya valetammbashwa uraawe elo lwakwe kavaavya soori tawo. Naasa Samson karooyo ni unyafi, karwa na kwa ndeye.

²⁰Lyo nka wa Samson kaniinngyo urooye wakwe eekee mbuya yakwe deny.